ପ୍ରେମ ବିବାହ କରିବାର ୩ ବର୍ଷ ପରେ ଖୁସି ଖବର ନେଇ ଶ୍ୱଶୁର ଘରେ ପହଞ୍ଚିଥିଲା ଜ୍ୱାଇଁ, ପୂର୍ବ ରାଗ ଶୁଝାଇବାକୁ ଯାଇ ଜ୍ୱାଇଁକୁ ମାରି ଧାନ ବିଲରେ ପୋତି ଦେଲେ
ମୁଜାଫରନଗର : ଉତ୍ତରପ୍ରଦେଶର ମୁଜାଫରନଗରରେ ଜଣେ ଜ୍ୱାଇଁକୁ ଶଶୁର ଘର ଲୋକେ ହତ୍ୟା କରି ପୋତି ଦେବା ଘଟଣା ଏବେ ସେ ଅଞ୍ଚଳରେ ଚାଞ୍ଚଲ୍ୟ ଖେଳାଇ ଦେଇଛି । ପ୍ରେମ ବିବାହର ୩ ବର୍ଷ ପରେ ଶ୍ୱଶୁର ଘର ଲୋକଙ୍କ ପାଖରେ ପହଞ୍ଚିଥିଲା ଜ୍ୱାଇଁ । କିନ୍ତୁ ତାଙ୍କୁ ଜଣା ନ ଥିଲା ୩ ବର୍ଷ ପୂର୍ବର ରାଗ ଶ୍ୱଶୁର ଘର ଲୋକ ଏମିତି ଶୁଝାଇବେ ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ,ପ୍ରତିରକ୍ଷା ମନ୍ତ୍ରାଳୟରେ କାମ କରୁଥିବା ମନୋଜ କୁମାର ନିଜ ଗାଁର ଜଣେ ଯୁବତୀଙ୍କୁ ଭଲ ପାଇ ବସିବା ସହ ଘରୁ ଲୁଚି ବିବାହ କରିଥିଲେ । ଦୁହେଁ ମହାରାଷ୍ଟ୍ରରେ ରହୁଥିବା ବେଳେ ମନୋଜଙ୍କ ପତ୍ନୀଙ୍କ ଟ୍ରାନ୍ସଫର ନିଜ ଘର ପାଖରେ ହେବାରୁ ସେ ନିଜ ଘରେ ରହିବାକୁ ଲାଗିଥିଲେ । କିଛି ଦିନ ପରେ ମନୋଜଙ୍କ ଟ୍ରାନ୍ସଫର ଦିଲ୍ଲୀ ହେବାରୁ ସେ ଖୁସି ଖବର ଜଣାଇବା ପାଇଁ ନିଜ ଶ୍ୱଶୁର ଘରେ ପହଞ୍ଚିଥିଲେ । କିନ୍ତୁ ଶ୍ୱଶୁର ଘର ଲୋକେ ଜ୍ୱାଇଁ ଖୁସିରେ ସାମିଲ ହେବା ଦୂରର କଥା ନିଜ ଝିଅ ଜୀବନକୁ ନଷ୍ଟ କରିବାକୁ ପଛାଇ ନ ଥିଲେ । ଝିଅ ଘରେ ନଥିବା ବେଳେ ମନୋଜଙ୍କ ଗଳା ଦବାଇ ତାଙ୍କୁ ହତ୍ୟା କରିବା ପରେ କାହାର ସନ୍ଦେହ ନ ହେଉ ବୋଲି ଶ୍ୱଶୁର ଘର ଲୋକମାନେ ଧାନ ବିଲରେ ପୋତି ଦେଇଥିଲେ । ଦୁଇ ଦିନ ଖୋଜିବା ପରେ ମନୋଜ ନ ମିଳିବାରୁ ତାଙ୍କ ସ୍ତ୍ରୀ ପୁଲିସରେ ଅଭିଯୋଗ କରିଥିଲେ । ନିଜ ପରିବାର ଲୋକଙ୍କ ଉପରେ ସନ୍ଦେହ କରୁଥିବା କଥା କହିବା ପରେ ପୁଲିସ ତଦନ୍ତ କରି ପ୍ରକୃତ ସତ ପାଖରେ ପହଞ୍ଚି ପାରିଥିଲା । ସତ ସାମ୍ନାକୁ ଆସିବା ପରେ ଏହି ହତ୍ୟାରେ ସାମିଲ ଥିବା ଅଭିଯୁକ୍ତଙ୍କୁ ଗିରଫ କରିଛି ପୁଲିସ ।