ବେଲଗାବି : କିଛି ଦିନ ପ୍ରେମ ସଂପର୍କରେ ରହିବା ପରେ ବିବାହର ସ୍ୱପ୍ନ ସମସ୍ତେ ଦେଖି ଥାଆନ୍ତି । କିନ୍ତୁ ଏହି ସ୍ୱପ୍ନ ଦେଖିବା ବେଲଗବି ଡ଼ାକ୍ତରଖାନାରେ କାମ କରୁଥିବା ଏହି ନର୍ସଙ୍କୁ କାଳ ହୋଇଛି । କିଛି ଦିନ ପ୍ରେମ ସଂପର୍କରେ ରହିବା ପରେ ନିଜ ପ୍ରେମିକକୁ ବିବାହ କରିବା ପାଇଁ ଚାହିଁବାରୁ ତାଙ୍କୁ ହତ୍ୟା କରାଯାଇଛି । ବାରମ୍ବାର ବିବାହ କଥା କହୁଥିବାରୁ ମୃତ ପୁନମଙ୍କ ପ୍ରେମିକ ଡ଼ାକ୍ତର ସୁନିଲ ଚୌହାନ ତାଙ୍କୁ ବୁଲାଇବାକୁ ନେଇ ଟ୍ରେନରୁ ଠେଲି ଦେଇଥିବା ଜଣାପଡ଼ିଛି । ଅନ୍ୟ ପକ୍ଷରେ ପୁଲିସ ପୁନମଙ୍କ ମୃତଦେହକୁ ଉଦ୍ଧାର କରିବା ସହ ଘଟଣାର ତଦନ୍ତ ପରେ ସୁନିଲଙ୍କୁ ଗିରଫ କରିଛି ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ବେଲଗବି ଡ଼ାକ୍ତରଖାନାରେ ଜଣେ ନର୍ସ ଭାବେ କାମ କରୁଥିବା ପୁନମଙ୍କୁ ସେହି ଡ଼ାକ୍ତରଖାନାର ଜଣେ ସୁନିଲ ଚୌହାନ ନାମକ ଡ଼ାକ୍ତରଙ୍କ ସହ ପ୍ରେମ ହୋଇ ଯାଇଥିଲା । ଦୁହେଁ ଦୁହିଁଙ୍କୁ ଭଲ ପାଇବା ସହ ପୁନମ ସୁନିଲ୍ ସାଥୀରେ ସଂସାର ଗଢ଼ିବେ ବୋଲି ସ୍ୱପ୍ନ ଦେଖିଥିଲେ । ଏହି କଥା ଦିନେ ସେ ସୁନିଲଙ୍କୁ ଜଣାଇବାରୁ ଆମ ଦୁଇ ଜଣଙ୍କର ଜାତି ଅଲଗା ଏବଂ ଆମେ କେବେ ବିବାହ କରି ପାରିବା ନାହିଁ ବୋଲି ସୁନିଲ କହିଥିଲେ । ପୁନମ ସୁନିଲଙ୍କୁ ବିବାହ ପାଇଁ ବାଧ୍ୟ କରିବା ସହ ଥରୁ ଟିଏ ଘରେ କଥା ହୁଅ ବୋଲି କହିଥିଲେ । ପୁନମ ବାରମ୍ବାର ବିବାହ କଥା କହୁଥିବାରୁ ରାଗି ଯାଇ ତାଙ୍କୁ ରାସ୍ତାରୁ ହଟାଇବା ପାଇଁ ସୁନିଲ ତାଙ୍କ ଭାଇ ସହ ହତ୍ୟାର ଯୋଜନା କରିଥିଲେ । ମାର୍ଚ୍ଚ ୧୫ରେ ପୁନମଙ୍କୁ ଗୋଆ ବୁଲାଇ ନେବା ବାହାନାରେ ଟ୍ରେନ୍ରେ ବସିଥିଲେ ପୁନମ୍, ସୁନିଲ ଏବଂ ତାଙ୍କ ଭାଇ ।
କିଛି ବାଟ ଯିବା ପରେ ସେମାନେ ପୁମନଙ୍କୁ ଚେତାଶୂନ୍ୟ କରାଇବା ସହ ଖାନ୍ପୁରର ଅଶୋଗା ନଦୀ ଦେଇ ଟ୍ରେନ ଯାଉଥିବା ବେଳେ ପୁନମଙ୍କୁ ଟ୍ରେନ୍ ବାହାରକୁ ଫିଙ୍ଗି ଦେଇଥିଲେ । ନଦୀ କୂଳରୁ ସ୍ଥାନୀୟ ପୁଲିସ ମୃତଦେହ ଉଦ୍ଧାର କରିବା ସହ ଚିହ୍ନଟ ପାଇଁ ପୁନମଙ୍କ ପରିବାରକୁ ଡ଼କାଯାଇଥିଲା । ପ୍ରଥମରୁ ଏହା ଏକ ଦୁର୍ଘଟଣା ପୁଲିସ ଭାବୁଥିବା ବେଳେ ତାଙ୍କ ଝିଅକୁ ହତ୍ୟା କରାଯାଇଛି ବୋଲି ପୁନମଙ୍କ ପରିବାର ଲୋକେ ପୁଲିସକୁ ଜଣାଇଥିଲେ । ତଦନ୍ତ କରି ସୁନିଲଙ୍କ ବିଷୟରେ ଜାଣିବା ପରେ ତାଙ୍କୁ ଡ଼ାକି ପଚରାଉଚରା କରିଥିଲା ପୁଲିସ । ଏହା ପରେ ସେ ଏବଂ ତାଙ୍କ ଭାଇ ମିଶି ଏପରି କରିଥିଲେ ବୋଲି ପୁଲିସ ଆଗରେ ସ୍ୱୀକାର କରିଥିଲେ ।