ଚିକିତ୍ସା କରାଇବାକୁ ଯାଇଥିବା ମହିଳାଙ୍କ ଭିଡିଓ ବନାଇବାର ଯୋଜନା କରୁଥିବା ଅଭିଯୋଗରେ ଡ଼ାକ୍ତରଙ୍କ ବିରୋଧରେ ମାମଲା ରୁଜୁ
ମୁମ୍ବାଇ: ଶୁକ୍ରବାର ମୁମ୍ବାଇର ଓଶିଓ୍ଵାରା ପୁଲିସ ଷ୍ଟେସନରେ ଜଣେ ମହିଳା କିଛି ଡ଼ାକ୍ତରଙ୍କ ବିରୋଧରେ ସଙ୍ଗୀନ୍ ଅଭିଯୋଗ ଆଣିଛନ୍ତି । ମହିଳାଜଣଙ୍କ ନିଜର ହେୟାର ରିମୁଭାଲ ଚିକିତ୍ସା କରାଇବାକୁ ଯାଇଥିବା ବେଳେ ସେଠାରେ ତାଙ୍କର ଭିଡିଓ ଉତ୍ତୋଳନ କରାଯିବା ପାଇଁ ଚେଷ୍ଟା କରାଯାଇଥିଲା । ଯାହା ପରେ ତୁରନ୍ତ ମହିଳାଜଣଙ୍କ କ୍ୟାମେରା ଲାଗିଥିବା ଜାଣି ନିଜର ଚିକିତ୍ସା ନ କରି ସେଠାରୁ ଚାଲି ଆସିଥିଲେ । ଏହା ସହ ଲାଗିଥିବା କ୍ୟାମେରାର ଫଟୋ ଉଠାଇ ପୁଲିସରେ ଅଭିଯୋଗ କରିଥିଲେ । ଅଭିଯୋଗ ପାଇ ପୁଲିସ ଅଭିଯୁକ୍ତଙ୍କ ବିରୋଧରେ ଏତଲା ରୁଜୁ କରିଥିବା ଜଣା ପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ମୁତାବକ, ହେୟାର ରିମୁଭାଲ ଚିକିତ୍ସା ପାଇଁ ପୀଡ଼ିତା ଜୁନ୍ ୨୪ରେ ମୁମ୍ବାଇସ୍ଥିତ ଡ଼ାକ୍ତରଖାନାକୁ ଯାଇଥିବା ବେଳେ ୩ଜଣ ମହିଳା ଡ଼ାକ୍ତର ତାଙ୍କୁ ନିଜର ପୋଷାକ କାଢ଼ିବା ପାଇଁ କହିଥିଲେ । କିନ୍ତୁ ଏହା ପୂର୍ବରୁ ପୀଡ଼ିତା ସ୍ମୋକ୍ ଡିଟେକ୍ଟର ଡିଭାଇସରେ ଲାଗିଥିବା କ୍ୟାମେରାକୁ ଦେଖି ନେଇଥିଲେ । ଯାହା ପରେ ସେ ସେଠାରେ ଚିକିତ୍ସା ନ କରାଇ ଫେରି ଆସିବା ସହ ଲାଗିଥିବା କ୍ୟାମେରାର ଫଟୋ ଉଠାଇ ଆଣିଥିଲେ । ପୁଲିସରେ ଏ ନେଇ ଅଭିଯୋଗ କରାଯିବା ପରେ ୩ଜଣ ଅଭିଯୁକ୍ତଙ୍କ ବିରୋଧରେ ଏତଲା ରୁଜୁ କରି ଦିଆ ଯାଇଛି ।