ମା’ଙ୍କ ପୁରସ୍କାର ତାଙ୍କର ପ୍ରିୟ ଶାଢ଼ି ପିନ୍ଧି ଗ୍ରହଣ କଲେ ଶ୍ରୀଦେବୀ ତନୟା ଜାହ୍ନବୀ
ନୂଆଦିଲ୍ଲୀ : ଶ୍ରୀଦେବୀଙ୍କ ବିୟୋଗ ପରେ ମଧ୍ୟ ତାଙ୍କୁ ନେଇ ଚର୍ଚ୍ଚା ଥମିବାର ନାଁ ନେଉ ନାହିଁ । ସେ ମରି ବି ଅମର ବୋଲି ବାରମ୍ବାର ପ୍ରମାଣ କରି ଚାଲିଛନ୍ତି । ସଂସାର ଛାଡ଼ି ଚାଲି ଯାଇଥିଲେ ମଧ୍ୟ ତାଙ୍କ ଅଭିନୟକୁ ଦେଖି ଲୋକେ ତାଙ୍କୁ ମନେ ପକାଉଛନ୍ତି । ମେ ୩ ତାରିଖରେ ବିଜ୍ଞାନ ଭବନରେ ଆୟୋଜିତ ହୋଇଥିବା ନ୍ୟାସ୍ନାଲ ଫିଲ୍ମ ଆଓ୍ଵାର୍ଡ଼ ୨୦୧୮ ପୁରସ୍କାର ପ୍ରଦାନ ସମାରୋହରେ ତାଙ୍କ କାମକୁ ପୁଣି ଥରେ ସମ୍ମାନିତ କରାଯାଇଛି । ଫିଲ୍ମ ‘ମମ୍’ରେ ଥିବା ଚରିତ୍ର ପାଇଁ ତାଙ୍କୁ ଶ୍ରେଷ୍ଠ ଅଭିନେତ୍ରୀ ଭାବେ ପୁରସ୍କୃତ କରାଯାଇଛି । ଏହି ସମ୍ମାନକୁ ଗ୍ରହଣ କରିଛନ୍ତି ଶ୍ରୀଦେବୀଙ୍କ ବଡ଼ ଝିଅ ଜାହ୍ନବୀ କପୁର ।
Sambad is now on WhatsApp
Join and get latest news updates delivered to you via WhatsApp
ଏହି ପୁରସ୍କାର ଗ୍ରହଣ କରିବା ସମୟରେ ଜାହ୍ନବୀ ଶ୍ରୀଦେବୀଙ୍କୁ ସବୁଠାରୁ ଅଧିକ ପସନ୍ଦ ଥିବା ଶାଢ଼ି ପିନ୍ଧିଥିବାର ଦେଖିବାକୁ ମିଳିଥିଲା । ଜାହ୍ନବୀଙ୍କ ସମେତ ତାଙ୍କ ବାପା ବୋନି କପୁର ଏବଂ ଭଉଣୀ ଖୁସି କପୁର ମଧ୍ୟ ସେଠାରେ ଉପସ୍ଥିତ ଥିବାର ଦେଖିବାକୁ ମିଳିଥିଲା । ଶ୍ରୀଦେବୀଙ୍କ ଶାଢ଼ି ପିନ୍ଧି ନିଜ ମା’ଙ୍କୁ ମନେ ପକାଇବା ସହ ସମ୍ମାନ ଗ୍ରହଣ ସମୟରେ ତାଙ୍କର ଆଖି ଛଳ ଛଳ ହୋଇ ଯାଇଥିବା ଦେଖିବାକୁ ମିଳିଥିଲା ।
ଏହା ସହ ସମ୍ମାନ ଗ୍ରହଣ ପରେ ବୋନି କପୁର ଭାରତ ସରକାର, ସୂଚନା ଏବଂ ପ୍ରସାରଣ ମନ୍ତ୍ରାଳୟକୁ ଧନ୍ୟବାଦ୍ ଜଣାଇଥିଲେ । ଅନ୍ୟ ପକ୍ଷରେ ବଲିଉଡ଼ ଡ଼ିଜାଇନର ମନିଷ ମଲହୋତ୍ରା ଜାହ୍ନବୀଙ୍କର ସେ ସମୟର ଏକ ଫଟୋ ନେଇ ନିଜ ଇନ୍ଷ୍ଟା ପେଜ୍ରେ ସେୟାର କରିଥିଲେ ।
ଫଟୋ ସେୟାର କରିବା ସହ ସେ ଶ୍ରୀଦେବୀଙ୍କ ପାଇଁ ନିଜ ସମ୍ମାନ ଜଣାଇଥିଲେ । ଫିଲ୍ମ ଧଡ଼କରୁ ନିଜର ବଲିଉଡ଼ କ୍ୟାରିୟର ଆରମ୍ଭ କରିବାକୁ ଯାଉଥିବା ଜାହ୍ନବୀ ନିଜ ମା’ଙ୍କ ସ୍ୱପ୍ନକୁ ପୂରା କରିବା ପାଇଁ କଠିନ ପରିଶ୍ରମ କରୁଛନ୍ତି ।