ଛାତ୍ରୀଙ୍କୁ ଗଣଦୁଷ୍କର୍ମ ମାମଲା : ତିନି ଅଭିଯୁକ୍ତଙ୍କୁ ୨୦ ବର୍ଷ ଜେଲ୍
ଫୁଲବାଣୀ : କନ୍ଧମାଳ ଜିଲ୍ଲା ଖଜୁରିପଡ଼ା ଥାନା ଅଞ୍ଚଳରେ ଜଣେ ଦଶମ ଶ୍ରେଣୀ ଛାତ୍ରୀଙ୍କୁ ଗଣଦୁଷ୍କର୍ମ ମାମଲାରେ ତିନି ଜଣ ଅଭିଯୁକ୍ତଙ୍କୁ ୨୦ ବର୍ଷ ଜେଲ୍ ଦଣ୍ଡାଦେଶ ହୋଇଛି। ସମସ୍ତ ସାକ୍ଷ୍ୟ ପ୍ରମାଣ ଓ ଡାକ୍ତରୀ ମାଇନା ରିପୋର୍ଟକୁ ଆଧାର କରି ଫୁଲବାଣୀ ଅତିରିକ୍ତ ଜିଲ୍ଲା ଦୌରାଜଜ୍ ତଥା ସ୍ୱତନ୍ତ୍ର କୋର୍ଟ ଜଜ୍ ସୁଶାନ୍ତ ପଟେଲ ଏହି ମାମଲାରେ ଚିତ୍ତରଂଜନ କହଁର, ପ୍ରଭାତ କହଁର ଓ ରାଜୀବଲୋଚନ କହଁରଙ୍କୁ ଦୋଷୀ ସାବ୍ୟସ୍ତ କରି ୨୦ ବର୍ଷ ଲେଖାଏଁ ଜେଲଦଣ୍ଡ ସହ ପ୍ରତ୍ୟେକଙ୍କୁ ୨୨ ହଜାର ଟଙ୍କା ଜରିମାନା ଏବଂ ଜରିମାନା ଅର୍ଥ ଅନାଦେୟ ହେଲେ ଆହୁରି ଅଧିକ ୪ ବର୍ଷ ଜେଲଦଣ୍ଡ ଆଦେଶ ଦେଇଛନ୍ତି।
Sambad is now on WhatsApp
Join and get latest news updates delivered to you via WhatsApp
୨୦୧୫ ମସିହା ଜୁନ ୧୨ ତାରିଖ ରାତିରେ ଏହି ଘଟଣା ଘଟିଥିଲା। ନାବାଳିକା ଛାତ୍ରୀଙ୍କ ବାପା-ମା’ ଗାଁରେ ଜଣଙ୍କର ଭୋଜିକୁ ଯାଇଥିଲେ। ସେମାନେ ଆସିବାରେ ବିଳମ୍ବ ହେବାରୁ ଛାତ୍ରୀଜଣକ ସେମାନଙ୍କୁ ଡାକିବାକୁ ଯାଉଥିଲେ। ସାଙ୍ଗରେ ପଡ଼ିଶା ଘରର ଜଣେ ଛୋଟ ଝିଅ ମଧ୍ୟ ଥିଲା। ଗାଁ ରାସ୍ତାରେ ଅନ୍ଧାରର ସୁଯୋଗ ନେଇ ସେହି ଗାଁର ଚିତ୍ତରଂଜନ, ପ୍ରଭାତ ଓ ରାଜୀବ ତାଙ୍କୁ ଟଣାଓଟରା କରିଥିଲେ। ଭୟରେ ଛୋଟ ଝିଅଟି ସେଠାରୁ ପଳାଇ ଯାଇଥିଲା। ତା’ପରେ ୩ ଅଭିଯୁକ୍ତ ଛାତ୍ରୀଙ୍କୁ ପାଖ ଜଙ୍ଗଲକୁ ଟେକି ନେଇ ଜଣକ ପରେ ଜଣେ ଦୁଷ୍କର୍ମ କରିଥିଲେ। ଏହି କଥା କାହାରିକୁ କହିଲେ ଜୀବନରୁ ମାରି ଦେବାକୁ ଧମକ ଚମକ ଦେଇ ସେଠାରୁ ସେମାନେ ପଳାଇ ଯାଇଥିଲେ। ଲୋକଲଜ୍ଜା ଭୟରେ ଛାତ୍ରୀ ଜଣକ ଘରକୁ ନ ଯାଇ ବଡ ଭଉଣୀ ଶାଶୁ ଘରକୁ ଯାଇ ଘଟଣା ସମ୍ପର୍କରେ କହିଥିଲା। ତାପରେ ତାର ବାପା-ମା ସେଠାରେ ପହଞ୍ଚିଥିଲେ। ଝିଅଠାରୁ ସବୁ କଥା ଶୁଣିବା ପରେ ପରିବାର ଲୋକେ ଖଜୁରିପଡା ଥାନାରେ ଅଭିଯୋଗ କରିଥିଲେ। ପୁଲିସ ୩ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଥିଲା। ସରକାରଙ୍କ ପକ୍ଷରୁ ସ୍ୱତନ୍ତ୍ର ପିପି ଅସୀମ କୁମାର ପ୍ରହରାଜ ଏହି ମାମଲା ପରିଚାଳନା କରୁଥିଲେ।