ପାରିବାରିକ କଳହର କରୁଣ ପରିଣତି : ଭଉଣୀ ଓ ପିଉସୀଙ୍କୁ ବୀଭତ୍ସ ଭାବେ ହତ୍ୟା କଲା ଉନ୍ମତ୍ତ ଯୁବକ, ଅଳ୍ପକେ ବର୍ତ୍ତିଲେ ମା’-ଭିଣୋଇ

0 283

କୋଇଡା: ସୁନ୍ଦରଗଡ଼ ଜିଲ୍ଲାର କୋଇଡା ଥାନା ଅଞ୍ଚଳରେ ଶନିବାର ସନ୍ଧ୍ୟାରେ ଜଣେ ଯୁବକ ରକ୍ତମୁଖା ହୋଇଛି। ପାରିବାରିକ କଳହକୁ କେନ୍ଦ୍ର କରି ପାଟମୁଣ୍ଡା ପଞ୍ଚାୟତ ଅନ୍ତର୍ଗତ ସଣୁଆ ଗ୍ରାମର ରାଜେଶ ସେଠୀ(୨୨) ନିଜ ଏକ ଭଉଣୀ ଓ ପିଉସୀଙ୍କୁ ଧାରୁଆ ଅସ୍ତ୍ର ଦ୍ୱାରା ବୀଭତ୍ସ ହତ୍ୟା କରିଛି। ସୂଚନା ପାଇ ପୁଲିସ ଘଟଣାସ୍ଥଳରେ ପହଞ୍ଚିବା ପୂର୍ବରୁ ଅଭିଯୁକ୍ତ ଫେରାର ହୋଇଛି।

ମିଳିଥିବା ସୂଚନା ଅନୁସାରେ ଆଜି ସନ୍ଧ୍ୟା ୫ଟା ୧୦ରେ ପାରିବାରିକ କଳହକୁ ନେଇ ବିବାହିତ ଭଉଣୀ ଜାନକୀ ସେଠୀ(୩୦) ଓ ଅବିବାହିତ ପିଉସୀ ଝପ ସେଠୀଙ୍କୁ ଧାରୁଆ ଅସ୍ତ୍ର ଦ୍ୱାରା ଆକ୍ରମଣ କରିଥିଲା। ଫଳରେ ଉଭୟ ମହିଳା ଘଟଣାସ୍ଥଳରେ ହିଁ ପ୍ରାଣ ହରାଇଥିଲେ। ରକ୍ତମୁଖା ଅଭିଯୁକ୍ତ ରାଜେଶ ୨ ଜଣଙ୍କୁ ହତ୍ୟା କରିବା ପରେ ଅନ୍ୟ ଏକ ବିବାହିତ ଭଉଣୀର ସ୍ୱାମୀ ତଥା ଭିଣୋଇ ବାବଲି ସେଠୀ ଓ ବିଧବା ମା’ଙ୍କୁ ମଧ୍ୟ ଆକ୍ରମଣ କରିବାକୁ ଗୋଡ଼ାଇଥିଲା। ମାତ୍ର ଉଭୟ ମା’-ଭିଣୋଇ ପ୍ରାଣ ବଞ୍ଚାଇବା ପାଇଁ ଏକ ପଡୋଶୀ ଘରକୁ ପଶି ଯାଇଥିଲେ।

ହତ୍ୟାର ଶିକାର ହୋଇଥିବା ଜାନକୀଙ୍କ ସ୍ୱାମୀ ରାଜୁ ମୁଣ୍ଡା ଟିପର ଚଳାନ୍ତି। ସେ କିଛି ଦିନ ହେବ ନିଜ ମା’-ଭାଇଙ୍କ ନିକଟରେ ରହି ଆସୁଥିଲେ। ଅନ୍ୟ ଭଉଣୀ ଓ ଭଉଣୀ ଜ୍ୱାଇଁ ମଧ୍ୟ ରାଜେଶର ଘରେ ରହୁଥିଲେ। ଆଜି ରାଜେଶ ଅପରାହ୍ନରେ ପରିବାର ଲୋକଙ୍କ ସହିତ ଗଣ୍ଡଗୋଳ କରିଥିଲା ଓ ରକ୍ତମୁଖା ହୋଇ ୨ଜଣଙ୍କୁ ହତ୍ୟା କରିବା ପରେ ଆଉ ୨ଜଣଙ୍କୁ ହତ୍ୟା କରିବା ପାଇଁ ଉଦ୍ୟମ କରି ବିଫଳ ହୋଇଥିଲା। ପୁଲିସ ସୂଚନା ପାଇ ସଣୁଆ ଗ୍ରାମକୁ ପହଞ୍ଚିବା ପୂର୍ବରୁ ଅଭିଯୁକ୍ତ ରାଜେଶ ଫେରାର ହୋଇ ଯାଇଥିବା ଜଣାପଡ଼ିଛି

ସମ୍ବନ୍ଧିତ ଖବର

Leave A Reply

Your email address will not be published.