ଆହୁରି ବଢିବ ପେଟ୍ରୋଲ, ଡିଜେଲ ଦର , କାରଣ ଜାଣନ୍ତୁ
ନୂଆଦିଲ୍ଲୀ : ନରେନ୍ଦ୍ର ମୋଦିଙ୍କ ସୌଭାଗ୍ୟ ଯେ ୨୦୧୪ ରେ ସେ ପ୍ରଧାନମନ୍ତ୍ରୀ ହେବାଠାରୁ ୨୦୧୭ ପର୍ଯ୍ୟନ୍ତ ବିଶ୍ୱ ବଜାରରେ ତେଲଦର କମ ଥିଲା । କିନ୍ତୁ ଏବେ ମୋଦିଙ୍କ ପାଇଁ କଠିନ ସମୟ ଆସୁଛି । କାରଣ ଅଶୋଧିତ ତୈଳ ଦର ଧୀରେ ଧୀରେ ବଢିବାକୁ ଲାଗିଛି । ବିଶ୍ୱ ବଜାରରେ ବ୍ରେଣ୍ଟ କ୍ରୁଡ ଅଏଲ ବ୍ୟାରେଲ ପିଛା ଏବେ ୭୫ ଡଲାରକୁ ଛୁଇଁଛି । ଆଗକୁ ଏହା ୮୫ ଡଲାର ପର୍ଯ୍ୟନ୍ତ ଯିବାର ସମ୍ଭାବନା ରହିଛି । ୨୦୧୬ ଜାନୁୟାରୀରେ ତେଲଦର ମାତ୍ର ୨୭ ଡଲାରକୁ ଖସିଆସିଥିଲା । ଏଣୁ ଭାରତରେ ପେଟ୍ରୋଲ ଓ ଡିଜେଲ ଦର ଆହୁରି ବଢିବାର ଆଶଙ୍କା ରହିଛି । ଏବେ ଦେଶରେ ପେଟ୍ରୋଲ ଦର ୭୪ ଟଙ୍କା ଛୁଇଁଲାଣି । ଡିଜେଲ ଦର ମଧ୍ୟ ୭୦ ଛୁଇଁବ ଛୁଇଁବ ହେଉଛି । ଆଗକୁ ବିଭିିନ୍ନ ରାଜ୍ୟରେ ବିଧାନସଭା ନିର୍ବାଚନ ଓ ତାପରେ ସାଧାରଣ ନିର୍ବାଚନ ଥିବାରୁ ତେଲଦର ବଢିବା ସରକାରଙ୍କ ପାଇଁ ଚିନ୍ତାର କାରଣ ହୋଇଛି ।
Sambad is now on WhatsApp
Join and get latest news updates delivered to you via WhatsApp
ଦୁଇବର୍ଷ ତଳେ ତଲଦର କମିବାର କାରଣ ଥିଲା ତେଲ ଉତ୍ପାଦନର ମାତ୍ରାକୁ ନେଇ ତେଲ ଉତ୍ପାଦନକାରୀ ଦେଶ ସମୂହଙ୍କ ସଂଘ ଓପେକ୍ର ଥିବା ଅସହମତି । ଏହା ସହିତ ଆମେରିକାରେ ସେଲ ଗ୍ୟାସର ପ୍ରଚୁର ଉତ୍ପାଦନ ମଧ୍ୟ ଚାହିଦା କମାଉଥିଲା । କିନ୍ତୁ ଏବେ ଉତ୍ପାଦନକୁ ସୀମାବଦ୍ଧ କରିବାକୁ ଓପେକ ଦେଶମାନେ ରାଜି ହୋଇଥିବାରୁ ତେଲଦର ବଢିଚାଲିଛି । ଆହୁରିମଧ୍ୟ ଇରାନ ଉପରେ ଆମେରିକା ଆର୍ଥିକ କଟକଣା ଲଗାଇବ ବୋଲି ସଂକେତ ଦେବା ପରେ ତାହାର ପ୍ରଭାବ ଅଶୋଧିତ ତେଲଦର ଉପରେ ପଡୁଛି । ଆମେରିକା ଇରାନ ଉପରେ କଟକଣା ଲଗାଇଲେ ଅନେକ ଦେଶ ଇରାନଠାରୁ ତେଲ କିଣିପାରିବେ ନାହିଁ । ଏହା ଫଳରେ ଯୋଗାଣ କମିବ କିନ୍ତୁ ଚାହିଦା ବଢିବ ଯାହାକି ଦର ବଢାଇବ ।