ମୁମ୍ବାଇ: କୌଣସି ରାଷ୍ଟ୍ରାୟତ ବ୍ୟାଙ୍କକୁ ବନ୍ଦ କରାଯିବ ନାହିଁ ବୋଲି ରିଜର୍ଭ ବ୍ୟାଙ୍କ ଶୁକ୍ରବାରଦିନ ସ୍ପଷ୍ଟ କରିଦେଇଛି । ବନ୍ଦ ବଦଳରେ ବ୍ୟାଙ୍କଗୁଡ଼ିକୁ ଆହୁରି ସୁଦୃଢ କରାଯିବ ବୋଲି ଆରବିଆଇ କହିଛି । ସେହିପରି ସରକାର ମଧ୍ୟ କହିଛନ୍ତି ଯେ ବ୍ୟାଙ୍କଗୁଡ଼ିକରେ ୨.୧୧ ଲକ୍ଷ କୋଟିର ପୁଞ୍ଜି ଭର୍ତ୍ତି କରି ସୁଦୃଢ କରାଯିବ ।
Sambad is now on WhatsApp
Join and get latest news updates delivered to you via WhatsApp
ଗତକାଲି ଗଣମାଧ୍ୟମରେ ଏକ ଖବର ପ୍ରକାଶ ପାଇଥିଲା ଯେ ବଢିଚାଲିଥିବା ଅନାଦେୟ ଋଣ (ଏନପିଏ), ଲୋ ଲେବରେଜ ରେସିଓ, ଦୂର୍ବଳ କ୍ୟାପିଟାଲ ଏଡିକ୍ୱେସି ରେସିଓ ଫଳରେ ଆରବିଆଇ ବ୍ୟାଙ୍କ ଅଫ ଇଣ୍ଡିଆ ଓ ୟୁନାଇଟେଡ୍ ବ୍ୟାଙ୍କ ଅଫ ଇଣ୍ଡିଆ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ନେଇ ବନ୍ଦ କରିଦେବ ।
କିନ୍ତୁ ଏହି ଖବରକୁ ଦୃଢଭାବେ ଖଣ୍ଡନ କରି ଆରବିଆଇ କହିଛନ୍ତି ଯେ ତୁରନ୍ତ ସଂଶୋଧିତ କାର୍ଯ୍ୟାନୁଷ୍ଠାନ(ପିସିଏ) ର ଅର୍ଥ ନୁହେଁ ବ୍ୟାଙ୍କ ବନ୍ଦ କରିଦେବା । ବ୍ୟାଙ୍କଗୁଡିକର ଆର୍ଥିକ ଅବସ୍ଥାକୁ ସୁଦୃଢ କରିବାକୁ ତା ପାଖରେ ବିଭିନ୍ନ ବିକଳ୍ପ ରହିଛି । ପିସିଏ ମାଧ୍ୟମରେ ବ୍ୟାଙ୍କଗୁଡିକର ପ୍ରଦର୍ଶନକୁ ବିଭିନ୍ନ ମାନଦଣ୍ଡରେ ପରଖାଯାଏ । ଏହି ମାନଦଣ୍ଡ ତଳକୁ ଖସିଲେ ସଂପୃକ୍ତ ବ୍ୟାଙ୍କମାନଙ୍କୁ ସତର୍କ କରାଇଦିଆଯାଏ ।
ସରକାରଙ୍କ ତରଫରୁ ଅର୍ଥ ସେବା ସଚିବ ରାଜୀବ କୁମାର କହିଛନ୍ତି ଯେ ଗୁଜବ ସୃଷ୍ଟିକାରୀଙ୍କୁ ବିଶ୍ୱାସ କରନ୍ତୁ ନାହିଁ । ବ୍ୟାଙ୍କଗୁଡ଼ିକରେ ୨.୧୧ ଲକ୍ଷ କୋଟିର ପୁଞ୍ଜି ଭର୍ତ୍ତି କରି ସୁଦୃଢ କରାଯିବ ବୋଲି ସେ କହିଛନ୍ତି ।