ଦେଶ ବିରୋଧୀ କାମ କରୁଥିବାରୁ ‘ହେଲୋ’ ଓ ‘ଟିକ୍ ଟକ୍’ ଆପ୍କୁ ସରକାରଙ୍କ ନୋଟିସ: ୨୧ଟି ପ୍ରଶ୍ନର ଉତ୍ତର ନ ଦେଲେ ଲାଗିପାରେ ପ୍ରତିବନ୍ଧକ
ନୂଆଦିଲ୍ଲୀ : ପୁଣି ଚର୍ଚ୍ଚାରେ ମ୍ୟୁଜିକାଲ ଆପ୍ ଟିକ୍-ଟକ୍ । କିଛି ମାସ ତଳେ ଏହି ଆପ୍ ବ୍ୟବହାର ଦ୍ୱାରା ଯୁବକ-ଯୁବତୀମାନଙ୍କ ଜୀବନ ଯାଉଥିବା ଦେଖି ଏହାର ବ୍ୟବହାର ଉପରେ ପ୍ରତିବନ୍ଧକ ଲଗା ଯାଇଥିଲା । କିନ୍ତୁ ଏହାକୁ କିଛି ଦିନ ପରେ ହଟାଇ ଦିଆଯାଇଥିଲା । ଏବେ ପୁଣି ଥରେ ପ୍ରତିବନ୍ଧକ ଭଳି ସମସ୍ୟାର ସାମ୍ନା କରିବାକୁ ଯାଉଛି ଟିକ୍ ଟକ୍ ଆପ୍ । ଟିକ୍ ଟକ୍ ଆପ୍ ସହ ହେଲୋ ଆପ୍କୁ ମଧ୍ୟ ସରକାରଙ୍କ ତରଫରୁ ନୋଟିସ ପଠାଯାଇଛି । ଜୁଲାଇ ୨୨ ତାରିଖ ପୂର୍ବରୁ ନୋଟିସରେ ପଚରାଯାଇଥିବା ୨୧ଟି ପ୍ରଶ୍ନର ଉତ୍ତର ନ ଦେଇ ପାରିଲେ ଏହି ଦୁଇଟି ଆପ୍ ଉପରେ ପ୍ରତିବନ୍ଧକ ଲାଗିବ ବୋଲି ଜଣା ପଡ଼ିଛି । ଦୁଇଟି ଆପ୍ ଜରିଆରେ ଦେଶ ବିରୋଧୀ କାର୍ଯ୍ୟକଳାପ କରାଯାଉଥିବା ଦେଖି ଏଭଳି ନୋଟିସ ଜାରି କରିଛନ୍ତି ସରକାର ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ରାଷ୍ଟ୍ରୀୟ ସ୍ୱୟଂସେବକ ସଂଘ ସ୍ୱଦେଶୀ ଜାଗରଣ ମଞ୍ଚ ପ୍ରଧାନମନ୍ତ୍ରୀଙ୍କୁ ପତ୍ର ପଠାଇ ଦୁଇଟି ଆପ୍ ବିରୋଧରେ ଅଭିଯୋଗ କରିଥିଲେ । ଦୁଇଟି ଆପ୍ ଜରିଆରେ ଦେଶ ବିରୋଧୀ କାର୍ଯ୍ୟକଳାପ କରାଯାଉଥିବା ନେଇ ଅଭିଯୋଗ ହେବା ପରେ ଇଲେକ୍ଟ୍ରୋନିକ୍ସ ମନ୍ତ୍ରାଳୟ ତରଫରୁ ନୋଟିସ ଜାରି କରାଯାଇ ୨୧ଟି ପ୍ରଶ୍ନର ଉତ୍ତର ମଗା ଯାଇଛି । ଉତ୍ତର ଦେବାରେ ବିଫଳ ହେଲେ ଦୁଇଟି ଆପ୍ ଉପରେ ଭାରତରେ ପ୍ରତିବନ୍ଧକ ଲଗାଇ ଦିଆଯିବ ।