ନୂଆଦିଲ୍ଲୀ : କଥାରେ ଅଛି ଚୋର ଗଲା ପରେ ବୁଦ୍ଧି ପଛେ । ଆମ ସରକାରଙ୍କ କ୍ଷେତ୍ରରେ ଏକଥା ପ୍ରମାଣିତ ହେବାକୁ ଯାଉଛି । ବିଜୟ ମାଲ୍ୟା, ଲଲିତ ମୋଦି , ନିରବ ମୋଦି ଆଦି ଦେଶର ବଡ଼ ବଡ଼ ବ୍ୟବସାୟୀମାନେ ବିପୁଳ ପରିମାଣରେ ବ୍ୟାଙ୍କ ଋଣ ନେଇ ବିଦେଶ ପଳାଇଯାଉଥିବାରୁ ସରକାରଙ୍କ ଚିନ୍ତା ପସିଛି । ଆଗକୁ ଯେପରି ଏପରି ନ ହୁଏ ସେଥିପାଇଁ କେତେକ ପଦକ୍ଷେପ ନେବାକୁ ସରକାର ଯୋଜନା ପ୍ରସ୍ତୁତ କରୁଛନ୍ତି ।
ରିଜର୍ଭ ବ୍ୟାଙ୍କ ଓ ଫାଇନାନ୍ସିଆଲ ଇଣ୍ଟେଲିଜେନ୍ସ ୟୁନିଟ୍ ସହ ମିଳିତ ଭାବରେ ଏହି ଯୋଜନାକୁ କାର୍ଯ୍ୟକାରୀ କରାଯିବ ।
Sambad is now on WhatsApp
Join and get latest news updates delivered to you via WhatsApp
ଜଣାଯାଇଛି ଯେ ବ୍ୟାଙ୍କରୁ ବିପୁଳ ଋଣ ନେଇ ସୁଝୁନଥିବା ବିଭିନ୍ନ କମ୍ପାନିର ପ୍ରମୋଟର ମାନେ ଦେଶ ଛାଡ଼ି ଯିବା ପାଇଁ ବହୁ ପୂର୍ବରୁ ଯୋଜନା କରନ୍ତି । ଅତି କମରେ ଛଅ ମାସ ଆଗରୁ ପ୍ଲାନିଂ ହୁଏ । ଏହି ସମୟରେ ହଠାତ୍ ବିଦେଶରେ ସେହି କମ୍ପାନି ମାନଙ୍କର କାରବାର ବଢିଯାଏ । ହଓ୍ଵାଲା ମାଧ୍ୟମରେ ନିଜ ପାଖରେ ଥିବା ବିପୁଳ ଟଙ୍କା ପଠାଯାଏ । ପୁଣି ରହିବା ପାଇଁ ଏପରି ଦେଶ ସ୍ଥିର କରାଯାଏ ଯେଉଁ ଦେଶସହ ଭାରତର ପ୍ରତ୍ୟାର୍ପଣ ସନ୍ଧି ନାହିଁ । ଏସବୁ ପରେ ସମୟ ସୁବିଧା ଦେଖି ଖସି ଯାଆନ୍ତି । ଅଧିକାଂଶ ସମୟରେ ସେମାନେ ଦେଶରୁ ଖସିଯିବାପରେ ହିଁ ଠକେଇ ବା ଅନାଦେୟ ଋଣ କଥା ଜଣାପଡେ ।
ସରକାର କରୁଥିବା ଯୋଜନା ଅନୁସାରେ ବିଭିନ୍ନ କମ୍ପାନିର ବିଦେଶୀ କାରବାର ଉପରେ ନଜର ରଖାଯିବ । ରିଜର୍ଭ ବ୍ୟାଙ୍କ ଓ ଫାଇନାନ୍ସିଆଲ ଇଣ୍ଟେଲିଜେନ୍ସ ୟୁନିଟ୍ ଏସବୁ କାରବାର ଉପରେ ନଜର ରଖିବେ ଓ ସଂଦେହ ହେଲେ ସରକାରଙ୍କୁ ସତର୍କ କରାଇଦେବେ । ଅଧିକ ସଂଦେହ ହେଲେ ସେମାନଙ୍କ ପାସପୋର୍ଟକୁ ଜବତ କରିଦିଆଯିବ ।