ପରକୀୟା ପ୍ରେମରେ ଅନ୍ଧ ସ୍ତ୍ରୀ ୨ ଲକ୍ଷ ଟଙ୍କା ସୁପାରି ଦେଇ ସ୍ୱାମୀକୁ ହତ୍ୟା କଲା
ହାଇଦ୍ରାବାଦ : କିଛି ଦିନ ପୂର୍ବେ ହାଇଦ୍ରାବାଦର ସନାଥ ପୁଲିସ ଷ୍ଟେସନ ଅଞ୍ଚଳରେ ରେଳଧାରଣରେ ଜଣେ ଅଜଣା ବ୍ୟକ୍ତିଙ୍କ ମୃତଦେହ ମିଳିବା ମାମଲା ରୁଜୁ କରାଯାଇଥିଲା । ତେବେ ବର୍ତ୍ତମାନ ଘଟଣାଟି ପଛରେ ଥିବା ପ୍ରକୃତ କାହାଣୀ ଉପରୁ ପରଦା ଉଠିଛି । ପ୍ରକୃତରେ ଏହା ଏକ ଦୁର୍ଘଟଣା ନୁହଁ ବରଂ ହତ୍ୟା । ମୃତକଙ୍କୁ ତାଙ୍କ ପତ୍ନୀ କିଛି ବ୍ୟକ୍ତିଙ୍କୁ ୨ ଲକ୍ଷ ଟଙ୍କାର ସୁପାରି ଦେଇ ହତ୍ୟା କରିବା ସହ ତାଙ୍କୁ ନେଇ ରେଳଧାରଣାରେ ପକାଇଥିଲେ । ବର୍ତ୍ତମାନ ପୁଲିସ ଉକ୍ତ ମହିଳା ଏବଂ ଅନ୍ୟ ଅଭିଯୁକ୍ତଙ୍କୁ ଗିରଫ କରି ଜେଲ ପଠାଇଛି ।
ପୁଲିସ ସୂଚନା ଅନୁଯାୟୀ , ୨୧ ଫେବୃଆରିରେ ପୁଲିସ ଷ୍ଟେସନରେ ଏକ ଅଜଣା ମୃତ ଶରୀର ସମ୍ବନ୍ଧୀୟ ମାମଲା ରୁଜୁ କରାଯାଇଥିଲା । ଏ ନେଇ ତଦନ୍ତ କରାଯାଉଥିବା ବେଳେ ଘଟଣାଟି ଆତ୍ମହତ୍ୟା କିମ୍ବା ଦୁର୍ଘଟଣା ନୁହଁ ବରଂ ହତ୍ୟା ବୋଲି ଜଣାପଡ଼ିଥିଲା। ମୃତ ଦେହ ମିଳିବାର ଏକ ସପ୍ତାହ ପରେ ମୃତକଙ୍କ ପତ୍ନୀ ସଲେହା ବେଗମ ତାଙ୍କର ସ୍ୱାମୀ ନିଖୋଜ ହେବା ନେଇ ଏକ ଏଫଆଇଆର୍ ଦେଇଥିଲେ । ପରେ ମୃତକଙ୍କୁ ଚିହ୍ନଟ କରାଯାଇଥିଲା ଏବଂ ସେ ୪୩ ବର୍ଷିୟ ଗାଡ଼ିଚାଳକ ମହମ୍ମହ ଖ୍ଵାଜା ବୋଲି ଜଣାପଡ଼ିଥିଲା। ଘଟଣାସ୍ଥଳରୁ କିଛି ଦୂରରେ ଏକ ରକ୍ତଲଗା ପଥର ଏବଂ ରକ୍ତର କିଛି ବୁନ୍ଦା ପୁଲିସକୁ ମିଳିଥିବାରୁ ହତ୍ୟା ସନ୍ଦେହରେ ପୁଲିସ ତଦନ୍ତ ଜାରି କରିଥିଲା। ପରେ ସଂପୂର୍ଣ୍ଣ ଘଟଣାଟି ପାଖ ଆଖର ସିସିଟିଭି ଫୁଟେଜରୁ ଜଣାପଡ଼ିଥିଲା।
Sambad is now on WhatsApp
Join and get latest news updates delivered to you via WhatsApp
ଘଟଣା ଅନୁଯାୟୀ , ମହମ୍ମଦ ଖ୍ଵାଜାଙ୍କ ପତ୍ନୀଙ୍କର ଅନ୍ୟ ଜଣେ ବ୍ୟକ୍ତି ତବରେଜ କ୍ୟୁରେସିଙ୍କ ସହିତ ପରକୀୟା ସଂପର୍କ ଥିବା ଜଣାପଡ଼ିଥିଲା । ଏନେଇ ସେ ତାଙ୍କ ପତ୍ନୀଙ୍କୁ ଅନେକ ଥର ବୁଝାଇବା ସହ କ୍ୟୁରେସିଙ୍କ ଠାରୁ ଦୂରରେ ରହିବା ପାଇଁ ଉପଦେଶ ଦେଇଥିଲେ। ଏଥିରେ କ୍ରୋଧିତ ହୋଇ ପତ୍ନୀ ସାଲେହା ଏବଂ ତାଙ୍କ ପ୍ରେମିକ କ୍ୟୁରେସି ତାଙ୍କର ହତ୍ୟାର ଯୋଜନା କରିଥିଲେ । ସେମାନେ କିଛି ଅସାମାଜିକ ବ୍ୟକ୍ତିଙ୍କୁ ୨ ଲକ୍ଷ ଟଙ୍କା ଦେବା ସହ ମହମ୍ମଦଙ୍କୁ ତାଙ୍କ ରାସ୍ତାରୁ ହଟାଇବା ପାଇଁ ଷଡ଼ଯନ୍ତ୍ର କରିଥିଲେ । ସେମାନେ ମହମ୍ମଦଙ୍କୁ ୨୦ ଫେବୃଆରିରେ ଅତ୍ୟଧିକ ମାତ୍ରାର ମଦ୍ୟପାନ କରାଇ ତାଙ୍କୁ ମାରି ରେଳ ଧାରଣାରେ ଫୋପାଡ଼ିଥିଲେ । ଏ ନେଇ ପୁଲିସ ତଦନ୍ତ କରିବା ପରେ ସମସ୍ତ ଘଟଣା ଉପରୁ ପରଦା ଉଠିବା ସହ ମହମ୍ମଦଙ୍କ ପତ୍ନୀ ଏବଂ ତାଙ୍କ ପ୍ରେମିକଙ୍କ ସହ ଅନ୍ୟ ଅଭିଯୁକ୍ତ ମାନଙ୍କୁ ଗିରଫ କରାଯାଇଛି।