ସିଓ୍ଵାନ: ସାରା ଦେଶରେ ପ୍ରତିଦିନ ହେଉଥିବା ନାବାଳିକା ଦୁଷ୍କର୍ମ ଘଟଣା ରୋକିବା ପାଇଁ ଆନ୍ଦୋଳନ ଜାରି ରହିଥିବା ବେଳେ ଏହାର କିଛି ଫଳାଫଳ ମିଳି ପାରି ନାହିଁ । କଠୁଆ ଦୁଷ୍କର୍ମ ପରେ ଏବେ ପୁଣି ଗୋଟିଏ ଲଜ୍ଜାଜନକ ଘଟଣା ସାମ୍ନାକୁ ଆସିଛି। ଜଣେ ଦିବ୍ୟାଙ୍ଗ ନାବାଳିକାକୁ ଜଣେ ୧୨ବର୍ଷୀୟ ନାବାଳକ ଦୁଷ୍କର୍ମ କରିଥିବା ଅଭିଯୋଗ ହୋଇଛି । ଏହି ଘଟଣାଟି ବିବାହରର ସିଓ୍ଵାନ ଜିଲ୍ଲାରେ ଘଟିଥିବା ବେଳେ ପୁଲିସକୁ ଏତଲା ଦିଆଯିବା ପରେ ସଙ୍ଗେ ସଙ୍ଗେ ଅଭିଯୁକ୍ତକୁ ପୁଲିସ ଗିରଫ କରିଥିଲା ବୋଲି ଜଣାପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଶନିବାର ପୀଡ଼ିତା ଘରେ ଏକା ଥିବା ବେଳେ ସନ୍ଧ୍ୟା ୮ଟା ସମୟରେ ଅଭିଯୁକ୍ତ ଜଣକ ତାଙ୍କ ଘରକୁ ଯାଇଥିଲେ । ପୀଡ଼ିତା ଦେଖିପାରୁ ନ ଥିବାରୁ ଅଭିଯୁକ୍ତ ଲୁଚି କରି ତାଙ୍କ ଘରେ ପ୍ରବେଶ କରିବା ପରେ ପୀଡ଼ିତାଙ୍କ ପାଟିରେ କପଡ଼ା ବାନ୍ଧି ଘରୁ ନେଇ ଯିବା ସହ ଏକ ନିକାଞ୍ଚନ ସ୍ଥାନରେ ତାଙ୍କ ସହ ଦୁଷ୍କର୍ମ କରିଥିଲା । କିଛି ସମୟ ପରେ ସେ ପୀଡ଼ିତାଙ୍କୁ ତାଙ୍କ ଘରେ ଆଣି ଛାଡ଼ି ଦେଇଥିଲା । ଘର ଲୋକ ପହଞ୍ଚିବା ପରେ ପୀଡ଼ିତାଙ୍କ ଏଭଳି ଅବସ୍ଥା ଦେଖି ତାଙ୍କୁ ତୁରନ୍ତ ସଦର ଡ଼ାକ୍ତରଖାନାରେ ଭର୍ତ୍ତି କରାଯାଇଥିଲା । ଡ଼ାକ୍ତରୀ ପରୀକ୍ଷା ପରେ ପୀଡ଼ିତାଙ୍କ ସହ ଦୁଷ୍କର୍ମ ହୋଇଛି ବୋଲି ସ୍ପଷ୍ଟ ହେବାରୁ ପରିବାର ଲୋକେ ମହିଳା ଥାନାରେ ଏ ନେଇ ଅଭିଯୋଗ କରିଥିଲେ । ଏତଲା ପାଇବା ପରେ ଘଟଣାର ତଦନ୍ତ କରି ଅଭିଯୁକ୍ତଙ୍କୁ ତାଙ୍କ ଘରୁ ଗିରଫ କରିଥିଲା ପୁଲିସ ।