ବଲିଉଡ ଛବିର ଏ ସବୁ ରାଖି ଗୀତ ଆଜି ବି ଶ୍ରୋତାଙ୍କ ମନଜିଣେ
ରକ୍ଷାବନ୍ଧନକୁ ବଲିଉଡର ନିର୍ଦ୍ଦେଶକମାନେ ଚମତ୍କାର ଭାବେ ପ୍ରଦର୍ଶନ କରିଛନ୍ତି। ଭାଇ-ଭଉଣୀର ପବିତ୍ର ସଂପର୍କକୁ ଗାୟକ, ଗୀତିକାର ଓ ସଙ୍ଗୀତକାରମାନେ ମଧ୍ୟ ସଙ୍ଗୀତରୂପ ଦେଇଛନ୍ତି। ଆସନ୍ତୁ ନଜର ପକାଇବା ହିନ୍ଦୀ ସିନେମାର ଏଭଳି କେତେକ ଲୋକପ୍ରିୟ ରାଖି ଗୀତ ଉପରେ।
Sambad is now on WhatsApp
Join and get latest news updates delivered to you via WhatsApp
୧-ଭୈୟା ମେରେ ବନ୍ଧନ୍ କୋ ନିଭାନା: ୧୯୫୯ ମସିହାରେ ମୁକ୍ତିଲାଭ କରିଥିବା ଲୋକପ୍ରିୟ ସିନେମା ‘ଛୋଟି ବହନ୍’ରେ ଥିଲା ଏହି ଗୀତ। ଏଥିରେ ଦୁଇ ଭାଇ ଭୂମିକାରେ ନଜର ଆସିଥିଲେ ବଲରାଜ୍ ସାହଣୀ ଓ ରେହମାନ୍। ଏହି ଫିଲ୍ମରେ ସାନ ଭଉଣୀ ସାଜିଥିଲେ ଅଭିନେତ୍ରୀ ନନ୍ଦା। ଏହି ଲୋକପ୍ରିୟ ରାଖି ଗୀତରେ କଣ୍ଠଦାନ କରିଥିଲେ ଲତା ମଙ୍ଗେସକର୍। ଗୀତିକାର ଶୈଳେନ୍ଦ୍ର ଓ ସଙ୍ଗୀତକାର ଶଙ୍କର-ଜୟକିଶନ୍।
୨-ମେରେ ଭୈୟା ମେରେ ଚନ୍ଦା…: ରାମ ମାହେଶ୍ୱରୀଙ୍କ ନିର୍ଦ୍ଦେଶିତ ସୁପରହିଟ୍ ଫିଲ୍ମ‘କାଜଲ୍’ରେ ସ୍ଥାନୀତ ହୋଇଥିଲା ଏହି ରାଖି ଗୀତ। ଏହାର ସଙ୍ଗୀତକାର ହେଲେ ରବି ଓ ଗାୟିକା ଆଶା ଭୋଁସଲେ।
୩-ବେହେନା ନେ ଭାଇ କି କଲାଇ ସେ..: ୧୯୭୪ ମସିହାର ହିନ୍ଦୀ ସିନେମା‘ରେଶମ୍ କି ଡୋରି’ର ଏହି ଲୋକପ୍ରିୟ ରାଖି ଗୀତରେ କଣ୍ଠଦାନ କରିଥିଲେ ସୁମନ୍ କଲ୍ୟାଣପୁର। ଏହାର ଗୀତିକାର ଇନ୍ଦିବର ଓ ସଙ୍ଗୀତକାର ହେଲେ ଶଙ୍କର-ଜୟ କିଶନ୍।
୪-ଫୁଲୋଁକୋ ତାରୋଁ କା ସବ୍କା କେହନାହୈ….: ‘ହରେ ରାମା ହରେ କ୍ରିଷ୍ଣା’ ଫିଲ୍ମର ଏହି ସୁପରହିଟ୍ ରାଖିଗୀତକୁ ସହଜରେ ଭୁଲିହେବ ନାହିଁ। ଏହି ସିନେମାରେ ଦେବଆନନ୍ଦ ଓ ଜୀନତ ଅମାନ୍ ବନିଥିଲେ ଭାଇ-ଭଉଣୀ। ଏହି ଗୀତରେ କଣ୍ଠଦାନ କରିଥିଲେ କିଶୋର କୁମାର ଓ ଲତା ମଙ୍ଗେସକର୍। ଆନନ୍ଦ ବକ୍ସିଙ୍କ ରଚିତ ଏହି ଗୀତର ସ୍ୱର ସଂଯୋଜନା କରିଥିଲେ ଆର୍.ଡି ବର୍ମନ୍।
୫-ମେରି ପ୍ୟାରି ବହନିୟା ବନେଗି ଦୁଲହନିଆ…: ପ୍ରଖ୍ୟାତ ନିର୍ଦ୍ଦେଶକ ମନମୋହନ ଦେଶାଇଙ୍କ ସୁପରହିଟ୍ ଫିଲ୍ମ‘ସଚ୍ଚା ଝୁଠା’ର ଏହି ଗୀତରେ ଭାଇ-ଭଉଣୀ ସଂପର୍କକୁ ନୂଆ ରୂପ ଦିଆଯାଇଥିଲା । ଏହି ଗୀତରେ କଣ୍ଠଦାନ କରିଥିଲେ କିଶୋର କୁମାର। ଏହାର ସଙ୍ଗୀତ ନିର୍ଦ୍ଦେଶକ ଥିଲେ କଲ୍ୟାଣଜୀ-ଆନନ୍ଦଜୀ।