ଭୁବନେଶ୍ବର,: ଦେଶର ମୋଟ ଖଣିଜ ଉତ୍ପାଦନରେ ଓଡ଼ିଶାର ଯୋଗଦାନ ୧୪ ପ୍ରତିଶତ। ରାଜ୍ୟ ସରକାର ଖଣିଜ ସାମଗ୍ରୀର ଉତ୍ପାଦନ ସହିତ ସେଗୁଡ଼ିକର ମୂଲ୍ୟଯୋଗ ଉପରେ ଗୁରୁତ୍ବ ଦେଇଆସୁଛନ୍ତି। ଦେଶର ମୋଟ ଆଲୁମିନିୟମ ସ୍ମେଲ୍ଟିଂ କ୍ଷମତାର ୫୪% ଓଡ଼ିଶାରେ ରହିଥିବାରୁ ଆମ ରାଜ୍ୟ ଦକ୍ଷିଣ ଏସିଆର ଆଲୁମିନିୟମ ହବ୍ରେ ପରିଣତ ହୋଇଛି। ମେକ୍ ଇନ୍ ଓଡ଼ିଶା କନକ୍ଲେଭ-୨୦୧୮ରେ ଆୟୋଜିତ ଧାତବ କ୍ଷେତ୍ରର ଆନୁଷଙ୍ଗିକ ଶିଳ୍ପ ଶୀର୍ଷକରେ ଅନୁଷ୍ଠିତ ଆଲୋଚନାଚକ୍ରରେ ଯୋଗଦେଇ ଶିଳ୍ପମନ୍ତ୍ରୀ ଅନନ୍ତ ଦାସ କହିଛନ୍ତି। ରାଜ୍ୟରେ ଇସ୍ପାତ, ଆଲୁମିନିୟମର ମୂଲ୍ୟଯୋଗ ପାଇଁ କଳିଙ୍ଗନଗର, ଅନୁଗୁଳ ଓ ଝାରସୁଗୁଡ଼ାଠାରେ ଆନୁଷଙ୍ଗିକ ଶିଳ୍ପ ପାର୍କ ସ୍ଥାପନ ହେଉଛି। ମୌଳିକ ଧାତବ ଶିଳ୍ପରେ ମୂଲ୍ୟଯୋଗ ମାତ୍ରା ୫୦%ରୁ ଅଧିକ କରିବା ପାଇଁ ‘ଭିଜନ ୨୦୩୦: ଆନୁଷଙ୍ଗିକ ୟୁନିଟର ବିକାଶ’ ନେଇ ନକ୍ସା ପ୍ରସ୍ତୁତ ହେଉଛି ବୋଲି ସେ କହିଛନ୍ତି। ଏହି କାର୍ଯ୍ୟକ୍ରମରେ ଏସଏମଏସ ଗ୍ରୁପ୍ର ଉପସଭାପତି ମନିଷ୍ ସିହ୍ନା, ଆରଏସବି ଗ୍ରୁପ୍ର ଇଡି ନିଶିତ୍ ବେହେରା, ଶିଳ୍ପ ବିଭାଗର ଅତିରିକ୍ତ ଶାସନ ସଚିବ ଡ ନୀତିନ ଜୱାଲେ ପ୍ରମୁଖ ଉପସ୍ଥିତ ଥିଲେ। ଏହି ଅବସରରେ ଆୟୋଜିତ ଏକ ପ୍ୟାନେଲ ଆଲୋଚନାରେ ନାଲକୋ ସିଏମଡି ଡ ତପନ କୁମାର ଚାନ୍ଦ, ବେଦାନ୍ତ ସିଇଓ ସ୍ମେର୍ କାଏରି, ହିଣ୍ଡାଲକୋ ଏମଡି ସତୀଶ ପାଇ, ଭୂଷଣ ଷ୍ଟିଲ ଏମ୍ଡି ରାଜୀବ ସିଂଘଲ, ଜିନ୍ଦଲ ଷ୍ଟେନଲେସ ଏମଡି ଅଭ୍ୟୁଦୟ ଜିନ୍ଦଲ ପ୍ରମୁଖ ଓଡ଼ିଶାରେ ଆନୁଷଙ୍ଗିକ ଶିଳ୍ପର ବିଭିନ୍ନ ଦିଗ ଉପରେ ଆଲୋଚନା କରିଥିଲେ।