ଇଦ୍ ପାଳିବା ପାଇଁ ଆସିଥିବା ନାବାଳିକାକୁ ମସ୍ଜିଦ୍ ଛାତକୁ ନେଇ ଦୁଷ୍କର୍ମ କଲା ପଡ଼ୋଶୀ
ମେରଠ : ଉତ୍ତରପ୍ରଦେଶର ମେରଠରେ ଜଣେ ୮ବର୍ଷର ନାବାଳିକା ଦୁଷ୍କର୍ମର ଶିକାର ହୋଇଥିବା ଖବର ଏବେ ଚର୍ଚ୍ଚାର ବିଷୟ ପାଲଟିଛି । ଘର ପାଖରେ ରହୁଥିବା ଜଣେ ଯୁବକ ପୀଡ଼ିତାଙ୍କୁ ଜୋର ଜବରଦସ୍ତ ଏକ ମସ୍ଜିଦ୍ର ଛାତ ଉପରକୁ ନେଇ ଦୁଷ୍କର୍ମ କରିଥିବା ଅଭିଯୋଗ ହୋଇଛି । ପୀଡ଼ିତା ଦିଲ୍ଲୀରୁ ନିଜ ଦାଦାଙ୍କ ଘରକୁ ଇଦ୍ ପାଳନ କରିବାକୁ ଆସିଥିବା ବେଳେ ଏଭଳି ଘଟଣାର ସାମ୍ନା କରିଛନ୍ତି । ଏ ନେଇ ହଙ୍ଗାମା ହେବାରୁ ପୁଲିସ ଅଭିଯୁକ୍ତକୁ ଗିରଫ କରିଥିବା ଜଣାପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ପୁଲିସ ଦେଇଥିବା ସୂଚନା ମୁତାବକ, ଅଗଷ୍ଟ ୨୨ ସଂନ୍ଧ୍ୟା ସମୟରେ ନୌଚନ୍ଦି ଅଞ୍ଚଳରେ ଥିବା ଏକ ମସ୍ଜିଦ୍ରେ ଲୋକମାନେ ଗୁରୁତର ଅବସ୍ଥାରେ ଜଣେ ନାବାଳିକାକୁ ଉଦ୍ଧାର କରିଥିଲେ । ପୀଡ଼ିତାଙ୍କ ଅବସ୍ଥା ଖରାପ ଥିବାରୁ ସେ କିଛି କହି ପାରୁ ନ ଥିଲେ । ଲୋକମାନେ ପୀଡ଼ିତାଙ୍କୁ ଘରକୁ ନେବା ପରେ ପରିବାର ଲୋକଙ୍କ ସାମ୍ନାରେ ପୀଡ଼ିତା ଘଟଣା ବିଷୟରେ ଜଣାଇଥିଲେ । ପୀଡ଼ିତା ଘର ବାହାରେ ଅନ୍ୟ ପିଲାଙ୍କ ସହ ଖେଳୁଥିବା ବେଳେ ପାଖ ଘରେ ରହୁଥିବା ଶାହିଦ୍ ତାଙ୍କୁ ଜବରଦସ୍ତ ମସ୍ଜିଦ୍ ନେଇ ଯାଇଥିଲା । ମୁହଁ ବନ୍ଦ କରି ପୀଡ଼ିତାଙ୍କୁ ମସ୍ଜିଦ୍ର ଛାତକୁ ନେଇଯିବା ପରେ ଶାହିଦ୍ ପୀଡ଼ିତାଙ୍କ ସହ ଦୁଷ୍କର୍ମ କରିଥିଲେ । କାହାକୁ ଜଣାଇଲେ ଜୀବନରୁ ମାରିବାର ଧମକ ଦେଇ ସେଠାରୁ ଚାଲି ଯାଇଥିଲା ଶାହିଦ୍ । ପୀଡ଼ିତାଙ୍କଠାରୁ ସବୁ ଶୁଣିବା ପରେ ପୁଲିସରେ ଅଭିଯୋଗ କରିଥିଲେ ପରିବାର ଲୋକେ । ଅଭିଯୋଗ ପରେ ତଦନ୍ତ କରି ପୁଲିସ ଅଭିଯୁକ୍ତ ଶାହିଦ୍କୁ ଗିରଫ କରିଛି । ଏହା ପୂର୍ବରୁ ଶାହିଦ୍ ଆଉ ଜଣେ ନାବାଳିକା ସହ ଦୁଷ୍କର୍ମ ଉଦ୍ୟମ କରିଥିଲେ । କିନ୍ତୁ ଅଭିଯୁକ୍ତଙ୍କ ବାପା ଟଙ୍କା ଦେଇ ମାମଲାକୁ ଚପାଇ ଦେଇଥିଲେ ।