ସଙ୍ଗରୋଧରେ ରହିବା ପାଇଁ କହିବାରୁ ଯୁବକଙ୍କୁ ପିଟି ପିଟି ହତ୍ୟା କଲେ ୪ ଅଭିଯୁକ୍ତ
ଡାଲଟୋଗଞ୍ଜ: କରୋନା ଭୂତାଣୁକୁ ନେଇ ଲୋକଙ୍କୁ ସତର୍କ କରାଇବା ଜଣେ ଯୁବକଙ୍କୁ ମହଙ୍ଗା ପଡିଛି | ବାହାର ରାଜ୍ୟରୁ ୪ଜଣ ଯୁବକ ଆସିଥିବାରୁ ସେମାନଙ୍କୁ ନିଜ ଘରେ ସଙ୍ଗରୋଧରେ ରହିବାକୁ କହିଥିଲେ ପୀଡିତ | କିନ୍ତୁ ତାଙ୍କର ଏହି ପରାମର୍ଶ ତାଙ୍କର ଜୀବନ ନେଇଯିବ ବୋଲି ତାଙ୍କୁ ଜଣା ନଥିଲା | ତାଗିଦ କରିବାରୁ ରାଗରେ ୪ଜଣ ଅଭିଯୁକ୍ତ ୪୫ବର୍ଷ ବୟସ୍କ ବ୍ୟକ୍ତିଙ୍କୁ ପିଟି ପିଟି ହତ୍ୟା କରିଥିବା ଜଣା ପଡିଛି | ନିକଟରେ ଏହି ଚାରି ଅଭିଯୁକ୍ତ ଅନ୍ୟ ରାଜ୍ୟରୁ ପାଲାମୁ ଜିଲ୍ଲାରେ ଥିବା ନିଜ ଗ୍ରାମକୁ ଫେରିଥିଲେ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ବୁଧବାର ଦିନ ଏହି ଘଟଣା ଘଟିଥିଲା | ୪ଜଣ ଅଭିଯୁକ୍ତ ଅନ୍ୟ ରାଜ୍ୟରୁ ଫେରିଥିବା ଜାଣି ସେମାନଙ୍କୁ ଘରେ ଅଲଗା ରହିବାକୁ କହିଥିଲେ ପୀଡିତ କାଶୀ ସା। ଏ କଥା ଶୁଣି ଉଭୟଙ୍କ ମଧ୍ୟରେ ଝଗଡା ଆରମ୍ଭ ହୋଇଯାଇଥିଲା | ପରେ ୪ଜଣ ଅଭିଯୁକ୍ତ ମିଶି ପୀଡିତଙ୍କୁ ଠେଙ୍ଗାରେ ପିଟିବା ଆରମ୍ଭ କରିଦେଇଥିଲେ | ଘଟଣା ପରେ ପୀଡ଼ିତଙ୍କୁ ସ୍ଥାନୀୟ ଡାକ୍ତରଖାନା ନିଆଯାଇଥିଲେ ମଧ୍ୟ ସେଠାରେ ତାଙ୍କର ମୃତ୍ୟୁ ଘଟିଥିଲା | ବର୍ତ୍ତମାନ ୪ଜଣ ଅଭିଯୁକ୍ତଙ୍କ ନାଁରେ ଏତଲା ଲେଖି ତଦନ୍ତ ଆରମ୍ଭ କରିଛି ପୁଲିସ |