ଜାଣନ୍ତୁ କେଉଁ କଏନ ନିର୍ମାଣ ପାଇଁ କେତେ ଖର୍ଚ୍ଚ ହୁଏ ? ରିଜର୍ଭ ବ୍ୟାଙ୍କ ଟଙ୍କାଶାଳରୁ ମିଳିଲା ତଥ୍ୟ
ମୁମ୍ବାଇ: ଗତ କିଛି ବର୍ଷ ହେବ ଲଗାତାର ଭାବେ ଖୁଚୁରା ଟଙ୍କାର ମୂଲ୍ୟ ହ୍ରାସ ପାଇ ଚାଲିଛି । ଏହାର ମୂଳ କାରଣ ହେଉଛି ବଜାରରେ ମିଳୁଥିବା ସାମଗ୍ରୀର ମୂଲ୍ୟ ବୃଦ୍ଧି । ଏବେ ବଜାରରେ ମିଳୁଥିବା ଅଳ୍ପ କିଛି ସାମଗ୍ରୀକୁ ଛାଡି ଦେଲେ ଖୁଚୁରା ପଇସାରେ ଅନ୍ୟ କିଛି ସାମଗ୍ରୀ କିଣାଯାଇ ପାରୁନାହିଁ । ଏପରିକି ବଜାରରେ ଏବେ ଅତ୍ୟାଧିକ ଖୁଚୁରାକୁ ନେଇ ସମସ୍ୟା ଦେଖିବାକୁ ମିଳୁଛି । ଖୁଚୁରା ନେବାକୁ ଅଧିକାଂଶ ଗ୍ରାହକ ଅମଙ୍ଗ ହେଉଛନ୍ତି । ଏବେ ଭାରତରେ ୧ ଟଙ୍କା, ୨ ଟଙ୍କା, ୫ ଟଙ୍କା ଓ ୧୦ ଟଙ୍କିଅା କଏନର ବ୍ୟବହାର ହେଉଛି । କିନ୍ତୁ କେବେ ଭାବିଛନ୍ତି ପ୍ରତି କଏନର ପ୍ରସ୍ତୁତି ପାଇଁ କେତେ ଟଙ୍କା ଖର୍ଚ୍ଚ କରିବାକୁ ପଡିଥାଏ ?
Sambad is now on WhatsApp
Join and get latest news updates delivered to you via WhatsApp
ସୂଚନା ଅଧିକାର ଆଇନ ବଳରେ ମିଳିଥିବା ତଥ୍ୟ ଅନୁଯାୟୀ, ଆରବିଆଇ ପ୍ରତି କଏନର ନିର୍ମାଣ ପାଇଁ କେତେ ଟଙ୍କା ଖର୍ଚ୍ଚ କରେ ସେ ବାବଦରେ ସମ୍ପୂର୍ଣ୍ଣ ତଥ୍ୟ ଉଲ୍ଲେଖ ରହିଛି । ଆରଟିଆଇରେ ପଚରାଯାଇଥିବା ପ୍ରଶ୍ନର ଉତ୍ତର ଜାଣିବା ପାଇଁ ଦେଶର ସମସ୍ତ ମୁଦ୍ରାଶାଳକୁ ଏନେଇ ଚିଠି ଲେଖିଥିଲା ଆରବିଆଇ । ଏହାର ଜବାବରେ ମୁମ୍ବାଇ ଟଙ୍କାଶାଳ ପକ୍ଷରୁ କୁହାଯାଇଥିଲା ଯେ, ଏବେ ଦେଶରେ ୧ ଟଙ୍କା, ୨ ଟଙ୍କା, ୫ ଟଙ୍କା ଓ ୧୦ ଟଙ୍କାର ନିର୍ମାଣ କରାଯାଉଛି । ଏପରିକି ବିଗତ ୫ ବର୍ଷ ମଧ୍ୟରେ କେତେ ଖୁଚୁରା ଟଙ୍କା ନିର୍ମାଣ କରାଯାଇଛି ତାହାର ସମ୍ପୂର୍ଣ୍ଣ ତଥ୍ୟ ଦେଇଛି ମୁମ୍ବାଇ ଟଙ୍କାଶାଳା ।
ତେବେ ଏହି କଏନ ନିର୍ମାଣରେ କେତେ ଟଙ୍କା ଖର୍ଚ୍ଚ ହେଉଛି ସେନେଇ କୌଣସି ସୂଚନା ଦେବାକୁ ମନା କରିଥିଲା ମୁମ୍ବାଇ ଟଙ୍କାଶାଳା । କିନ୍ତୁ ହାଇଦ୍ରାବାଦ ଟଙ୍କାଶାଳ ପକ୍ଷରୁ ଏନେଇ ସମସ୍ତ ସୂଚନା ଦିଆଯାଇଛି । ୧ ଟଙ୍କାର କଏନ ନିର୍ମାଣ ପାଇଁ ୧.୧୧ ଟଙ୍କା ଖର୍ଚ୍ଚ ହେଉଥିବା ବେଳେ ୨ ଟଙ୍କା କଏନ ପାଇଁ ୧.୨୮ ଟଙ୍କା ଖର୍ଚ୍ଚ କରିବାକୁ ପଡିଥାଏ । ସେହିଭଳି ୫ ଟଙ୍କାର କଏନ ପାଇଁ ୩.୬୯ ଟଙ୍କା ଓ ନୂଆ ଧାତୁରେ ନିର୍ମାଣ ହେଉଥିବା ୧୦ ଟଙ୍କିଆ କଏନ ପାଇଁ ୫.୫୪ ଟଙ୍କା ଖର୍ଚ୍ଚ ହେଉଥିବା କହିଛି ହାଇଦ୍ରାବାଦ ଟଙ୍କାଶାଳ ।