ସୋହେଲାରେ ବିଜେପି ନେତାଙ୍କୁ ମରଣାନ୍ତକ ଆକ୍ରମଣ, ୪ ଗିରଫ
ବରଗଡ଼/ସୋହେଲା : ରାଜ୍ୟ ବିଜେପି ଯୁବମୋର୍ଚ୍ଚା ସଂପାଦକ ଇରାଶିଷ ଆଚାର୍ଯ୍ୟଙ୍କୁ ସୋହେଲା ସହରରେ ମରଣାନ୍ତକ ଆକ୍ରମଣ ହୋଇଛି। ଏଥିରେ ଇରାଶିଷ ଗୁରୁତର ଆହତ ହୋଇଛନ୍ତି। ତାଙ୍କ ମୁଣ୍ଡ ଫାଟି ଯାଇଥିବାବେଳେ ଶରୀରର ବିଭିନ୍ନ ସ୍ଥାନରେ ଆଘାତ ଲାଗିଛି। ଇରାଶିଷ ଥିବା ଗାଡ଼ିକୁ ମଧ୍ୟ ଦୁର୍ବୃତ୍ତମାନେ ଭାଂଗିରୁଜି ପକାଇଛନ୍ତି। ଶନିବାର ସଂଧ୍ୟା ସାଢ଼େ ୫ଟା ବେଳେ ସୋହେଲାର ଜନଗହଳିପୂର୍ଣ୍ଣ ବ୍ଲକ ଛକ ପାଖରେ ଏହି ଆକ୍ରମଣ ହୋଇଥିଲା। ସବିଶେଷ ଖବର ଅନୁସାରେ ଏହି ଘଟଣାରେ ସୋହେଲା ପୁଲିସ ଜିରୋ ମାଝି, ସନ୍ତୋଷ ସୁନା, ରାଜକୁମାର ସାହୁ ଓ ବିକାଶ ପ୍ରଧାନଙ୍କୁ ଗିରଫ କରିଛି। ବନାବିରା ଆକ୍ରମଣ ମାମଲାରେ ଜାମିନ ନାମଞ୍ଜୁର ପରେ ପୂର୍ବତନ ମନ୍ତ୍ରୀ ଜୟନାରାୟଣ ମିଶ୍ର ସୋହେଲା ଜେଲ୍ ହାଜତରେ ଅଛନ୍ତି। ତାଙ୍କୁ ସାକ୍ଷାତ କରିବା ପାଇଁ ବିଜେପି ରାଜ୍ୟ ସଂପାଦକ ରଂଜନ ପଟେଲ, ଇରାଶିଷ, ବରିଷ୍ଠ ନେତା ସୁଶାନ୍ତ ମିଶ୍ର ଏବଂ ସମ୍ବଲପୁର ଜିଲ୍ଲାର କିଛି କର୍ମକର୍ତା ଭେଟିବାକୁ ଯାଇଥିଲେ।
Sambad is now on WhatsApp
Join and get latest news updates delivered to you via WhatsApp
ଶ୍ରୀ ମିଶ୍ରଙ୍କୁ ସାକ୍ଷାତ କରିବା ପରେ ସମସ୍ତେ ବ୍ଲକ ଛକ ପାଖକୁ ଶ୍ରୀ ପଟେଲଙ୍କ ନୂଆ ଗାଡ଼ିରେ ଆସିଥିଲେ। ଛକ ପାଖ ଦୋକାନରେ ସମସ୍ତେ ଚା’ ପିଉଥିବାବେଳେ ଅଚାନକ ଗୁଡ଼ାଏ ବାଇକ୍ରେ ୨୫/୨୬ଜଣ ଯୁବକ ଆସିଥିଲେ। ସେଠାରେ ‘ଇରାଶିଷ’ କିଏ ବୋଲି ପଚାରିଥିଲେ। ଜଣେ ଯୁବକ ଇରାଶିଷଙ୍କୁ ଚିହ୍ନଟ କରିବା ପରେ ଲୁହାରଡ୍ ଏବଂ କାଠ ଫାଳିଆରେ ଆକ୍ରମଣ ହୋଇଥିଲା। ଅନ୍ୟ ବିଜେପି ନେତା ଇରାଶିଷଙ୍କୁ ମୁକୁଳାଇବାକୁ ଚେଷ୍ଟା କରିଥିଲେ ହେଁ ଦୁର୍ବୃତ୍ତମାନେ ମାଡ଼ ମାରି ଚାଲିଥିଲେ। ଏଥିରେ ଇରାଶିଷ ବେହୋସ ହୋଇଯାଇଥିଲେ। ତାଙ୍କୁ ଗୁରୁତର ଅବସ୍ଥାରେ ବରଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟକୁ ଅଣାଯାଇଥିଲା। ମୁଣ୍ଡରେ ୯ଟି ସ୍ଟିଚ୍ ହେବା ପରେ ତାଙ୍କୁ ଗୋଟିଏ ଘରୋଇ ନର୍ସିଂହୋମକୁ ସିଟି ସ୍କାନ ପାଇଁ ପଠାଯାଇଥିଲା। ତେବେ ତାଙ୍କୁ ଡାକ୍ତର ବୁର୍ଲା ମେଡିକାଲକୁ ସ୍ଥାନାନ୍ତର କରିବା ପାଇଁ ପରାମର୍ଶ ଦେଇଛନ୍ତି। ଅନ୍ୟପକ୍ଷରେ ଏହି ଘଟଣା ନେଇ ରାଜ୍ୟ ସଂପାଦକ ଶ୍ରୀ ପଟେଲ ବରଗଡ଼ ଟାଉନ ଥାନାରେ ଲିଖିତ ଅଭିଯୋଗ କରିଛନ୍ତି। ମନ୍ତ୍ରୀ ସୁଶାନ୍ତ ସିଂଙ୍କ ଇଂଗିତରେ ଏହି ଆକ୍ରମଣ ହୋଇଥିବା ସେ ଅଭିଯୋଗ ପତ୍ରରେ ଦର୍ଶାଇଛନ୍ତି। ଅନ୍ୟପକ୍ଷରେ ସୋହେଲାର ସନ୍ତୋଷ ସୁନା ନାମକ ଜଣେ ଯୁବକ ଇରାଶିଷଙ୍କ ବିରୋଧରେ ସୋହେଲା ଥାନାରେ ଏତଲା ଦେଇଛନ୍ତି। ଶନିବାର ଅପରାହ୍ନ ସାଢ଼େ ୪ଟାରେ ଇରାଶିଷ ତାଙ୍କୁ ଜାତିଆଣ ଆକ୍ଷେପ କରିବା ସହ ହତ୍ୟା ଧମକ ଦେଇଥିବା ସେ ଥାନାରେ ଅଭିଯୋଗ କରିଛନ୍ତି। ଏହି ଘଟଣାକୁ ନେଇ ସୋହେଲା ସହରରେ ସାମାନ୍ୟ ଉତ୍ତେଜନା ପ୍ରକାଶ ପାଇଛି।
ବିଧାନସଭାରେ ଧାରଣାରେ ବସିଲେ ରବି ନାଏକ
ଭୁବନେଶ୍ୱର : ସୋହେଲାରେ ବିଜେପି ଯୁବ ନେତାଙ୍କୁ ଆକ୍ରମଣ ଘଟଣା ପ୍ରସଙ୍ଗ ଆଜି ବିଧାନସଭାରେ ଉଠିଛି। ଅପରାହ୍ନରେ ଅର୍ଥ ମନ୍ତ୍ରୀ ବଜେଟ୍ ଉପରେ କହୁଥିଲା ବେଳେ ବିଜେପି ବିଧାୟକ ରବି ନାଏକ ନିଜ ଆସନରେ ଛିଡ଼ା ହୋଇ ସୋହେଲା ଆକ୍ରମଣ ବିଷୟରେ ବାଚସ୍ପତିଙ୍କ ଦୃଷ୍ଟି ଆକର୍ଷଣ କରିଥିଲେ। ସେ କହିଲେ, ପୂର୍ବତନ ମନ୍ତ୍ରୀ ଜୟନାରାୟଣ ମିଶ୍ରଙ୍କୁ ଜେଲ୍ରେ ଦେଖା କରି ଫେରିଲା ବେଳେ ବିଜେପି ଯୁବମୋର୍ଚ୍ଚା ସଂପାଦକ ଇରାଶିଷ ଆଚାର୍ଯ୍ୟ ଓ ବିଜେପି ରାଜ୍ୟ ସଂପାଦକ ରଂଜନ ପଟେଲଙ୍କ ଉପରେ ଆକ୍ରମଣ ହୋଇଛି। ଶ୍ରମ ମନ୍ତ୍ରୀଙ୍କ ଭାଇ ଏହି ଆକ୍ରମଣରେ ଜଡ଼ିତ। ଶ୍ରୀ ନାଏକଙ୍କ କଥା ପ୍ରତି ବାଚସ୍ପତି ଧ୍ୟାନ ନ ଦେବାରୁ ସେ ଗୃହ ମଧ୍ୟ ଭାଗକୁ ଆସି ବାଚସ୍ପତିଙ୍କ ପୋଡିୟମ୍ ତଳେ ଧାରଣାରେ ବସିଥିଲେ। ବାଚସ୍ପତି ତାଙ୍କୁ ଆସନକୁ ଫେରିଯିବା ପାଇଁ କହିଥିଲେ ମଧ୍ୟ ସେ ଧାରଣାରୁ ଉଠି ନ ଥିଲେ। ଗୃହ ମୁଲତବୀ ହେବା ପର୍ଯ୍ୟନ୍ତ ସେ ସେଠାରେ ବସି ରହିଥିଲେ। ଏହି ସମୟରେ ବିଜେପିର ଅନ୍ୟ କୌଣସି ସଦସ୍ୟ ଗୃହରେ ଉପସ୍ଥିତ ନ ଥିଲେ।