ସୁଖ ପାଇବୁ କେମିତି?
କଥାଟିଏ ଯାଯାବର
ଜଣେ ଅଭାବୀ ଲୋକ ସୁଖ ପାଇବା ଲାଗି କଠୋର ତପସ୍ୟା କଲା। ଦିନେ ଭଗବାନ ଉଭା ହୋଇ କହିଲେ କି ବର ମାଗୁଛୁ ମାଗ। ଲୋକଟି ଖୁସି ହୋଇଯାଇ କହିଲା- ପ୍ରଭୁ ମୋତେ ବର ଦିଅନ୍ତୁ କି ମୁଁ ଯାହା ମାଗିବି ତାହା ପାଇବି। ଭଗବାନ କହିଲେ-ତୋତେ ଏହି ମହାର୍ଘ ବରଟି ଦେବି ନିଶ୍ଚିତ, କିନ୍ତୁ ଗୋଟିଏ ସର୍ତ୍ତରେ। ସର୍ତ୍ତଟି ହେଲା, ତୁ ଯାହା ପାଇବୁ, ତୋ ଗାଁର ଅନ୍ୟମାନଙ୍କୁ ବି ତାହା ଆପଣା ଛାଏଁ ମିଳିବ। ଭାବିଚିନ୍ତି କହ, ଚଳିବ ତ?
Sambad is now on WhatsApp
Join and get latest news updates delivered to you via WhatsApp
ଲୋକଟି କହିଲା- ମୋତେ କେବଳ ସେଇ ବର ହିଁ ଦିଅନ୍ତୁ। ମୁଁ ଯାହା ମାଗିବି ଯେମିତି ତାହା ପାଇବି। ଈଶ୍ବର ତଥାସ୍ତୁ କହି ଚାଲିଗଲେ। ଏବେ ଲୋକଟି ଯାହା ମାଗିଲା ତାହା ତାକୁ ମିଳିଲା। ସେ ଖୁସି ହୋଇଗଲା। କିନ୍ତୁ ଗାଁ ବାଲାଙ୍କ ଖୁସି ବିସ୍ମୟ କହିଲେ ନସରେ। ସେମାନେ କିଛି ନ ଚାହିଁ ସବୁ କିଛି ପାଇଗଲେ। କିଛି ଦିନ ପରେ ଲୋକଟି ଅତ୍ୟନ୍ତ ଧନୀ ହୋଇଗଲା। କିନ୍ତୁ ସେ ସୁଖୀ ହୋଇପାରିଲା ନାହିଁ। କାରଣ ସେ ଦେଖିଲା ଯେ ଗାଁର ସମସ୍ତେ ତାରି ଭଳି ଜଣେ ଜଣେ ଧନୀ ହୋଇଯାଇଛନ୍ତି। ସେ ଭାବିଲା- ଏତେ ତପସ୍ୟା କଲି ମୁଁ, ଅଥଚ ଲାଭ ପାଇଲେ ସମସ୍ତେ। ସେ ଈର୍ଷାରେ ଜଳି ଉଠିଲା।
ଦିନେ ସେ ତାର ମନସ୍ତାପ ବିଷୟରେ ଜଣାଇଲା ଜଣେ ପ୍ରାଜ୍ଞ ଗୁରୁଙ୍କୁ। ଗୁରୁ ଏ କଥା ଶୁଣି କହିଲେ- ଆରେ ବାବୁ ତୁ ତ ଯାହା ଖୋଜୁଥିଲୁ, ଯାହା ଚାହୁଁଥିଲୁ ତାହା ପାଇଲୁ। ପୁଣି ତୋର ଅଭିଯୋଗ କ’ଣ? ତୁ ଯେହେତୁ ଅନ୍ୟମାନଙ୍କ ସହିତ ନିଜକୁ ତୁଳନା କରୁଚୁ, ତୋତେ ସୁଖ ମିଳି ପାରୁନାହିଁ। ତେଣୁ ସୁଖ ପାଇବୁ ନା ଦୁଃଖ, ତାହା କେବଳ ତୋ ଉପରେ ହିଁ ନିର୍ଭର କରେ। ତୁ ନିଜକୁ ବଦଳାଇବାକୁ ଚେଷ୍ଟା କର।