ନାଳରେ ବରଯାତ୍ରୀଙ୍କ କାର୍ ବୁଡ଼ି ୭ଜଣଙ୍କ ଜୀବନ ଗଲା, ବଞ୍ଚାଇବା ପରିବର୍ତ୍ତେ କାର୍ ଭିତରେ ଥିବା ୬ଲକ୍ଷ ଟଙ୍କାର ସୁନା ଚୋରି କଲେ ସ୍ଥାନୀୟ ଲୋକେ
ଗାଜିଆବାଦ୍ : ଦିଲ୍ଲୀର ଗାଜିଆବାଦ୍ରେ ଘଟିଛି ଏକ ଅମାନବିକ ଘଟଣା । ସୁନାର ଲୋଭରେ ଅନ୍ଧ ହୋଇ, ବୁଡ଼ି ଯାଉଥିବା ଲୋକଙ୍କୁ ଠିକ୍ ସମୟରେ ନ ବଞ୍ଚାଇବାରୁ ୭ଜଣ ଲୋକଙ୍କର ମୃତ୍ୟୁ ଘଟିଥିବା ଜଣା ପଡ଼ିଛି । ଏହି ଘଟଣାଟି ଶୁକ୍ରବାର ଘଟିଥିବା ବେଳେ ମୃତକଙ୍କ ମଧ୍ୟରେ ବରର ପିତା ଦୁର୍ଗା ପ୍ରସାଦ ରସ୍ତୋଗି, ଦାଦା ଇନ୍ଦ୍ର ପ୍ରସାଦ ରସ୍ତୋଗି ଏବଂ ତାଙ୍କ ବଡ଼ ପୁଅର ପୂରା ପରିବାର ଏହି ଦୁର୍ଘଟଣାରେ ମୃତ୍ୟୁବରଣ କରିଥିବା ଜଣା ପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଶୁକ୍ରବାର ସନ୍ଧ୍ୟା ୮ଟା ସମୟରେ ଗାଜିଆବାଦ୍ର ଅକବର୍ପୁର୍ ବେହରାମପୁର୍ର ୨୧ ବର୍ଷୀୟ ରବି ରସ୍ତୋଗିଙ୍କ ବରଯାତ୍ରୀ ନୋଏଡ଼ା ଅଭିମୁଖେ ବାହାରିଥିଲା । ଟାଟା ସୁମୋ ଯୋଗେ ରବିଙ୍କ ପରିବାର ବାହାରିଥିବା ବେଳେ କିଛି ବାଟ ଯିବା ପରେ ତାଙ୍କ ଗାଡ଼ିଟି ଦୁର୍ଘଟଣାର ଶିକାର ହୋଇ ଏକ ନାଳ ଭିତରକୁ ଗଳି ପଡ଼ିଥିଲା । ଗାଡ଼ିଟି ନାଳରେ ଥିବା ପାଣିରେ ବୁଡ଼ୁଥିବାର ଦେଖି ପଛରେ ଆସୁଥିବା ଅନ୍ୟ ସଂପର୍କୀୟମାନେ ନାଳକୁ ଡ଼େଇଁ ଗାଡ଼ି ଭିତରେ ଥିବା ଲୋକଙ୍କୁ ବଞ୍ଚାଇବାକୁ ଚେଷ୍ଟା କରିଥିଲେ । ସଂପର୍କୀୟମାନଙ୍କ ବ୍ୟତୀତ ସ୍ଥାନୀୟ ଲୋକମାନେ ମଧ୍ୟ ନାଳକୁ ଡ଼େଇଁଥିଲେ । କିନ୍ତୁ ବଞ୍ଚାଇବା ପରିବର୍ତ୍ତେ ସେମାନେ ଗାଡ଼ି ଭିତରେ ଥିବା ୬ଲକ୍ଷଟଙ୍କାର ସୁନା ଚୋରି କରିଥିଲେ । ସଂପର୍କୀୟଙ୍କ ଚେଷ୍ଟା ଫଳରେ କିଛି ଲୋକଙ୍କ ଜୀବନ ବଞ୍ଚି ପାରିଥିଲା । କିନ୍ତୁ ଏହି ଦୁର୍ଘଟଣାରେ ୭ଜଣଙ୍କ ଜୀବନର ଦୀପ ଲିଭି ଯାଇଥିଲା । ଯଦି ସ୍ଥାନୀୟ ଲୋକେ ସୁନା ଚୋରି କରିବା ପରିବର୍ତ୍ତେ ସେମାନଙ୍କୁ ବଞ୍ଚାଇବାର ପ୍ରୟାସ କରିଥାନ୍ତେ ତା’ହେଲେ ହୁଏତ ସେମାନେ ମୃତ୍ୟୁବରଣ କରି ନଥାନ୍ତେ ।