କୋଚିରେ ଖୋଲିଲା ଭାରତର ପ୍ରଥମ କ୍ୟାସିୟର ଫ୍ରି ସ୍ମାର୍ଟ ସୁପରମାର୍କେଟ, ଜିନିଷ କିଣିବା ପରେ ଧାଡ଼ି ବାନ୍ଧି ଦେବାକୁ ପଡ଼ିବ ନାହିଁ ଟଙ୍କା,ଜାଣନ୍ତୁ କ’ଣ ରହିଛି ସୁବିଧା
କୋଚି : କେରଳର କୋଚିରେ ଭାରତର ପ୍ରଥମ କ୍ୟାସିୟର ଫ୍ରି ସ୍ମାର୍ଟ ଷ୍ଟୋରର ଆରମ୍ଭ କରାଯାଇଛି । ଏହି ଷ୍ଟୋରକୁ ଯାଇ ଆପଣମାନେ ଜିନିଷ କିଣି ସାରିବା ପରେ ଟଙ୍କା ନ ଦେଇ ଘରକୁ ଆସି ପାରିବେ । କିଣିଥିବା ଜିନିଷର ଟଙ୍କା ଦେବା ପାଇଁ ଆପଣଙ୍କୁ ଘଣ୍ଟା ଘଣ୍ଟା ଧାଡ଼ି ବାନ୍ଧି ଠିଆ ହେବାକୁ ପଡ଼ିବ ନାହିଁ । ଆମେରିକାରେ ଥିବା ଆମାଜନ୍ ଗୋ ଷ୍ଟୋରରୁ ଅନୁପ୍ରାଣିତ ହୋଇ ଏହାକୁ ପ୍ରଥମ ଥର ପାଇଁ ଭାରତରେ ଖୋଲା ଯାଇଥିବା ବେଳେ ଧିରେ ଧିରେ ଏହା ଭାରତର ଅନ୍ୟ ରାଜ୍ୟରେ ମଧ୍ୟ ଖୋଲାଯିବ ବୋଲି ଜଣା ପଡ଼ିଛି । ଏହି ଷ୍ଟୋରରୁ ଜିନିଷ କିଣି ଆସିବା ପରେ ଆପଣମାନଙ୍କ ଆକାଉଣ୍ଟରୁ କିଣିଥିବା ଜିନିଷର ଟଙ୍କା ଆପେ ଆପେ କଟିଯିବ ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, କୋଚିରେ ଖୋଲା ଯାଇଥିବା ଓ୍ଵାଟାସେଲ୍ ଷ୍ଟୋରରୁ ଜିନିଷ କିଣିବା ପାଇଁ ହେଲେ ଗ୍ରାହକମାନଙ୍କୁ ଓ୍ଵାଟାସେଲ୍ର ଆପ୍କୁ ଡ଼ାଉନ୍ଲୋଡ଼ କରିବାକୁ ହେବ । ଏହା ପରେ ନିଜର ଇ-ମେଲ୍ ଆଇଡ଼ି ଏବଂ ଫୋନ ନମ୍ବର ଦେଇ ଆପ୍ରେ ଗ୍ରାହକମାନଙ୍କୁ ରେଜିଷ୍ଟର କରିବାକୁ ହେବ । ରେଜିଷ୍ଟର କରିବା ପରେ ଗ୍ରାହକମାନଙ୍କ ପାଖକୁ ଏକ କ୍ୟୁଆର୍(QR)କୋଡ଼୍ ଆସିବ । ଯାହାକୁ ସେମାନେ ଓ୍ଵାଟାସେଲ୍ ଷ୍ଟୋର ମଧ୍ୟରେ ପ୍ରବେଶ କରିବା ପାଇଁ ବ୍ୟବହାର କରି ପାରିବେ । ଓ୍ଵାଟାସେଲ୍ ଷ୍ଟୋର ଭିତରକୁ ଯିବା ପାଇଁ ଗ୍ରାହକଙ୍କୁ ଏହି କ୍ୟୁଆର୍ କୋଡ଼୍ ସ୍କାନ୍ କରିବାକୁ ପଡ଼ିବ । ଯାହା ପରେ ସେମାନେ ଭିତରକୁ ଯାଇ ଜିନିଷ କିଣି ପାରିବେ । ଓ୍ଵାଟାସେଲ୍ ଷ୍ଟୋରର ଛାତରେ କ୍ୟାମେରା ଏବଂ ଥାକରେ ସେନ୍ସରର ବ୍ୟବସ୍ଥା ରହିଛି, ଯାହା ଗ୍ରାହାକଙ୍କ ଗତିବିଧି ଉପରେ ନଜର ରଖିବ । ସେମାନେ କେଉଁ ଜିନିଷ ଟ୍ରଲିରେ ରଖିଲେ,ତାହାର ଦାମ୍ କେତେ ଏବଂ କେଉଁ ଜିନିଷକୁ ଦେଖି ପୁଣି ଥାକରେ ରଖିଦେଲେ ସେ ସବୁ ଉପରେ ନଜର ରଖିବ କ୍ୟାମେରା । ସେନ୍ସର ଦ୍ୱାରା ଜିନିଷର ଦାମ୍ ଜଣା ପଡ଼ିଯିବା ପରେ ଗ୍ରାହକ କେତେ ଟଙ୍କାର ଜିନିଷ କିଣିଲେ ସେ ସବୁ ଆପେ ଆପେ ଗ୍ରାହକଙ୍କ ଆକାଉଣ୍ଟରୁ କଟିଯିବ ।