ଜୟପୁର : ବୁଧବାର ରାଜସ୍ଥାନର ଜୟପୁରରୁ ଏକ ସୁଟ୍କେସ୍ରେ ଜଣେ ଯୁବକଙ୍କ ମୃତ ଦେହକୁ ଉଦ୍ଧାର କରିଥିଲା ପୁଲିସ । ଯୁବକଙ୍କୁ କିଏ, କ’ଣ ପାଇଁ ଏବଂ କେମିତି ହତ୍ୟା କଲା ବୋଲି ପୁଲିସ ତଦନ୍ତ ଆରମ୍ଭ କରିଥିବା ବେଳେ ଏବେ ପୂରା ଘଟଣା ସାମ୍ନାକୁ ଆସିଛି । ମୃତକ ଜଣଙ୍କ ଦୁଷ୍ୟନ୍ତ ଶର୍ମା ବୋଲି ଜଣା ପଡ଼ିଥିବା ବେଳେ ସେହି ଅଞ୍ଚଳର ଜଣେ ଦୁର୍ଦ୍ଦାନ୍ତ ଅପରାଧୀ ପ୍ରିୟା ସେଠ୍ ଏହି ଅପରାଧ କରିଥିବା ଜଣାପଡ଼ିଛି । ତଦନ୍ତ ପରେ ପ୍ରିୟାଙ୍କୁ ଗିରଫ କରି ନେଇଛି ପୁଲିସ । ଏହା ପ୍ରଥମ ନୁହେଁ, ପୂର୍ବରୁ ୧୦୦ରୁ ଅଧିକ ମାମଲା ପ୍ରିୟାଙ୍କ ବିରୋଧରେ ରୁଜୁ ହୋଇଥିବା ସହ ସେ ଜେଲ ଯାଇ ସାରିଥିବା ଜଣା ପଡ଼ିଛି । ଡ଼େଟିଙ୍ଗ ଆପ୍ ଟିଣ୍ଡର ମାଧ୍ୟମରେ ସେ ଯୁବକମାନଙ୍କୁ ନିଜ ଜାଲରେ ଫସାଇବା ସହ ତାଙ୍କ ଠାରୁ ଟଙ୍କା ହଡ଼ପ କରିବା ଏବଂ ଦରକାର ପଡ଼ିଲେ ସେମାନଙ୍କୁ ହତ୍ୟା କରିବାକୁ ମଧ୍ୟ ପଛାଉ ନ ଥିବା ସୂଚନା ମିଳିଛି।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, କିଛି ଦିନ ତଳେ ପ୍ରିୟା ଦୁଷ୍ୟନ୍ତକୁ ଟିଣ୍ଡର ଆପ୍ ମାଧ୍ୟମରେ ଭେଟିବା ପରେ ତାଙ୍କ ସହ କଥାବାର୍ତ୍ତା ଆରମ୍ଭ କରିଥିଲେ । ଧୀରେ ଧୀରେ କଥା ହେଉ ହେଉ ବନ୍ଧୁତା ପ୍ରେମରେ ବଦଳି ଯାଇଥିଲା । ଦୁଷ୍ୟନ୍ତ ପ୍ରିୟାଙ୍କ ପ୍ରେମରେ ପଡ଼ି ଯାଇଥିଲେ । ଏହି ମଧ୍ୟରେ ପ୍ରିୟା ଦୁଷ୍ୟନ୍ତଙ୍କ ସହ ଶାରୀରିକ ସଂପର୍କ ରଖିବା ସହ ତାହାର ଏକ ଭିଡ଼ିଓ ମଧ୍ୟ ରେକର୍ଡ଼ କରି ନେଇଥିଲେ । ଏହି ଭିଡ଼ିଓ ସୋସିଆଲ ମିଡ଼ିଆରେ ଛାଡ଼ି ଦେବାର ଧମକ ଦେଇ ସେ ଦୁଷ୍ୟନ୍ତଙ୍କଠାରୁ ଟଙ୍କା ହଡ଼ପ କରିବା ଆରମ୍ଭ କରିଥିଲେ । ଧୀରେ ଧୀରେ ତାଙ୍କର ଟଙ୍କା ମାଗିବାର ଭୋକ ବଢ଼ିବାରେ ଲାଗିଥିଲା ।
ସେଥିପାଇଁ ବୁଧବାର ଦୁଷ୍ୟନ୍ତକୁ ଦେଖା କରିବା ବାହାନାରେ ଡ଼ାକି ତାଙ୍କୁ ଅପହରଣ କରିବା ସହ ତାଙ୍କ ଘର ଲୋକଙ୍କଠାରୁ ୩ ଲକ୍ଷ ଟଙ୍କା ମାଗିଥିଲା ପ୍ରିୟା । ଏହି ଟଙ୍କାକୁ ପ୍ରିୟା ନିଜ ବ୍ୟାଙ୍କ ଆକାଉଣ୍ଟରେ ଜମା କରାଇବା ପାଇଁ କହିଥିବା ବେଳେ ଦୁଷ୍ୟନ୍ତଙ୍କ ଘର ଲୋକ ଜମା ମଧ୍ୟ କରି ଦେଇଥିଲେ । କିନ୍ତୁ ଧରା ପଡ଼ିଯିବା ଡ଼ରରେ ପ୍ରିୟା ନିଜ ସାଥୀମାନଙ୍କ ସହ ମିଶି ଦୁଷ୍ୟନ୍ତଙ୍କୁ ହତ୍ୟା କରିଥିଲେ । ଟଙ୍କା ଦେବା ପରେ ମଧ୍ୟ ଦୁଷ୍ୟନ୍ତ ଘରକୁ ନ ଫେରିବାରୁ ପରିବାର ଲୋକେ ଝୋଟ୍ଓ୍ଵାଡ଼ା ପୁଲିସ ଷ୍ଟେସନରେ ଅଭିଯୋଗ କରିଥିଲେ । ଅଭିଯୋଗ ପାଇବା ପରେ ପୁଲିସ କଲ ରେକର୍ଡ଼ ଚେକ୍ କରି ପ୍ରିୟାଙ୍କୁ ଧରିବାରେ ସଫଳ ହୋଇଥିଲା ।