ହ୍ଵାଟ୍ସଆପ୍ରେ କଥା ହେବା ପରେ ଯୁବକଙ୍କୁ ଅପହରଣ କରି ଏକ କୋଟି ଟଙ୍କା ମାଗିଲେ ଯୁବତୀ, ତା’ ପରେ…
ଫତେହାବାଦ୍: ହରିୟାଣାର ଫତେହାବାଦ୍ରେ ଜଣେ ଯୁବକଙ୍କୁ ଯୁବତୀ ଅପହରଣ କରିବା ଘଟଣା ସମସ୍ତଙ୍କୁ ଆଶ୍ଚର୍ଯ୍ୟ କରିଛି । ଅପହରଣ କରିଥିବା ଅଭିଯୁକ୍ତ କୌଣସି ପେଶାଦାର ଅପରାଧି ହୋଇ ନଥିବା ବେଳେ ଟଙ୍କା ପାଇଁ ଏପରି କରିଥିବା ଜଣା ପଡ଼ିଛି । ଭଟିଣ୍ଡାରେ ରହୁଥିବା ଜଣେ ଯୁବତୀ ଟଙ୍କା ପାଇଁ ହ୍ଵାଟ୍ସଆପ୍ରେ ଜଣେ ଯୁବକଙ୍କ ସହ କଥା ହେବା ପରେ ନିଜର ଦୁଇ ସାଥୀ ସହ ମିଶି ତାଙ୍କୁ ଅପହରଣ କରିଥିଲେ । କିନ୍ତୁ ନିଜ ଲକ୍ଷରେ ସଫଳ ହୋଇ ପାରି ନଥିଲେ । ଠିକ୍ ସମୟରେ ସିର୍ସା ପୁଲିସ ଅଭିଯୋଗ ପାଇ ୩ଜଣ ଅଭିଯୁକ୍ତଙ୍କୁ ଗିରଫ କରିଥିବା ଜଣା ପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଅର୍ପଣ କୌର ନାମକ ଜନୈକା ଯୁବତୀ ଫତେହାବାଦ୍ରେ ରହୁଥିବା ଜଣେ ବଡ଼ ବ୍ୟବସାୟୀଙ୍କ ପୁଅ ଦୀକ୍ଷାନ୍ତଙ୍କ ସହ ହ୍ଵାଟ୍ସଆପ୍ ଜରିଆରେ ବନ୍ଧୁତା ସ୍ଥାପନ କରିଥିଲେ । କିଛି ଦିନ କଥା ହେବା ପରେ ଦୁହିଁଙ୍କ ମଧ୍ୟରେ ପ୍ରେମ ହେବାରୁ ଦେଖା କରିବା ପାଇଁ ତାଙ୍କୁ ଡ଼ାକିଥିଲେ ଅର୍ପଣ । ଅନ୍ୟ ପକ୍ଷରେ ଦେଖା କରିବା ସମୟରେ ଅପହରଣର ଯୋଜନା ବନାଇଥିଲେ ଅର୍ପଣ ଏବଂ ଫତେହାବାଦ୍ରେ ରହୁଥିବା ତାଙ୍କର ଦୁଇ ଜଣ ସାଙ୍ଗ । ଏହି ଅପହରଣ ପାଇଁ ଅର୍ପଣ ପଞ୍ଜାବରୁ ମଧ୍ୟ ଦୁଇ ଜଣଙ୍କୁ ଡ଼ାକିଥିଲେ ବୋଲି ଜଣା ପଡ଼ିଛି ।
ଯୋଜନା ମୁତାବକ, ଅର୍ପଣ ଦୀକ୍ଷାନ୍ତଙ୍କୁ ଏକ ହୋଟେଲକୁ ଦେଖା କରିବା ପାଇଁ ଡ଼ାକିବା ସହ ସେଠାରୁ ସେମାନେ ଲଙ୍ଗ ଡ଼୍ରାଇଭ୍ରେ ବାହରିଥିଲେ । ଯୋଜନା ଅନୁଯାୟୀ ଅର୍ପଣଙ୍କ ୪ଜଣ ସାଙ୍ଗ ଏକ ଢ଼ାବାରେ ଅପେକ୍ଷା କରିଥିବା ବେଳେ ଢ଼ାବା ପାଖରେ ଶୌଚାଳୟ ଯିବା ବାହାନାରେ ଦୀକ୍ଷାନ୍ତଙ୍କୁ ଗାଡ଼ି ରଖିବାକୁ କହିଥିଲେ ଅର୍ପଣ । ଏହା ପରେ ଅର୍ପଣ ନିଜ ସାଥୀମାନଙ୍କ ସହ ମିଶି ଦୀକ୍ଷାନ୍ତଙ୍କୁ ଅପହରଣ କରି ନେଇଥିଲେ । ଶୁକ୍ରବାର ଅପହରଣ ପାଇଁ ମଗା ଯାଇଥିବା ଟଙ୍କା ଆଣିବାକୁ ଅଭିଯୁକ୍ତମାନେ ଦୀକ୍ଷାନ୍ତଙ୍କୁ ଦରିଆପୁର ନାମକ ଏକ ସ୍ଥାନରେ ଛାଡ଼ିବା ପରେ ପୁଲିସକୁ ଏ ନେଇ ଖବର ଦେଇଥିଲେ ଦୀକ୍ଷାନ୍ତ । ସନ୍ଧ୍ୟା ସମୟରେ ଟଙ୍କା ନେବା ପାଇଁ ପହଞ୍ଚିବା ପରେ ଅର୍ପଣ ଏବଂ ତାଙ୍କର ଦୁଇ ସାଥୀଙ୍କୁ ଗିରଫ କରିଥିଲା ପୁଲିସ । ପଞ୍ଜାବରୁ ଆସିଥିବା ଅନ୍ୟ ଦୁଇ ଜଣ ଏବେ ଫେରାର ଥିବା ଜଣା ପଡ଼ିଛି ।