ଅର୍ଜୁନଙ୍କ ପରେ ଯୁଗଳଙ୍କ ଟିକଟ କଟିଲା :ଧାମନଗର ବିଜେଡି ଅଙ୍କ ଛିଡ଼ୁନି

ଲୋକସଭା ପ୍ରାର୍ଥୀ ଘୋଷଣା କରିନି ବିଜେପି
ଭଦ୍ରକ: ଚତୁର୍ଥ ପର୍ଯ୍ୟାୟରେ ହେବାକୁ ଥିବା ଭଦ୍ରକ ଜିଲ୍ଲାରେ ସାଧାରଣ ନିର୍ବାଚନ ପାଇଁ ସବୁ ଦଳ ପକ୍ଷରୁ ପ୍ରାର୍ଥୀ ଘୋଷଣାକୁ ନେଇ କସରତ ଲାଗି ରହିଥିବା ବେଳେ ଆଜି ଅପରାହ୍ନରେ ବିଜେଡି ସୁପ୍ରୀମୋ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭଦ୍ରକ ବିଧାନସଭା କ୍ଷେତ୍ର ପାଇଁ ଦଳୀୟ ପ୍ରାର୍ଥୀ ଭାବେ ବିଜେଡିର ଯୁବନେତା ସଂଜୀବ ମଲ୍ଲିକଙ୍କ ନାମ ‌ଘୋଷଣା କରିଛନ୍ତି। ସଂଜୀବ ହେଉଛନ୍ତି ଧାମନଗରର ପୂର୍ବତନ ବିଧାୟକ ସ୍ବର୍ଗତ ହୃଦାନନ୍ଦ ମଲ୍ଲିକଙ୍କ ପୁତ୍ର ଓ ପୂର୍ବତନ ବିଧାୟକ ସ୍ବର୍ଗତ ମାନସ ମଲ୍ଲିକଙ୍କ ସାନ ଭାଇ। ଏହା ଫଳରେ ଭଦ୍ରକର ପ୍ରବୀଣ ରାଜନେତା ଯୁଗଳ କିଶୋର ପଟ୍ଟନାୟକ ଏବଂ ତାଙ୍କ ପୁଅ ଅସିତ ପଟ୍ଟନାୟକ (ବୁଲୁ)ଙ୍କୁ ନେଇ ଲାଗି ରହିଥିବା କଳ୍ପନାଜଳ୍ପନାର ଅବସାନ ଘଟିଛି।
ଭଦ୍ରକ ବିଧାନସଭା ଆସନରେ ବିଜେଡି ଟିକଟ ପାଇଁ ସଂଜୀବ (ବଣୁ) ଓ ବୁଲୁଙ୍କ ମଧ୍ୟରେ ପ୍ରତିଦ୍ବନ୍ଦ୍ବିତା ଲାଗି ରହିଥିଲା। ଶେଷରେ ଟିକଟ ଲବିରେ ବଣୁଙ୍କର ଜିତାପଟ ହୋଇଛି। ୨୦୦୯ ସାଧାରଣ ନିର୍ବାଚନରେ ଯୁଗଳ ବାବୁ ଭଦ୍ରକ ବିଧାନସଭା ‌କ୍ଷେତ୍ରରେ ବିଜେଡି ଟିକଟରେ ନିର୍ବାଚନ ଲଢି ବିଜୟୀ ହୋଇଥିଲେ। ତାଙ୍କୁ ଦ୍ବିତୀୟ ବାର ଏଇ ଆସନରୁ ୨୦୧୪ ସାଧାରଣ ନିର୍ବାଚନରେ ବିଜେଡି ଦଳ ଟିକଟ ଦେଇଥିଲା। ଯୁଗଳ ଏଇ ଆସନରୁ ୨୪ ହଜାରରୁ ଅଧିକ ଭୋଟ ପାଇ ଦ୍ବିତୀୟ ବାର ବିଜୟୀ ହୋଇଥିଲେ। ତେବେ ଯୁଗଳଙ୍କର ବୟସ ଅଧିକ ହୋଇଥିବାରୁ ଏବଂ ସ୍ବାସ୍ଥ୍ୟଗତ କାରଣ ପାଇଁ ଏଥର ନିର୍ବାଚନ ଲଢିବେ ନାହିଁ ବୋଲି ମୁଖ୍ୟମନ୍ତ୍ରୀଙ୍କୁ କହିଥିବା ବେଳେ ନିଜ ପୁଅ ବୁଲୁଙ୍କୁ ଦଳୀୟ ଟିକଟ ଦିଆଯାଉ ବୋଲି ଅନୁରୋଧ କରିଥିଲେ। ଏହାକୁ ନେଇ ବୁଲୁଙ୍କ ସମର୍ଥକମାନେ ଆଶା ବାନ୍ଧି ବସିଥିଲେ। ମାତ୍ର ମୁଖ୍ୟମନ୍ତ୍ରୀ ଶେଷରେ ଆଜି ଭଦ୍ରକ ଆସନ ପାଇଁ ସଂଜୀବ ମଲ୍ଲିକଙ୍କ ନାମ ଘୋଷଣା କରିଥିବାରୁ ଯୁଗଳ ଓ ବୁଲୁଙ୍କ ଶିବିରରେ ନୈରାଶ୍ୟ ଖେଳି ଯାଇଛି। ଅନ୍ୟପଟରେ ସଂଜୀବ ଧରିଥିବାରୁ ତାଙ୍କ ସମର୍ଥକ ବାଣ ଫୁଟାଇ ବେଶ୍ ଉଲ୍ଲସିତ ହୋଇଛନ୍ତି।
ଲକ୍ଷ୍ୟ କରିବାର ବିଷୟ ହେଲା, ଏଥର ମୁଖ୍ୟମନ୍ତ୍ରୀ ଭଦ୍ରକ ଜିଲ୍ଲାରୁ ତିନି ବରିଷ୍ଠ ନେତା ସାଂସଦ ଅର୍ଜୁନ ଚରଣ ସେଠୀ, ବିଧା‌ୟକ ଯୁଗଳ କିଶୋର ପଟ୍ଟନାୟକ ଓ ବିଧାୟକ ମୁକ୍ତିକାନ୍ତ ମଣ୍ଡଳଙ୍କୁ ନିର୍ବାଚନରୁ ଅନ୍ତର କରିଛନ୍ତି। ବିଜେଡିର ଲୋକସଭା ପ୍ରାର୍ଥୀ ଭାବେ ବିଧାୟକ ମୁକ୍ତିକାନ୍ତ ମଣ୍ଡଳଙ୍କ ପତ୍ନୀ ମଂଜୁଲତା ମଣ୍ଡଳଙ୍କ ନାମ ଦୁଇ ଦିନ ତଳେ ଘୋଷଣା କରିଥିଲେ। ସେହିପରି ୫ ବିଧାନସଭା କ୍ଷେତ୍ରରେ ଭଣ୍ଡାରିପୋଖରୀରେ ମନ୍ତ୍ରୀ ପ୍ରଫୁଲ୍ଲ ସାମଲ, ଚାନ୍ଦବାଲିରେ ବ୍ୟୋମକେଶ ରାୟ, ବାସୁଦେବପୁରରେ ବିଜୟଶ୍ରୀ ରାଉତରାୟଙ୍କ ପୁତ୍ର ବିଷ୍ଣୁବ୍ରତ ରାଉତରାୟ ଓ ଆଜି ଭଦ୍ରକରେ ସଂଜୀବ ମଲ୍ଲିକଙ୍କ ନାମ ଘୋଷଣା କରିଥିବାବେଳେ କେବଳ ଧାମନଗର ବିଧାନସଭା କ୍ଷେତ୍ରରେ ବିଜେଡି ପ୍ରାର୍ଥୀଙ୍କ ନାମ ଝୁଲି ରହିଛି। ସେହିପରି ବିଜେପି ଭଦ୍ରକ ବିଧାନସଭା କ୍ଷେତ୍ରରେ ଡା. ପ୍ରଦୀପ ନାୟକ, ଧାମନଗରରେ ବିଷ୍ଣୁ ସେଠୀ, ଚାନ୍ଦବାଲିରେ ମନମୋହନ ସାମଲ, ବାସୁଦେବପୁରରେ ମାଧବାନନ୍ଦ ମଲ୍ଲିକ, ଭଣ୍ଡାରିପୋଖରୀରେ ବଦ୍ରିନାରାୟଣ ଧଳଙ୍କ ନାମ ଘୋଷଣା କରିଥିବା ବେ‌‌ଳେ ଏଯାଏ ଭଦ୍ରକ ଲୋକସଭା ପ୍ରାର୍ଥୀ ଘୋଷଣା କରିନାହିଁ।
ଅନ୍ୟପକ୍ଷରେ ଆଜି କଂଗ୍ରେସ ପକ୍ଷରୁ ଭଦ୍ରକ ଜିଲ୍ଲାର ତିନି ନୂଆ ମୁହଁକୁ ପ୍ରାର୍ଥୀ ତାଲିକାରେ ସ୍ଥାନ ଦେଇଛି। ବରିଷ୍ଠ କଂଗ୍ରେସ ନେତା ତଥା ପୂର୍ବତନ ସାଂସଦ ଅନନ୍ତ ପ୍ରସାଦ ସେଠୀଙ୍କ ଝିଅ ଇଂ ମଧୁମିତା ସେଠୀଙ୍କ ଭଦ୍ରକ ଲୋକସଭା ପାଇଁ କଂଗ୍ରେସ ଦଳ ପକ୍ଷରୁ ପ୍ରାର୍ଥୀ କରାଯାଇଛି। ସେହିପରି ଧାମନଗର ବିଧାନସଭା କ୍ଷେତ୍ର ପାଇଁ ଦଳ ଡା. ବିଦ୍ୟାଧାର ଜେନାଙ୍କୁ ପ୍ରାର୍ଥୀ ଭାବେ ଘୋଷଣା କରିଥିବା ବେଳେ ବାସୁଦେବପୁର ବିଧାନସଭା ‌କ୍ଷେତ୍ର ପାଇଁ କଂଗ୍ରେସର ଜିଲ୍ଲା ସଭାପତି ତଥା ପୌରାଧ୍ୟକ୍ଷ ଅଶୋକ ନାୟକଙ୍କ ନାମ ଘୋଷଣା କରାଯାଇଛି। ଅଶୋକଙ୍କ ନାମ ଘୋଷଣା ହେବା ପରେ ଆଜି ବାସୁଦେବପୁର କଂଗ୍ରେସ କର୍ମୀଙ୍କ ମହଲରେ ଉତ୍ସାହ ପରିଲକ୍ଷିତ ହୋଇଛି। ସେହିପରି କଂଗ୍ରେସ ମଧୁମିତାଙ୍କୁ ଲୋକସଭା ପ୍ରାର୍ଥୀ ଘୋଷଣା କରି ମହିଳା କାର୍ଡ ଖେଳିଛି। ଭଦ୍ରକ ଲୋକସଭା ମଇଦାନରେ ଏବେ ବିଜେଡିର ମଂଜୁଲତା ଓ କଂଗ୍ରେସର ମଧୁମିତାଙ୍କୁ ନେଇ ଚର୍ଚ୍ଚା ଜୋରଦାର ଚାଲିଥିବା ବେଳେ ବିଜେପି ମଧ୍ୟ ଭଦ୍ରକ ଲୋକସଭା ପାଇଁ କାହାକୁ ପ୍ରାର୍ଥୀ କରୁଛି ତାହା ଉପରେ ସମସ୍ତଙ୍କ ନଜର ରହିଛି।