ନବରଙ୍ଗପୁର: ଗୀତା ରାଣୀ ଗୌଡ। ଜନ୍ମରୁ ପୋଲିଓରେ ଆକ୍ରାନ୍ତ ଯୋଗୁଁ ଭିନ୍ନକ୍ଷମ ପାଲଟିଛନ୍ତି। ତଥାପି ତାଙ୍କର ପାଠ ପଢା ପ୍ରତି ପ୍ରବଳ ଆଗ୍ରହ ରହିଛି। ପାଠ ପଢ଼ି ସ୍ୱାଭୀମାନର ସହ ନିଜ ଗୋଡରେ ଠିଆ ହେବା ସହ ଶିକ୍ଷକତା କରିବାକୁ ରଖିଛନ୍ତି ସ୍ୱପ୍ନ। ତେଣୁ ସାନ ଭଉଣୀର ଇଛାଶକ୍ତି ଆଗରେ ହାର ମାନିଛି ବଡ ଭଉଣୀ। ସାନ ଭଉଣୀର ଇଛାଶକ୍ତିକୁ ନିରାଶ ନକରି ବଡ ଭଉଣୀ ଉତ୍ସର୍ଗୀକୃତ ଭାବେ କାନ୍ଧରେ ବୁହାଇ କଲେଜକୁ ନେବା ଆଣିବା କରୁଛନ୍ତି।
ନବରଙ୍ଗପୁର ଜିଲ୍ଲା କୋଷାଗୁମୁଡା ବ୍ଲକର ଛତିଶଗଡ ସୀମାନ୍ତ ସନ୍ତୋଷପୁର ପଞ୍ଚାୟତ ଅନ୍ତର୍ଗତ ଘୋଢ଼ାଦାନୁଆ ଗ୍ରାମର ଗୀତାରାଣୀ ଗୌଡ ଜନ୍ମରୁ ପୋଲିଓ। ସେ ପିଲାରୁ ଚାଲି ପାରୁନାହାନ୍ତି। ଗୀତାଙ୍କୁ ମିଶାଇ ତାଙ୍କ ପରିବାରର ୪ ଭଉଣୀ ରହିଥିବା ବେଳେ ସେ ସବୁଠାରୁ ସାନ। କେହି ହେଲେ କଲେଜ ବାରଣ୍ଡା ମାଢ଼ିନାହାନ୍ତି। ତେଣୁ ଗୀତା ଉଚ୍ଚ ଶିକ୍ଷିତା ହୋଇ ଚାକିରି କରିବାକୁ ଲକ୍ଷ୍ୟ ରଖିଛନ୍ତି। ସେ ଚଳିତ ବର୍ଷ ଟେମରା ହାଇସ୍କୁଲରେ ୬୦ ପ୍ରତିଶତ ରଖି ଦଶମ ଶ୍ରେଣୀରେ ଉତ୍ତୀର୍ଣ୍ଣ ହୋଇଥିଲେ। ଗୀତାଙ୍କ ଉଚ୍ଚ ଶିକ୍ଷାର ମନୋବଳ ଦେଖି ପରିବାର ଲୋକେ ବି ସହଯୋଗ କରିବା ପାଇଁ ହାତ ବଢ଼େଇଲେ। ଗୀତା ନବରଙ୍ଗପୁର ମହିଳା ମହାବିଦ୍ୟାଳୟରେ ଯୁକ୍ତ ୨ ପ୍ରଥମ ଶ୍ରେଣୀରେ ନାମଲେଖା ପାଇଁ ଆବେଦନ କରିଥିଲେ।
Sambad is now on WhatsApp
Join and get latest news updates delivered to you via WhatsApp
ଗୀତା ଭିନ୍ନକ୍ଷମ ଯୋଗୁଁ କଲେଜ କର୍ତ୍ତୃପକ୍ଷ ତାଙ୍କୁ ସହାୟତାର ହାତ ବଢ଼େଇଲେ। ତାଙ୍କ ପାଠ ପଢ଼ା ପାଇଁ ସମସ୍ତ ଫିଜ୍ ଛାଡ କରିଥିଲେ। ଘୋଡାଦାନୁଆ ଗ୍ରାମ ଠାରୁ ନବରଙ୍ଗପୁର ୫୦ କିମି ହୋଇଥିବାରୁ ସେ ନବରଙ୍ଗପୁର ଗାନ୍ଧୀ ନଗର ଠାରେ ବଡ ଭଉଣୀ ଭୁବନେଶ୍ୱରୀ ସହ ଏକ ଘର ଭଡା ନେଇ ରହୁଛନ୍ତି। ଗୀତା ଚଲାବୁଲା କରିପାରୁ ନଥିବାରୁ ବଡ ଭଉଣୀ ଭୁବନେଶ୍ୱରୀ ଗାନ୍ଧୀନଗର ଠାରୁ କଲେଜକୁ ପ୍ରାୟ ୧ କିମି କାନ୍ଧେଇ ନେବା ଆଣିବା କରୁଛନ୍ତି। ଭୁବନେଶ୍ୱରୀ ବି ଗତ ୫ ବର୍ଷ ପୂର୍ବେ ଦଶମ ଶ୍ରେଣୀ ପାସ କରିଥିଲେ। କିନ୍ତୁ ନିକଟରେ କଲେଜ ନଥିବା ଏବଂ ଆର୍ଥିକ ସମସ୍ୟା ଯୋଗୁଁ କଲେଜ ବାରଣ୍ଡା ମାଡିନଥିଲେ। ତେବେ ସାନ ଭଉଣୀର ପାଠ ପଢ଼ା ପ୍ରତି ଇଛାଶକ୍ତି ଦେଖି ସେ ବି ଯୁକ୍ତ ୨ରେ ନାମଲେଖା ପାଇଁ ଆବେଦନ କରିଥିଲେ। କିନ୍ତୁ ତାଙ୍କର ମାଟ୍ରିକରେ କମ୍ ନମ୍ବର ଯୋଗୁଁ କଲେଜରେ ସିଟ୍ ମିଳିନଥିଲା। ଗୀତାରାଣୀଙ୍କ ପରିବାର କହିଲେ ତାଙ୍କ ବାପା ବିଶ୍ୱନାଥ ଗୌଡ ଜଣେ ଗ୍ରାମ ପୋଷ୍ଟ ମାଷ୍ଟର। ମା ଗୃହିଣୀ। ତାଙ୍କ ୪ ଭଉଣୀ ମଧ୍ୟରୁ ବଡ ଭଉଣୀ ବିବାହ କରିସାରିଛନ୍ତି। ଏବେ ୩ ଭଉଣୀଙ୍କ ସହ ପରିବାରର ଆର୍ଥିକ ବୋଝ। ବାପାଙ୍କ ଚାକିରି ନିୟମିତ ହୋଇନାହିଁ। କେବଳ ମାସିକ ୮ହଜାର ଟଙ୍କା ଦରମା ମିଳୁଛି। ସ୍ୱଳ୍ପ ଦରମାରେ ପରିବାରକୁ ଚଳାଇବା ଓ ଝିଅ ମାନଙ୍କ ସମସ୍ତ ଦାୟିତ୍ଵ ନେବା କଷ୍ଟକର।
ଗୀତାରାଣୀ ଗ୍ରାମରେ ୮ମ ଶ୍ରେଣୀ ପର୍ଯ୍ୟନ୍ତ ପାଠ ପଢ଼ିବା ଗ୍ରାମ ଠାରୁ ୫ କିମି ଦୂର ତେମରା ଉଚ୍ଚ ବିଦ୍ୟାଳୟରେ ନାମ ଲେଖାଇଲେ। ସେ ପ୍ରତି ଦିନ ତାଙ୍କ ସହପାଠୀ ମଂଶିରା ଭତ୍ରାଙ୍କ ସାଇକେଲରେ ସ୍କୁଲକୁ ଯିବା ଆସିବା କରୁଥିଲେ। ସେ ୬ଷ୍ଠ ଶ୍ରେଣୀରେ ପାଠ ପଢ଼ିବା ସମୟରେ ସର୍ବଶିକ୍ଷା ଅଭିଯାନ ପକ୍ଷରୁ ତାଙ୍ଗ ଗୋଡର ଅସ୍ତ୍ରୋପଚାର କରାଯାଇଥିଲା। ତଥାପି ସେ ଚାଲିବାରେ ସକ୍ଷମ ହୋଇପାରିନଥିଲେ। ତାଙ୍କୁ ମାସିକ ୫ଶହ ଟଙ୍କା ଭିନ୍ନକ୍ଷମ ଭତ୍ତା ମିଳୁଛି। ଖାଦ୍ୟ ସୁରକ୍ଷା ଯୋଜନାରେ ମାସିକ ଚାଉଳ ୧୦ କେଜି ମିଳୁଥିଲା, କିନ୍ତୁ କିଛି ବର୍ଷ ହେଲା ମିଳୁନାହିଁ ବୋଲି ସେ କହିଛନ୍ତି। ଗୀତାରାଣୀଙ୍କ ପାଠପଢ଼ା ପାଇଁ ମନୋବଳ ରହିଥିବାରୁ ତାଙ୍କୁ ଉଚ୍ଚ ଶିକ୍ଷା ପାଇଁ ସରକାରଙ୍କ ପକ୍ଷରୁ ସହାୟତା ପ୍ରଦାନ କରାଯିବାକୁ ତାଙ୍କ ସହପାଠୀ ମାନେ ଦାବି କରିଛନ୍ତି।