ମହିଳାଙ୍କ ହତ୍ୟାର ୭ବର୍ଷ ପରେ ସାମ୍ନାକୁ ଆସିଲା ଆଶ୍ଚର୍ଯ୍ୟ କଲା ଭଳି ସତ, ନ୍ୟାୟ ଦେବା ପାଇଁ ଲଢ଼ୁଥିବା ଓକିଲ ହିଁ ଥିଲେ ହତ୍ୟାକାରୀ
ନୂଆଦିଲ୍ଲୀ : ମୃତ୍ୟୁର ରହସ୍ୟ ଉପରୁ ପରଦା ଉଠିବା ଏବଂ ଶେଷରେ ଦୋଷୀ ଦଣ୍ଡ ପାଇବାର କାହାଣୀ ଆମେ ଫିଲ୍ମ ଏବଂ ଅନେକ ଧାରାବାହିକରେ ଦେଖିଛେ । ସେ ମଧ୍ୟରୁ କିଛି ଏମିତି ମଧ୍ୟ କାହାଣୀ ରହିଛି,ଯେଉଁଥିରେ ଶେଷ ପର୍ଯ୍ୟନ୍ତ ହତ୍ୟାକାରୀ କିଏ ତାହା ଜଣା ପଡ଼ି ନଥାଏ । ସାଧୁର ମୁଖା ପିନ୍ଧି ବୁଲୁଥିବା ଲୋକଟି ହିଁ ଅସଲ ଅପରାଧୀ ବୋଲି ଫିଲ୍ମର ଶେଷରେ ଜଣା ପଡ଼ିଥାଏ । କିନ୍ତୁ ସେଭଳି ଘଟଣା ଏବେ ଅସଲ ଜୀବନରେ ଘଟିଥିବା ଦେଖା ଯାଇଛି । ଦିଲ୍ଲୀରେ ଜଣେ ମୃତକଙ୍କ ମାମଲା ଲଢ଼ୁଥିବା ଓକିଲ ହିଁ ତାଙ୍କ ହତ୍ୟାକାରୀ ଥିଲେ ବୋଲି ୭ବର୍ଷର ଲମ୍ବା ବ୍ୟବଧାନ ପରେ ସାମ୍ନାକୁ ଆସିଛି ।
୭ ବର୍ଷ ତଳେ ଜଣେ ମହିଳାଙ୍କ ଶବ ବ୍ୟାଗ୍ ଭିତରେ ପୁଲିସକୁ ମିଳିଥିଲା । କିନ୍ତୁ ଘଟଣାକୁ ୭ବର୍ଷ ବିତିଯିବା ପରେ ମଧ୍ୟ ଅସଲ ଅପରାଧୀ କିଏ ତାହା ଜଣା ପଡ଼ି ପାରି ନ ଥିଲା । ୭ବର୍ଷ ପରେ ଦିଲ୍ଲୀ କ୍ରାଇମ୍ ବ୍ରାଞ୍ଚ ଡିସେମ୍ବର ୧୮,୨୦୧୧ର ମାମଲାର ପୁନଃ ତଦନ୍ତ କରି ଅଭିଯୁକ୍ତ ଓକିଲ ଏବଂ ତାଙ୍କର ଦୁଇ ସହଯୋଗୀଙ୍କୁ ଗିରଫ କରିଛି ।
ଅତିରିକ୍ତ ପୁଲିସ କମିସନର ରାଜୀବ ରଞ୍ଜନଙ୍କ କହିବା ଅନୁଯାୟୀ,ମୃତକ କିରଣ ଅଗ୍ରଓ୍ଵାଲ ନିଜର ଏକ ଜମି ଛାଡ଼ିବାକୁ ରାଜି ହେଉ ନଥିବାରୁ ତାଙ୍କ ଓକିଲ ବିରେନ୍ଦ୍ର କୁମାର ନିଜ ଦୁଇ ସହଯୋଗୀଙ୍କ ସହ ମିଶି କିରଣଙ୍କୁ ହତ୍ୟା କରିଥିଲେ ।