ଧରପଗଡ଼ ସତ୍ତ୍ୱେ କନ୍ଧମାଳରୁ କମୁନି ଗଂଜେଇ ଚାଲାଣ, କାରରୁ ୩୫ କିଲୋ ଜବତ,୨ ଆନ୍ତଃଜିଲ୍ଲା ଅଭିଯୁକ୍ତ ଗିରଫ
ଫୁଲବାଣୀ: ଗଂଜେଇ ଚାଷ ହେଉ କି ଚାଲାଣ। ଏହାକୁ ରୋକିବା ନିମନ୍ତେ ପୁଲିସ ଓ ଅବକାରୀ ବିଭାଗ ପକ୍ଷରୁ ଧରପଗଡ଼ ଚାଲିଛି। ପ୍ରତିବର୍ଷ ନଭେମ୍ବରଠାରୁ ଡିସେମ୍ବର ପର୍ଯ୍ୟନ୍ତ ଗଂଜେଇ ଗଛ କଟା ହେଉଛି। ଆଉ ବର୍ଷ ତମାମ ଧରପଗଡ ଜାରି ରହିଛି। ତାସତ୍ତ୍ୱେ କନ୍ଧମାଳରେ ଗଂଜେଇ ଚାଷ ଓ ଚାଲାଣ କମୁନି। ପୁଲିସ ହେଉ କି ଅବକାର ବିଭାଗ। ଗଂଜେଇ ମାଫିଆଙ୍କ ସହ ଏହି ଦୁଇ ବିଭାଗର କିଛି ଲାଞ୍ଚୁଆ ଅଧିକାରୀ ଓ କର୍ମଚାରୀ ସଂପୃକ୍ତି ରହିଛି। ଏମିତି କି ଏସକର୍ଟ କରି ଗଂଜେଇ ଗାଡିକୁ ଜିଲ୍ଲାର ପାର କରୁଥିବା ଜଣାପଡ଼ିଛି।
Sambad is now on WhatsApp
Join and get latest news updates delivered to you via WhatsApp
କନ୍ଧମାଳରୁ ଜଗତସିଂପୁରକୁ କାରରେ ଗଂଜେଇ ଚାଲାଣ ହେଉଥିଲା। ଫିରିଙ୍ଗିଆ ପୁଲିସ ବିଶେଷ ସୁତ୍ରରୁ ଖବର ପାଇ ଯାଞ୍ଚ କରିବା ପରେ ଓଡି-୨୪-୭୨୧୪ ନମ୍ବର ଏକ ସୁପ୍ଟଟ କାରରୁ ୩୫ କିଲୋ ଗଂଜେଇ ମିଳିଥିଲା। କାର ସହ ଗଂଜେଇ ପୁଲିସ ଜବତ କରିବା ସହ ଜଗତସିଂପୁର ରଘୁନାଥପୁରର ବାସୁଦେବ ସିଂ(୩୦) ଓ ନୟାଗଡ ଦଶପଲ୍ଲାର ବାବୁନା ସ୍ୱାଇଁ(୨୯)ଙ୍କୁ ପୁଲିସ ଗିରଫ କରିଛି। ଗିରଫ ୨ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇ ଥିବା ନେଇ ଥାନାଧିକାରୀ ଶ୍ୟାମସୁନ୍ଦର ରାୟ କହିଛନ୍ତି।
ସବୁଠାରୁ ବଡ଼ କଥା ହେଲା ଯେ, କେତେ ବେଳେ ଦାମିକା କାର ତ ଆଉ କେତେ ବେଳେ କୁଣ୍ଡା ଓ ମୁଢି ଭର୍ତ୍ତି ଗାଡିରେ ଗଂଜେଇ ଚାଲାଣ ହେଉଛି। ଚାଲାଣକାରୀମାନେ କୌଶଳକ୍ରମେ ଏଠାରୁ ଖସି ଯାଉଥିବା ବେଳେ ଗଂଜେଇ ମାଫିଆମାନେ ଅନ୍ୟ ଜିଲ୍ଲା ପୁଲିସ ହାତରେ ଧରା ପଡୁଛନ୍ତି। କନ୍ଧମାଳରେ ଗଂଜେଇ ଚାଲାଣ ବନ୍ଦ କରିବା ନିମନ୍ତେ ପୁଲିସ ଓ ଅବକାରୀ ବିଭାଗର ଧରଗପଗଡ ଜୋରଦାର ହେବା ଜରୁରୀ ହୋଇ ପଡିଛି।