ଭୁବନେଶ୍ୱର: ଚଳିତ ବଜେଟରେ ରେଳ ମନ୍ତ୍ରାଳୟ ପକ୍ଷରୁ ଓଡ଼ିଶା ପାଇଁ ୫୨୫୨ କୋଟି ଟଙ୍କାର ବ୍ୟୟ ବରାଦ କରାଯାଇଛି । ଏହା ଗତ ବର୍ଷର ବ୍ୟୟ ବରାଦ ୫୧୦୨ କୋଟି ଟଙ୍କା ତୁଳନାରେ ମାତ୍ର ୨.୯ ପ୍ରତିଶତ ଅଧିକ । କିନ୍ତୁ ଏବର୍ଷ ରେଳ ବଜେଟରେ ଓଡ଼ିଶା ସରକାର ୬୫୦୦ କୋଟି ଟଙ୍କା ଦାବି କରିଥିଲେ । ବ୍ୟୟବରାଦ ହୋଇଥିବା ଏହି ୫୨୫୨ କୋଟି ମଧ୍ୟରୁ ନୂଆ ଲାଇନ ପ୍ରକଳ୍ପ ପାଇଁ ୪୭୭ କୋଟି ଟଙ୍କା ଓ ଦୋହରୀକରଣ ପାଇଁ ୧୫୦ କୋଟି ଟଙ୍କା ଓ ଯାତ୍ରୀ ସୁବିଧା ପାଇଁ ୫୮ କୋଟି ଟଙ୍କାର ବ୍ୟୟ ବରାଦ ହୋଇଛି ।
Sambad is now on WhatsApp
Join and get latest news updates delivered to you via WhatsApp
ସାମଗ୍ରିକ ଭାବେ ପୂର୍ବତଟ ରେଳବାଇ ପାଇଁ ବଜେଟ୍ରେ ମୋଟ ୬୫୬୩ କୋଟି ଟଙ୍କାର ବ୍ୟୟବରାଦ କରାଯାଇଛି ବୋଲି ପୂର୍ବତଟ ରେଳବାଇ ପକ୍ଷରୁ ଘୋଷଣା କରାଯାଇଛି । ଆଜି ଅପରାହ୍ନରେ ପୂର୍ବତଟ ରେଳବାଇ ପକ୍ଷରୁ କରାଯାଇଥିବା ଏକ ସାମ୍ବାଦିକ ସମ୍ମିଳନୀରେ ଘୋଷଣା କରାଯାଇଛି ଯେ ରାଜ୍ୟରେ ରେଳ ପ୍ରକଳ୍ପ ଗୁଡିକ ପାଇଁ ଅର୍ଥର ଅଭାବ ରହିବ ନାହିଁ । ସବୁ ଲାଇନର ବିଦ୍ୟୁତକରଣ କରାଯିବ ଓ ସବୁ ଷ୍ଟେସନର ଉନ୍ନତି କରାଯିବ ।
ତେବେ ସବୁ ବର୍ଷ ପରି ଏ ବର୍ଷ ରେଳବାଇ ତରଫରୁ ଓଡ଼ିଶାକୁ ଉପେକ୍ଷା କରାଯାଇଛି ବୋଲି ବିଜେଡ଼ି ଓ କଂଗ୍ରେସ ପକ୍ଷରୁ ଅଭିଯୋଗ କରାଯାଇଛି । ରେଳବାଇ ଓଡ଼ିଶାରୁ ପ୍ରାୟ ୧୫୦୦ କୋଟି ଟଙ୍କାର ରାଜସ୍ୱ ପାଉଥିବା ସତ୍ତ୍ୱେ ସେହି ଅନୁପାତରେ ଅନୁଦାନ ମିଳୁନାହିଁ ବୋଲି ବରିଷ୍ଠ କଂଗ୍ରେସ ନେତା ନିରଂଜନ ପଟ୍ଟନାୟକ କହିଛନ୍ତି । ରାଜ୍ୟରେ ରେଳ ଭିତ୍ତିଭୂମିର ବିକାଶ ଲାଗି ରାଜ୍ୟ ଓ କେନ୍ଦ୍ର ସରକାର ଉଭୟଙ୍କର ଆନ୍ତରିକତା ନାହିଁ ବୋଲି ସେ କହିଛନ୍ତି ।
ଅନ୍ୟପକ୍ଷରେ ଏନଡିଏ ସରକାର ଓଡ଼ିଶାରେ ରେଳବାଇର ବିକାଶ କ୍ଷେତ୍ରରେ ପ୍ରତିଶୃତିବଦ୍ଧ ବୋଲି ରାଜ୍ୟ ବିଜେପି ପକ୍ଷରୁ କୁହାଯାଇଛି । ୟୁପିଏ ସରକାରଙ୍କ ଅମଳରେ ରେଳବାଇ ଅନୁଦାନ ଚାରି ଅଙ୍କ ଛୁଉଁନଥିଲା ବୋଲି ଦଳ କହିଛି ।
Budget Provision for Odisha in #Budget2018 #NewRailway4NewIndia pic.twitter.com/lKVslKj8HF
— Ministry of Railways (@RailMinIndia) February 6, 2018
ରେଳମନ୍ତ୍ରାଳୟର ସୂଚନା ଅନୁସାରେ ରାଜ୍ୟ ବର୍ତ୍ତମାନ ୩୬ଟି ରେଳ ପକଳ୍ପ ନିର୍ମାଣ କାର୍ଯ୍ୟ ଜାରି ରହିଛି । ୪୩, ୭୫୧ କୋଟି ବ୍ୟୟବରାଦରେ ପ୍ରାୟ ୪,୭୫୦ କିଲୋମିଟରର ରେଳ ପ୍ରକଳ୍ପ କାମ ଚାଲୁଛି । ଏଥିପାଇଁ ରାଜ୍ୟକୁ ୫୨୫୨ କୋଟି ଟଙ୍କା କେନ୍ଦ୍ରୀୟ ଅନୁଦାନ ମିଳିଛି । ୨୦୦୯ରୁ ୨୦୧୪ ମଧ୍ୟରେ ଅର୍ଥାତ ୟୁପିଏ ଶାସନ ଅମଳରେ ଓଡ଼ିଶାକୁ ରେଳ ବଜେଟରେ ହାରାହାରି ବାର୍ଷିକ ୮୩୮ କୋଟି ଟଙ୍କା ଅନୁଦାନ ମିଳୁଥିଲା । ମାତ୍ର ଏନଡିଏ ସରକାର ଅମଳରେ ଆର୍ଥିକ ବର୍ଷ ୨୦୧୮-୧୯ରେ ଓଡ଼ିଶାକୁ ମଳିଥିବା ଅନୁଦାନକୁ ତୁଳନା କଲେ ୫୨୭ ପ୍ରତିଶତ ବୃଦ୍ଧି ପାଇଛି ବୋଲି ରେଳ ମନ୍ତ୍ରାଳୟ କହିଛି ।
ଏଠାରେ ସୂଚାନଯୋଗ୍ୟ, ରାଜ୍ୟର ସବୁ ଜିଲ୍ଲାକୁ ରେଳ ସଂଯୋଗ କରିବାକୁ ଦାବି କରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଜାନୁୟାରୀ ୧୭ ତାରିଖରେ ରେଳ ମନ୍ତ୍ରାଳୟକୁ ଚିଠି ଲେଖିଥିଲେ । ବଜେଟରେ ଓଡିଶାକୁ ୬୫୦୦ କୋଟି ଟଙ୍କାର ଅନୁଦାନ ଦେବା ଲାଗି ମୁଖ୍ୟମନ୍ତ୍ରୀ ଚିଠିରେ ଦାବି କରିଥିଲେ ।