କେନ୍ଦୁଝରରେ ଖିଲାପକାରୀ ଖଣି ଲିଜଧାରୀଙ୍କ ଶୁଣାଣି ଆରମ୍ଭ, ହାଜର ହେଲେ ୭ ଲିଜ୍ ଧାରୀ
କେନ୍ଦୁଝର : କେନ୍ଦୁଝର ଜିଲ୍ଲାର ମୋଟ ୩୧ଟି ଖଣିର ୨୩ ଜଣ ଖିଲାପକାରୀ ଖଣି ଲିଜ୍ଧାରୀମାନଙ୍କ ବିରୋଧରେ ସାର୍ଟିଫିକେଟ କେସ୍ ହେବା ପରେ ଆଜି ପ୍ରଥମ ପର୍ଯ୍ୟାୟରେ ୯ ଖଣି ଲିଜ୍ଧାରୀଙ୍କ ଶୁଣାଣି ଆରମ୍ଭ ହୋଇଛି । ତେବେ ଆଜିର ଏହି ଶୁଣାଣିରେ ମୋଟ ୯ ଲିଜ୍ଧାରୀଙ୍କୁ ନୋଟିସ୍ ହୋଇଥିଲେ ବି ସେମାନଙ୍କୁ ମଧ୍ୟରୁ ମୋଟ ୭ ଜଣ ଲିଜ୍ଧାରୀ ଉପସ୍ଥିତ ରହି ନିଜର ପକ୍ଷ ରଖିବା ପାଇଁ ଅଧିକ ସମୟ ମାଗିଛନ୍ତି । ଆସନ୍ତା ଅଗଷ୍ଟ ୨୫ ଓ ସେପ୍ଟେମ୍ବର ୧ ତାରିଖରେ ଏହି ଲିଜ୍ଧାରୀଙ୍କର ପୁଣି ଶୁଣାଣି ହେବ ବୋଲି ଜିଲ୍ଲା ମାଜିଷ୍ଟ୍ରେଟଙ୍କ କୋର୍ଟରୁ ସୂଚନା ମିଳିଛି ।
Sambad is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ ଯେ, ଯୋଡା ଖଣି ମଣ୍ଡଳର ୨୮ଟି ଖଣିର ୨୦ ଜଣ ଲିଜ୍ଧାରୀ ଏବଂ କେନ୍ଦୁଝର ଖଣି ମଣ୍ଡଳର ୩ଟି ଖଣିର ୩ ଜଣ ଲିଜ୍ଧାରୀ ସୁପ୍ରିମ୍କୋର୍ଟଙ୍କ ନିର୍ଦ୍ଦେଶମତେ ଜରିମାନା ଦାଖଲ ନ କରିବାକୁ ଗତ ମେ ୨୪ ତାରିଖରେ ଖଣି ବିଭାଗ ପକ୍ଷରୁ କେନ୍ଦୁଝର ଜିଲ୍ଲା ମାଜିଷ୍ଟ୍ରେଟଙ୍କ ନିକଟରେ ଏକ ସାର୍ଟିଫିକେଟ କେସ୍ କରାଯାଇଥିଲା । ଏହି କେସ୍ ଆଧାରରେ ଗତ ଜୁନ୍ ୨୩ ତାରିଖରେ କେନ୍ଦୁଝର ଜିଲ୍ଲା ମାଜିଷ୍ଟ୍ରେଟଙ୍କ କୋର୍ଟରୁ ନୋଟିସ୍ ଜାରି କରାଯାଇଥିଲା । ଏହି ନୋଟିସ ପରେ ୯ଟି ଖଣି ଲିଜ୍ଧାରୀଙ୍କର ଶୁଣାଣି ଜୁଲାଇ ୨୮ ତାରିଖରେ ହେବାକୁ ଧାର୍ଯ୍ୟ ହୋଇଥିଲା । ତେବେ ଆଜିର ଶୁଣାଣଇ ବେଳେ ୭ଜଣ ଲିଜ୍ ଧାରୀ ଉପସ୍ଥିତ ଥିଲେ । ଲିଜଧାରୀ ବି.କେ.ମହାନ୍ତି ଅନୁପସ୍ଥ୍ିତ ଥିଲେ । ସେହିପରି ଲିଜ୍ଧାରୀ ବାସୁଦେବ ଅଗ୍ରଓ୍ଵାଲଙ୍କ ମୃତ୍ୟୁ ହୋଇଥିବାରୁ ସେ ଆସି ନ ଥିଲେ । ତେବେ ମୋଟ ୭ଜଣ ଲିଜ୍ ଧାରୀ ଉପସ୍ଥିତ ରହି ପକ୍ଷ ରଖିବାକୁ ଆଉ ଅଧିକ ସମୟ ଦେବା ପାଇଁ ଆବେଦନ କରିଥିଲେ । ଫଳରେ ଏହି ୭ ଜଣ ଲିଜ୍ଧାରୀଙ୍କ ମଧ୍ୟରୁ ମେସର୍ସ ନାରାୟଣୀ ସନ୍ସକୁ ଆସନ୍ତା ଅଗଷ୍ଟ ୨୫ ତାରିଖରେ ଶୁଣାଣ ପାଇଁ ତାରିଖ ଧାର୍ଯ୍ୟ ହୋଇଥିବା ବେଳେ ଅବଶିଷ୍ଟ ୬ଟି ଖଣି ଲିଜ୍ଧାରୀଙ୍କ ଶୁଣାଣୀ ପାଇଁ ଆସନ୍ତା ସେପ୍ଟେମ୍ବର ୧ ତାରିଖ ଧାର୍ଯ୍ୟ ହୋଇଛି । ସେହପରି ଅନ୍ୟ ଲିଜ୍ଧାରୀଙ୍କ ମଧ୍ୟରୁ ଅଗଷ୍ଟ ୪ ତାରିଖରେ ୮ଜଣ ଲିଜ୍ଧାରୀ ଏବଂ ଅଗଷ୍ଟ ୧୮ ତାରିଖରେ ଅବଶିଷ୍ଟ ୬ ଲିଜ୍ଧାରୀଙ୍କର ଶୁଣାଣି ହେବ ବୋଲି ସୂଚନା ମିଳିଛି ।