ସ୍ତ୍ରୀର ରଙ୍ଗ ଶ୍ୟାମଳ ହୋଇଥିବାରୁ ହତ୍ୟା କଲା ସ୍ୱାମୀ, ଅନ୍ତିମସଂସ୍କାର ପାଇଁ ଶବ ନିଆଯିବା ବେଳେ ସାମ୍ନାକୁ ଆସିଲା ପ୍ରକୃତ ଘଟଣା
ପାଲି : ରାଜସ୍ଥାନର ପାଲିରେ ଘଟିଛି ଏକ ଲଜ୍ଜାଜନକ ଘଟଣା । ଚର୍ମର ରଙ୍ଗ ପାଇଁ ହତ୍ୟାକାରୀ ପାଲଟିଛି ସ୍ୱାମୀ ସ୍ତ୍ରୀର ରଙ୍ଗ ଶ୍ୟାମଳ ହୋଇଥିବାରୁ ସ୍ୱାମୀ ସ୍ତ୍ରୀର ଗଳା ଚିପି ହତ୍ୟା କରିବା ଘଟଣା ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ପ୍ରଥମେ ଏହା ହତ୍ୟା ବୋଲି କାହାକୁ ଜଣା ନ ଥିବା ବେଳେ ଶବ ସତ୍କାର ପାଇଁ ଶ୍ମଶାନକୁ ଯିବା ପରେ ସବୁ ସତ ସାମ୍ନାକୁ ଆସିଥିଲା । ପୀଡ଼ିତାଙ୍କ ପରିବାର ତାଙ୍କ ମୃତ୍ୟୁ ପରେ ଶ୍ମଶାନକୁ ନେଇଥିବା ବେଳେ ସେଠାରେ ତାଙ୍କ ଅଳଙ୍କାର କଢ଼ାଯିବା ସମୟରେ ବେକରେ ଥିବା ଦାଗ ଦେଖି ସେମାନଙ୍କ ମନରେ ସନ୍ଦେହ ଆସିଥିଲା। ଯାହା ପରେ ସେମାନେ ଶବ ସତ୍କାର ନ କରି ପୁଲିସକୁ ଖବର ଦେଇଥିଲେ । ପୁଲିସ ଘଟଣାସ୍ଥଳରେ ପହଞ୍ଚି ପଚରାଉଚରା କରିବା ସହ ପୀଡ଼ିତାଙ୍କ ସ୍ୱାମୀଙ୍କୁ ଅଟକ ରଖିଥିବା ଜଣାପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ,୪ମାସ ପୂର୍ବରୁ ଶିବପୁରାରେ ରହୁଥିବା ଗଙ୍ଗା ଢ଼ୁଣ୍ଡଲିରେ ରହୁଥିବା ସୁନୀଲଙ୍କୁ ବିବାହ କରିଥିଲେ। ସୁନୀଲ ଫୋନ ଯୋଗେ ଗଙ୍ଗାକୁ ସାପ କାମୁଡ଼ିବାରୁ ତା’ର ମୃତ୍ୟୁ ହୋଇଥିବା କହି ଗଙ୍ଗାଙ୍କ ପରିବାର ଲୋକଙ୍କୁ ଅନ୍ତିମ ସଂସ୍କାର ପାଇଁ ଡ଼କାଇଥିଲେ । ପୀଡ଼ିତାଙ୍କ ପରିବାର ସୁନୀଲଙ୍କ କଥା ମାନି ତାଙ୍କ ଘରେ ପହଞ୍ଚିବା ସହ ଶବ ସତ୍କାର ପାଇଁ ଶ୍ମଶାନ ଯାଇଥିଲେ । କିନ୍ତୁ ସେଠାରେ ଗଙ୍ଗାଙ୍କ ବେକରେ କ୍ଷତ ସ୍ଥାନ ଦେଖି ସନ୍ଦେହ ଉପୁଜିବାରୁ ସେମାନେ ପୁଲିସକୁ ଖବର ଦେଇଥିଲେ । ବିବାହ ପରେ ଗଙ୍ଗାର ଶ୍ୟାମଳ ରଙ୍ଗ ପାଇଁ ତା’ ଶାଶୁ ଘର ଲୋକେ ଅତ୍ୟାଚାର କରୁଥିଲେ । ଏହି କାରଣ ପାଇଁ ସେମାନେ ଗଙ୍ଗାର ହତ୍ୟା କରିଥାଇ ପାରନ୍ତି ବୋଲି ପୀଡ଼ିତାଙ୍କ ପରିବାର ଲୋକେ କହିଛନ୍ତି । ତେବେ ପ୍ରକୃତ ଘଟଣା କ’ଣ ତାହା ଜାଣିବା ପାଇଁ ପୁଲିସ ତଦନ୍ତ ଆରମ୍ଭ କରିଛି ।