ବ୍ରଜରାଜନଗର: ଝାରସୁଗୁଡ଼ା ଜିଲ୍ଲା ବ୍ରଜରାଜନଗର ପୁଲିସ୍କୁ ଗୁରୁବାର ରାତିରେ ମିଳିଛି ଏକ ବଡ଼ ଧରଣର ସଫଳତା। ଏକ ଜୁଆ ଆଡ୍ଶାରେ ଚଢ଼ଉ କରି ୧୦ ଜଣ ଜୁଆଡ଼ିଙ୍କୁ ଗିରଫ କରିବା ସହ ସେଠାରୁ ୭୫ ହଜାର ଟଙ୍କା, ୫ଟି ବାଇକ୍ ଓ ୨ଟି ମୋବାଇଲ୍ ଜବତ କରିଛି। ପ୍ରାପ୍ତ ସୂଚନାନୁସାରେ ବ୍ରଜରାଜନଗର ଗଙ୍ଗାନଗରରେ ଜୁଆ ଖେଳ ଚାଲିଥିବା ସୂଚନା ପାଇଁ ପୁଲିସ୍ ଗୁରୁବାର ରାତି ପ୍ରାୟ ୧୦ଟା ବେଳେ ଚଢ଼ଉ କରିଥିଲା। ସେଠାରେ ଜୁଆ ଖେଳୁଥିବା ୧୦ ଜଣଙ୍କୁ ଗିରଫ ସହ ୭୫୧୬୦ ଟଙ୍କା ଓ ଉପରୋକ୍ତ ସାମଗ୍ରୀ ଜବତ କରିଥିଲା। ଶୁକ୍ରବାର ସେମାନଙ୍କୁ କୋର୍ଟ ଚାଲାଣ କରାଯାଇଥିବା ଜଣାପଡ଼ିଛି। ସୂଚନାଥାଉ କି ସହରର ଗଙ୍ଗାନଗର, ଲମଟିବାହାଲ, ଇବ୍ ପିଟ୍, ଗାନ୍ଧୀ ଛକ ଓ ବାହାଦୁରପଡ଼ା ଅଞ୍ଚଳ ସବୁବେଳେ ଜୁଆ ଖେଳକୁ ନେଇ ଚର୍ଚ୍ଚାରେ ରହି ଆସିଛି। ପୁଲିସ୍ ପକ୍ଷରୁ ଆଗାମୀ ଦିନରେ ଏଭଳି ଚଢ଼ଉ ଜାରି ରହିଲେ ଏଥିରେ ଅଂକୁଶ ଲାଗିବ ବୋଲି ଅଂଚଳବାସୀ କହିଛନ୍ତି। ଚଢ଼ଉରେ ବ୍ରଜରାଜନଗର ପୁଲିସ୍ ଓ ସ୍ପେଶାଲ୍ ସ୍କ୍ଵାଡ୍ ମିଳିତ ଭାବେ ସାମିଲ ହୋଇଥିଲେ।