ଡାକ୍ତର ନୁହେଁ କଂସେଇ ! ପୁତ୍ରକୁ କନ୍ୟା ସାବ୍ୟସ୍ତ କରିବା ପାଇଁ ନବଜାତ ଶିଶୁର ଗୁପ୍ତାଙ୍ଗ କାଟିଲେ ଡ଼ାକ୍ତର
ରାଞ୍ଚି : ରାଞ୍ଚିରେ ଏକ ଅଭାବନୀୟ ଘଟଣା ସାମ୍ନାକୁ ଆସିଛି । ରକ୍ଷକ ସାଜିଛି ଭକ୍ଷକ । ଶିଶୁ ପୁତ୍ରକୁ ଶିଶୁ କନ୍ୟା ବୋଲି ସାବ୍ୟସ୍ତ କରିବା ପାଇଁ ନବଜାତ ଶିଶୁର ଗୁପ୍ତାଙ୍ଗ କାଟିଛନ୍ତି ଡ଼ାକ୍ତର । ଏହାର ଶିକାର ହୋଇ ନବଜାତ ଶିଶୁଟି ମୃତ୍ୟୁବରଣ କରିଥିବା ବେଳେ ଏ ନେଇ ପୁଲିସରେ ଅଭିଯୋଗ କରାଯାଇଛି । ପୁଲିସ ଅଭିଯୋଗ ଗ୍ରହଣ କରିବା ସହ ଫେରାର ଥିବା ଅଭିଯୁକ୍ତକୁ ଖୋଜିବା ଆରମ୍ଭ କରିଥିବା ଜଣାପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଗୁଡ଼ିଆ ଦେବୀ ନାମକ ଜଣେ ମହିଳା ୮ମାସର ଗର୍ଭବତୀ ଥିବା ବେଳେ ତାଙ୍କୁ ଇଟ୍ଖୋରୀର ଜୟ ପ୍ରକାଶ ନଗରରେ ଥିବା ଓମ୍ ନର୍ସିଙ୍ଗ ହୋମ୍କୁ ଅଣା ଯାଇଥିଲା । ଗୁଡ଼ିଆ ଦେବୀ ରୁଟିନ୍ ଚେକ୍-ଅପ୍ ପାଇଁ ଆସିଥିବା ବେଳେ ଡ଼ାକ୍ତର ତାଙ୍କୁ ଅଲଟ୍ରାସାଉଣ୍ଡ କରିବା ପାଇଁ କହିଥିଲେ । ଅଲଟ୍ରାସାଉଣ୍ଡ ପରେ ତାଙ୍କ ପେଟରେ ଜଣେ ଶିଶୁ କନ୍ୟା ଅଛି ବୋଲି ଡ଼ାକ୍ତର ଜଣାଇବା ସହ ଅସ୍ତ୍ରୋପଚାର କରାଯାଇ ତାକୁ ବାହାରକୁ ଅଣାଯିବ ବୋଲି ଗୁଡ଼ିଆଙ୍କ ସ୍ୱାମୀ ଅନିଲ ପଣ୍ଡାଙ୍କୁ ଜଣାଇଥିଲେ । ମଙ୍ଗଳବାର ତାଙ୍କୁ ଚିକିତ୍ସା ପାଇଁ ନିଆଯାଇଥିବା ବେଳେ ସେହି ଦିନ ରାତିରେ ତାଙ୍କର ପ୍ରସବ କରାଯାଇଥିଲା । ଜନ୍ମ ପରେ ଶିଶୁପୁତ୍ର ଜନ୍ମ ହେବାର ଦେଖି ଡ଼ାକ୍ତର ଜଣଙ୍କ ନବଜାତ ଶିଶୁର ଗୁପ୍ତାଙ୍ଗ କାଟି ଦେଇଥିଲେ । ଯାହା ଫଳରେ ଶିଶୁଟି ମୃତ୍ୟୁବରଣ କରିଥିଲା ।
ମୃତ୍ୟୁବରଣ ପରେ ଡ଼ାକ୍ତର ଅନିଲଙ୍କୁ ତାଙ୍କ ପିଲା ଜନ୍ମ ହେବା ପରେ ପରେ ତା’ର ମୃତ୍ୟୁ ହୋଇଗଲା ବୋଲି ଜଣାଇଥିଲେ । କିନ୍ତୁ ଡ଼ାକ୍ତରଙ୍କ ଏଭଳି କାମ ବିଷୟରେ ପୂର୍ବରୁ ଜାଣି ପାରିଥିବା ଗୁଡ଼ିଆ ଚେତା ଫେରିବା ପରେ ନର୍ସିଂ ହୋମ୍ରେ ପାଟି କରିବା ସହ ନିଜ ପରିବାରକୁ ପୂରା ଘଟଣା ବିଷୟରେ ଜଣାଇଥିଲେ । ମାମଲାକୁ ଶାନ୍ତ କରିବାକୁ ଯାଇ ବିଫଳ ହେବାରୁ ଡ଼ାକ୍ତର ଅନୁଜ୍ ସେଠାରୁ ଫେରାର୍ ହୋଇ ଯାଇଥିଲେ । ଏ ନେଇ ପରିବାର ଲୋକେ ପୁଲିସକୁ ଜଣାଇବା ପରେ ନର୍ସିଂ ହୋମ୍କୁ ସିଲ୍ କରିବା ସହ ଅପରାଧୀକୁ ଖୋଜିବା ଆରମ୍ଭ କରିଛି ପୁଲିସ ।