ଯୁବତୀଙ୍କ ଅଶ୍ଳୀଳ ଫଟୋ ଭାଇରାଲ୍ : କ୍ରାଇମ୍ବ୍ରାଞ୍ଚ ହାତରେ ଦିଲ୍ଲୀର ଅଭିଯୁକ୍ତ ଛାତ୍ର
କଟକ : ଓଡ଼ିଶାର ଜଣେ ଯୁବତୀଙ୍କ ଅଶ୍ଳୀଳ ଫଟୋ ଫେସ୍ବୁକ୍ରେ ଭାଇରାଲ୍ ହେବା ଅଭିଯୋଗରେ ଦିଲ୍ଲୀର ଜଣେ ଛାତ୍ରକୁ କ୍ରାଇମ୍ବ୍ରାଞ୍ଚ ସାଇବର୍ ସେଲ୍ ଆଜି ଗିରଫ କରିଛି । ଅଭିଯୁକ୍ତ ଛାତ୍ର ମନିଶ ଝା(୨୬)। ତା’ ନିକଟରୁ ଅପରାଧରେ ବ୍ୟବହୃତ ହୋଇଥିବା ମୋବାଇଲ୍ ଫୋନ୍, ସିମ୍ କାର୍ଡ, ମେମୋରି କାର୍ଡ ଜବତ କରାଯାଇଥିବା ସୂଚନା ମିଳିଛି ।
Sambad is now on WhatsApp
Join and get latest news updates delivered to you via WhatsApp
ଦିଲ୍ଲୀ ଡାଲୁପୁରରେ ରହୁଥିବା ବିହାର ସୀତାମାରହି ଅଞ୍ଚଳର ଛାତ୍ର ମନିଶ ଝା ଓଡ଼ିଶାର ଜଣେ ଯୁବତୀଙ୍କ ନାଁରେ ଫେସ୍ବୁକରେ ଜାଲ୍ ଆକାଉଣ୍ଟ ଖୋଲିଥିଲା । ଏଥିରେ ସେ ସମ୍ପୃକ୍ତ ଯୁବତୀଙ୍କ ଆପତ୍ତିଜନକ ଫଟୋ ପୋଷ୍ଟ କରିଥିଲା । ଅନେକ ସମୟରେ ଯୁବତୀଙ୍କ ପରିବାର ଲୋକଙ୍କ ହ୍ଵାଟ୍ସଆପ୍ ନମ୍ବରକୁ ମଧ୍ୟ ଉକ୍ତ ଫଟୋ ପଠାଇଥିଲା । ଏ ପ୍ରକାର ଘଟଣା ମାସ ମାସ ଧରି ଯୁବତୀଙ୍କ ସହିତ ଘଟୁଥିବାରୁ ପରିବାର ଲୋକେ ଏକ ପ୍ରକାର ଭୟଭୀତ ହୋଇଯାଇଥିଲେ । ଏ ସଂକ୍ରାନ୍ତରେ ୨୦୧୭ ଏପ୍ରିଲ ୭ ତାରିଖରେ ରାଜ୍ୟ କ୍ରାଇମ୍ ବ୍ରାଞ୍ଚର ସାଇବର ସେଲ୍ରେ ପରିବାର ଲୋକେ ଲିଖିତ ଅଭିଯୋଗ କରିଥିଲେ ।
ପୁଲିସ ଆଇପିସିର ଦଫା ୨୯୨, ୩୫୪, ଡି/୪୬୫, ୪୬୯, ୫୦୬, ୫୦୯ ଏବଂ ସୂଚନା ଓ ପ୍ରଯୁକ୍ତି ବିଦ୍ୟା ଆଇନ, ୨୦୦୦ର ଦଫା ୬୬, ୬୬-ସି, ୬୭, ୬୭-ଏ’ରେ ଏକ ମାମଲା(କେସ୍ ନଂ ୧୧) ରୁଜୁ କରିଥିଲା । ଘଟଣାର ତଦନ୍ତ ସମୟରେ ମନିଶର ଠିକଣା ଠାବ କରିବା ପରେ ତାକୁ ଧରିବାକୁ ଯୋଜନା ପ୍ରସ୍ତୁତ କରିଥିଲା କ୍ରାଇମବ୍ରାଞ୍ଚ୍ । ଦିଲ୍ଲୀରୁ କ୍ରାଇମ୍ବ୍ରାଞ୍ଜର ଏକ ଟିମ୍ ମନିଶକୁ ଗିରଫ କରିିଥିଲା । ଆଜି ତାକୁ କଟକ ସଦର ଏସ୍ଡିଜେଏମ୍ଙ୍କ କୋର୍ଟରେ ହାଜର ପରେ ଜେଲ୍ ହାଜତକୁ ପଠାଇ ଦିଆଯାଇଛି।