ରାଜଧାନୀରେ ଚାଞ୍ଚଲ୍ୟ : ହାଇଟେକ୍ ଡାକ୍ତରୀ ଛାତ୍ରୀଙ୍କୁ ଦୁଷ୍କର୍ମ
ଭୁବନେଶ୍ୱର : ହାଇଟେକ୍ ମେଡିକାଲ୍ କଲେଜର ଜଣେ ପ୍ରଥମ ବର୍ଷ ଡାକ୍ତରୀ ଛାତ୍ରୀଙ୍କୁ ସେହି କଲେଜର ଜଣେ ଆଟେଣ୍ଡାଣ୍ଟ ଦୁଷ୍କର୍ମ କରିଥିବା ଅଭିଯୋଗକୁ ନେଇ ରାଜଧାନୀରେ ଚାଞ୍ଚଲ୍ୟ ସୃଷ୍ଟି ହୋଇଛି। ଏ ନେଇ ଛାତ୍ରୀ ଜଣକ ଅଭିଯୋଗ କରିବା ପରେ ଆଟେଣ୍ଡାଣ୍ଟ୍ ମନୋଜ ଖଟୁଆ(୨୪)କୁ ପୁଲିସ ଗିରଫ କରିଛି। ମନୋଜର ଘର କଟକ ଜିଲ୍ଲା ଆଠଗଡ଼ ମୁଣ୍ଡୁଳିରେ। ପାଖାପାଖି ବର୍ଷେ ହେବ ସେ ଏହି କଲେଜରେ ଆଟେଣ୍ଡାଣ୍ଟ ଭାବେ କାମ କରୁଥିଲା। ଡାକ୍ତରୀ ଛାତ୍ରୀଙ୍କୁ ଦୁଷ୍କର୍ମ ହୋଇଥିବା ଖବର ପ୍ରଚାରିତ ହେବା ପରେ ଗତକାଲି ବିଳମ୍ବିତ ବିଳମ୍ବିତ ରାତିରେ କ୍ୟାମ୍ପସ୍ରେ ଉତ୍ତେଜନା ପ୍ରକାଶ ପାଇଥିଲା। ଖବର ପାଇ ମଞ୍ଚେଶ୍ୱର ଥାନା ଇନ୍ସପେକ୍ଟର କୃଷ୍ଣ ପ୍ରସାଦ ମିଶ୍ର କଲେଜରେ ପହଞ୍ଚିଥିଲେ ଏବଂ ପୁଲିସ ରାତାରାତି ଅଭିଯୁକ୍ତ ମନୋଜକୁ ଘରୁ ଉଠାଇ ଆଣିଥିଲା। ଆସନ୍ତାକାଲି ମନୋଜକୁ କୋର୍ଟ ଚାଲାଣ କରାଯିବ। ତେବେ ଗିରଫ ହେବା ପରେ ମନୋଜ ମିଛ ଅଭିଯୋଗରେ ତା’କୁ ଫସାଇ ଦିଆଯାଇଥିବା ପ୍ରକାଶ କରିଛି। ତେଣୁ ଛାତ୍ରୀ ଓ ଅଭିଯୁକ୍ତ ଆଟେଣ୍ଡାଣ୍ଟଙ୍କ ମଧ୍ୟରୁ କିଏ ସତ କହୁଛନ୍ତି ତାହା ପୁଲିସକୁ ମଧ୍ୟ ଦ୍ୱନ୍ଦ୍ୱରେ ପକାଇଛି।
Sambad is now on WhatsApp
Join and get latest news updates delivered to you via WhatsApp
ମଞ୍ଚେଶ୍ୱର ଥାନା ଇନ୍ସପେକ୍ଟର ଶ୍ରୀ ମିଶ୍ରଙ୍କ ସୂଚନା ଅନୁଯାୟୀ, କଲେଜର ଏକ ସାଂସ୍କୃତିକ କାର୍ଯ୍ୟକ୍ରମର ର୍ୟାମ୍ପ୍ ସୋ’ ପାଇଁ ଗତକାଲି ରାତିରେ ରିହର୍ସଲ ଚାଲିଥିଲା। ଛାତ୍ରୀ ଜଣକ ଏହି ରିହର୍ସଲରେ ଯୋଗ ଦେବାକୁ ଯାଇଥିଲେ। ରାତି ପ୍ରାୟ ୯ଟାବେଳେ ସେ ରହର୍ସଲରୁ ଫେରି ତାଙ୍କ ପୁରୁଷ ବନ୍ଧୁଙ୍କ ସହିତ ଏକ ଅନ୍ଧାରିଆ ସ୍ଥାନରେ ଗପସପ ହେଉଥିଲେ। ଏହି ସମୟରେ ଆଟେଣ୍ଡାଣ୍ଟ୍ ମନୋଜ ସେଠାରେ ପହଞ୍ଚି ଛାତ୍ରୀଙ୍କ ପୁରୁଷ ବନ୍ଧୁଙ୍କୁ ଧମକଚମକ ଦେବା ସହିତ ଏ ନେଇ ଅଧ୍ୟକ୍ଷଙ୍କ ନିକଟରେ ଅଭିଯୋଗ କରିବ ବୋଲି କହିଥିଲା। ଏହାପରେ ଛାତ୍ରୀଙ୍କ ପୁରୁଷ ବନ୍ଧୁଙ୍କୁ ବିଦା କରି ଦେଇ ମନୋଜ ଛାତ୍ରୀଙ୍କୁ ହଷ୍ଟେଲରେ ଛାଡ଼ି ଦେବ କହି ତା’ ରୁମ୍କୁ ନେଇ ଯାଇଥିଲା ଏବଂ ସେଠାରେ କବାଟ ଭିତର ପଟୁ ବନ୍ଦ କରି ଜବରଦସ୍ତ ଦୁଷ୍କର୍ମ କରିଥିଲା। କିଛି ସମୟ ପରେ ଛାତ୍ରୀ ଜଣକ ମନୋଜକୁ ଧକ୍କା ମାରି ରୁମ୍ ବାହାରକୁ ବାହାରି ଆସିବା ସହ ହଷ୍ଟେଲକୁ ପଳାଇ ଆସିଥିଲେ।
ଏ ନେଇ ପ୍ରଥମେ ସେ ନିଜ ରୁମ୍ ମେଟ୍ଙ୍କୁ କହିଥିଲେ ଏବଂ ପରେ ଜଣେ ସିନିଅର ଛାତ୍ରଙ୍କୁ ହଷ୍ଟେଲକୁ ଡାକି ସେ ଘଟଣା ସମ୍ପର୍କରେ ଆଲୋଚନା କରିଥିଲେ। ଆଉ ଏହି ଘଟଣା ପ୍ରଚାରିତ ହୋଇଯିବା ପରେ କଲେଜରେ ଉତ୍ତେଜନା ପ୍ରକାଶ ପାଇଥିଲା। ସେତେବେଳକୁ ସମୟ ରାତି ପ୍ରାୟ ୨ଟା ବାଜି ଯାଇଥିଲା। ଖବର ପାଇ ହାଇଟେକ୍ କର୍ତୃପକ୍ଷ ଓ ମଞ୍ଚେଶ୍ୱର ଥାନା ଇନ୍ସପେକ୍ଟର କଲେଜରେ ପହଞ୍ଚିଥିଲେ। ରାତି ପ୍ରାୟ ୩ଟାବେଳେ ଏ ନେଇ ଛାତ୍ରୀ ଜଣକ ଥାନାରେ ଲିଖିତ ଅଭିଯୋଗ କରିବା ପରେ ପୁଲିସ ଆଟେଣ୍ଡାଣ୍ଟ ମନୋଜକୁ ସେ କ୍ୟାମ୍ପସ ଭିତରେ ରହୁଥିବା ଘରୁ ଗିରଫ କରିଥିଲା। ପୁଲିସ ପୀଡ଼ିତା ଓ ଅଭିଯୁକ୍ତକୁ କ୍ୟାପିଟାଲ ହସ୍ପିଟାଲ ନେଇ ଡାକ୍ତରୀ ମାଇନା ମଧ୍ୟ କରାଇଛି। ଏହାଛଡ଼ା ସିଆରପିସିର ଧାରା ୧୬୧ ଓ ୧୬୪ ଅନୁଯାୟୀ ଛାତ୍ରୀଙ୍କ ବୟାନ ମଧ୍ୟ ରେକର୍ଡ ହୋଇଛି ବୋଲି ଇନ୍ସପେକ୍ଟର ମିଶ୍ର କହିଛନ୍ତି। ଅନ୍ୟପକ୍ଷରେ ଛାତ୍ରୀଙ୍କ ଘର ସମ୍ବଲପୁରରେ ହୋଇଥିବାବେଳେ ତାଙ୍କ ପୁରୁଷ ବନ୍ଧୁଙ୍କ ଘର ବଲାଙ୍ଗୀରରେ। ଦୁହେଁ ହାଇଟେକ ମେଡିକାଲ କଲେଜର ପ୍ରଥମ ବର୍ଷର ଛାତ୍ର।