ଏହି ଉପକରଣ ଲାଗିଲେ ଘରର ସାଧାରଣ ଟିଭି ବନିଯିବ ସ୍ମାର୍ଟଟିଭି
ନୂଆଦିଲ୍ଲୀ: ଘରେ ଲାଗିଥିବା ଟିଭି ଏବେ ସ୍ମାର୍ଟ ଟିଭିରେ ବଦଳି ଯିବ | ଚୀନର କମ୍ପାନୀ ସାଓମି ଆଜି ଭାରତରେ ଏମିତି ଏକ ଉପକରଣ ଲଞ୍ଚ କରିଛି, ଯାହାକି ଏହି କାମ ସହଜରେ କରିଦେବ | ମି ବକ୍ସ ୪କେ ନାମରେ ଲଞ୍ଚ ହୋଇଥିବା ଏହି ଉପକରଣ ମାଧ୍ୟମରେ ସାଧାରଣ ଟିଭି ସ୍ମାର୍ଟ ଟିଭିରେ ରୂପାନ୍ତରିତ ହୋଇପାରିବ | ଏହା ଭାରତୀୟ ବଜାରରେ ଆମାଜନ ଫାୟାର ଷ୍ଟିକ ସହିତ ପ୍ରତିଦ୍ୱନ୍ଦ୍ୱିତା କରିବ। ମି ବକ୍ସର ମୂଲ୍ୟ ୩,୪୯୯ ଟଙ୍କା ଥିବାବେଳେ ଏହାର ବିକ୍ରି ମେ ୧୦ରୁ ଆରମ୍ଭ ହେବ | ମି ବକ୍ସ ୪କେରେ ଏଚଡ଼ି, ଫୁଲ ଏଚଡ଼ିର ସପୋର୍ଟ ରହିଛି |
Sambad is now on WhatsApp
Join and get latest news updates delivered to you via WhatsApp
ଏହାକୁ ଷ୍ଟାଣ୍ଡାର୍ଡ ଟିଭି ସହିତ ସଂଯୋଗ କରି ଆପଣ ନେଟଫ୍ଲିକ୍ସ, ଆମାଜନ ପ୍ରାଇମ ଏବଂ ହଟଷ୍ଟାର ଠାରୁ ଆରମ୍ଭ କରି ଆପଣଙ୍କ ଟିଭିରେ ଅନେକ ଗେମ ଖେଳିପାରିବେ | କମ୍ପାନୀ କହିଛି ଯେ ଏଥିରେ ୫୦୦୦ ରୁ ଅଧିକ ଆପ୍ ଏବଂ ଗେମ୍ ଦିଆଯାଇଛି। ମି ବକ୍ସରେ ୬୪-ବିଟ୍ ୨.୦ ଜିଗା ହର୍ଜ କ୍ୱାଡ୍ କୋର ପ୍ରୋସେସର୍ ଅଛି |
ମି ବକ୍ସର ବିଶେଷତା ହେଉଛି ଯେ ଏଥିରେ ଗୁଗୁଲ୍ ଆସିଷ୍ଟାଣ୍ଟ ଦିଆଯାଇଛି, ଯାହା ମାଧ୍ୟମରେ ଆପଣ ଭଏସ୍ କମାଣ୍ଡ ମାଧ୍ୟମରେ ଟିଭି ମଧ୍ୟ ଚଲାଇପାରିବେ | ଏହା ଛଡା ଆପଣ ଏକ ପେନ୍ ଡ୍ରାଇଭ୍ ବ୍ୟବହାର କରି ଚଳଚ୍ଚିତ୍ର ମଧ୍ୟ ଦେଖିପାରିବେ | ସାଓମି ଏହା ମଧ୍ୟ ଦାବି କରିଛି ଯେ ଗୁଗୁଲର ନୂତନ ଡାଟା ସେଭର୍ ଟେକ୍ନୋଲୋଜି ପ୍ରଦାନ କରୁଥିବା ଏହା ହେଉଛି ପ୍ରଥମ କମ୍ପାନୀ। ଏହି କାରଣରୁ ଉପଭୋକ୍ତାମାନେ କମ୍ ଡାଟାରେ ଅଧିକ ଭିଡିଓ ଷ୍ଟ୍ରିମ୍ କରିବାକୁ ସମର୍ଥ ହେବେ।