ହଠାତ୍ ମାଟିତଳୁ ଶୁଭିଲା ମୃତ ଘୋଷିତ ନବଜାତ ଶିଶୁର କାନ୍ଦଣା, ପରେ ସାମ୍ନାକୁ ଆସିଲା ଡ଼ାକ୍ତରଙ୍କ କାର୍ନାମା
ପାଟନା : ବିହାରର ଗୋପାଲଗଞ୍ଜରେ ଥିବା ସଦର ଡ଼ାକ୍ତରଖାନାର ଡ଼ାକ୍ତରଙ୍କ ଅସଲ ଚେହେରା ଏବେ ସମସ୍ତଙ୍କ ସାମ୍ନାକୁ ଆସିଛି । ଜୀବିତ ଥିବା ନବଜାତ ଶିଶୁ ମୃତ ଘୋଷଣା କରି ଅଡ଼ୁଆରେ ପଡ଼ିଛନ୍ତି ଡ଼ାକ୍ତର । ଏ ନେଇ ନବଜାତ ଶିଶୁର ପରିବାର ଲୋକ ପୁଲିସରେ ଅଭିଯୋଗ କରିବା ସହ ଡ଼ାକ୍ତରଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ମଙ୍ଗଳବାର ପ୍ରସବ ଯନ୍ତ୍ରଣା ହେବା ପରେ ନୀରଜ ପ୍ରସାଦ ନିଜ ଗର୍ଭବତୀ ପତ୍ନୀ ଦିବ୍ୟା ଦେବୀଙ୍କୁ ନେଇ ଗୋପାଲଗଞ୍ଜରେ ଥିବା ସଦର ଡ଼ାକ୍ତରଖାନାରେ ଭର୍ତ୍ତି କରାଇଥିଲେ । ଡ଼ାକ୍ତର ଦିବ୍ୟା ଦେବୀଙ୍କ ଚିକିତ୍ସା କରିବା ସହ ପ୍ରସବ ମଧ୍ୟ କରାଇଥିଲେ । ନବଜାତ ଶିଶୁ ଜନ୍ମ ହେବା ପରେ ତା’ର ସ୍ୱାସ୍ଥ୍ୟବସ୍ଥା ଖରାପ ଅଛି ବୋଲି କହି ଡ଼ାକ୍ତର ତା’ର ଚିକିତ୍ସା ଆରମ୍ଭ କରିଥିଲେ । କିନ୍ତୁ ବୁଧବାର ସକାଳେ ଚିକିତ୍ସା ଦାୟିତ୍ୱରେ ଥିବା ଡ଼ାକ୍ତର କୃଷ୍ଣା କୁମାର ନବଜାତକୁ ମୃତ ଘୋଷଣା କରି ପରିବାର ଲୋକଙ୍କୁ ହସ୍ତାନ୍ତର କରି ଦେଇଥିଲେ । ପରିବାର ଲୋକେ ମୃତ ଶିଶୁକୁ ନେଇ ମାଟି ତଳେ ଅଧା ପୋତି ସାରିଥିବା ବେଳେ ହଠାତ୍ ଶିଶୁଟି କାନ୍ଦିବାକୁ ଲାଗିଥିଲା ।
ଶିଶୁର କାନ୍ଦଣା ଶୁଣି ପରିବାର ଲୋକେ ଶିଶୁକୁ ମାଟିରୁ କାଢ଼ି ପୁଣି ଥରେ ଡ଼ାକ୍ତରଖାନା ନେବା ସହ ଚିକିତ୍ସା ଆରମ୍ଭ ହୋଇଥିଲା । କିନ୍ତୁ ଚିକିତ୍ସା କରିବାରେ ବିଳମ୍ବ ହୋଇ ଯାଇଥିବାରୁ ଶିଶୁଟି ଡ଼ାକ୍ତରଖାନାରେ ନିଜର ଶେଷ ନିଶ୍ୱାସ ତ୍ୟାଗ କରିଥିଲା । ଏହି ଘଟଣା ପରେ ପରିବାର ଲୋକେ ରାଗରେ ଡ଼ାକ୍ତରଙ୍କୁ ଦାୟୀ କରି ଡ଼ାକ୍ତରଖାନା ଆଗରେ ହଙ୍ଗାମା କରିଥିଲେ । ଏ ନେଇ ଅଭିଯୋଗ କରାଯିବା ପରେ ତଦନ୍ତ ଆରମ୍ଭ କରିଛି ପୁଲିସ ।