ତନୁଶ୍ରୀ-ନାନା ବିବାଦକୁ ନେଇ ଚାଞ୍ଚଲ୍ୟକର ବୟାନ ଦେଲେ ସାମ୍ବାଦିକା ଜେନିସ : କହିଲେ; ତନୁଶ୍ରୀଙ୍କ ଆରୋପ ସଂପୂର୍ଣ୍ଣ ସତ୍ୟ, ମୁଁ ନିଜେ ନାନାଙ୍କୁ ଏପରି କରୁଥିବାର ଦେଖିଛି
ମୁମ୍ବାଇ : କିଛି ଦିନ ହେବ ବଲିଉଡ୍ରେ ନାନା-ତନୁଶ୍ରୀଙ୍କ ବିବାଦକୁ ନେଇ ଚାଞ୍ଚଲ୍ୟ ଖେଳି ଯାଇଛି । ଅଭିନେତା ନାନା ପାଟେକରଙ୍କୁ ନେଇ ତନୁଶ୍ରୀ କରିଥିବା ଖୁଲାସା ପରେ ପୂରା ବଲିଉଡ୍ ସ୍ତବ୍ଧ ହୋଇଯାଇଛି । ସୁଟିଂ ସେଟ୍ରେ ଘଟିଥିବା ଘଟଣାର ୧୦ବର୍ଷ ପରେ ତନୁଶ୍ରୀ ଏ ନେଇ ମୁହଁ ଖୋଲିଥିବା ବେଳେ ଅନେକଙ୍କ ନାଁ ଏଥିରେ ସେ ସାମିଲ କରିଛନ୍ତି । ଏହି ମାମଲାର ଖୁଲାସା ହେବା ପରେ ବଲିଉଡ୍ର ବିଭିନ୍ନ ଅଭିନେତ୍ରୀ ମଧ୍ୟ ତନୁଶ୍ରୀଙ୍କୁ ସମର୍ଥନ ଜଣାଇଥିବା ଦେଖା ଯାଇଛି । ଅନ୍ୟ ପକ୍ଷରେ ଘଟଣା ସତ୍ୟତାକୁ ନେଇ ଅନେକଙ୍କ ମନରେ ଦ୍ୱନ୍ଦ୍ୱ ସୃଷ୍ଟି ହୋଇଥିବା ବେଳେ ଜଣେ ସାମ୍ବାଦିକା ଜେନିସ ଏ ନେଇ ନିଜର ଚାଞ୍ଚଲ୍ୟକର ବୟାନ ରଖିଛନ୍ତି । ତନୁଶ୍ରୀ ନାନାଙ୍କ ଉପରେ ଲଗାଇଥିବା ଆରୋପକୁ ସତ ବୋଲି କହିବା ସହ ନାନାଙ୍କୁ ତନୁଶ୍ରୀଙ୍କ ସହ ଏପରି କରୁଥିବାର ମୁଁ ଦେଖିଛି ବୋଲି ଜେନିସ୍ କହିଛନ୍ତି । ଏକାଧିକ ଟ୍ଵିଟ୍ କରି ସେ ଏହି ମାମଲାକୁ ନେଇ ଅନେକ ଖୁଲାସା କରିଥିଲେ ।
Sambad is now on WhatsApp
Join and get latest news updates delivered to you via WhatsApp
ତାଙ୍କ କହିବା ଅନୁଯାୟୀ,”ଯେଉଁ ସମୟରେ ତନୁଶ୍ରୀ ଯୌନ ଶୋଷଣର ଶିକାର ହୋଇଥିଲେ ସେ ସମୟରେ ମୁଁ ମଧ୍ୟ ସୁଟିଂ ସେଟ୍ରେ ଉପସ୍ଥିତ ଥିଲି । ନାନା ଆସି ତାଙ୍କ ସହ ଅସଦାଚରଣ କରିବା ସହ ବିଭିନ୍ନ ବାହାନା କରି ତାଙ୍କୁ ଛୁଇଁବାକୁ ଲାଗିଥିଲେ । ଯେତେବେଳେ ତାଙ୍କ ପରିବାର ଲୋକ ତାଙ୍କୁ ନେବା ପାଇଁ ଆସିଥିଲେ ସେତେବେଳେ ନାନା ଗୁଣ୍ଡା ଲଗାଇ ସେମାନଙ୍କୁ ମାଡ଼ ମାରିଥିଲେ । ଯେତେବେଳେ ମୁଁ ସୁଟିଂ ସେଟ୍ରେ ପହଞ୍ଚିଲି ମୋତେ ସୁଟିଂ ବନ୍ଦ ଥିବା କୁହାଯାଇଥିଲା । ତନୁଶ୍ରୀଙ୍କୁ ନାନାଙ୍କ ସହ ସୁଟ୍ କରିବାରେ ଅସୁବିଧା ହେଉଥିବାରୁ ଏଭଳି ପରିସ୍ଥିତି ଉପୁଜିଥିବା ମୁଁ ଜାଣିବାକୁ ପାଇଥିଲି । କିନ୍ତୁ ହଠାତ୍ ପୁଣି ସୁଟିଂ ଆରମ୍ଭ ହୋଇଥିଲା । କିଛି ସମୟ ସୁଟିଂ କରିବା ପରେ ତନୁଶ୍ରୀ ନିଜ ଭ୍ୟାନିଟି ଭ୍ୟାନ୍କୁ ଚାଲିଯିବା ସହ ସୁଟିଂ ସେଟ୍କୁ ଆସିବାକୁ ମନା କରି ଦେଇଥିଲେ । ଯାହା ପରେ ସେଠାକୁ କିଛି ଗୁଣ୍ଡା ଆସି ତନୁଶ୍ରୀଙ୍କୁ ଧମକାଇଥିଲେ । ଏ ସମୟରେ ମୋତେ ସେଠାକୁ ଯିବା ପାଇଁ ଅନୁମତି ନ ମିଳିବାରୁ ମୁଁ ତନୁଶ୍ରୀଙ୍କ ସହ କଥା ହୋଇ ପାରି ନଥିଲି । କିନ୍ତୁ ପରେ ସେହି ଦିନ ରାତିରେ ମୋତେ ତନୁଶ୍ରୀ ନିଜ ଘରକୁ ଡ଼ାକି ସବୁ କାହାଣୀ କାନ୍ଦି କାନ୍ଦି ଜଣାଇଥିଲେ ।
ସୁଟିଂ ପୂର୍ବରୁ ଯାହା କୁହାଯାଇଥିଲା, ସୁଟିଂ ସମୟରେ ସେ ସବୁ ବଦଳି ଯାଇଥିଲା ବୋଲି ତନୁଶ୍ରୀ ମୋତେ କହିଥିଲେ । ପୂର୍ବରୁ ଗୀତରେ ନାନାଙ୍କ କୌଣସି ଚରିତ୍ର ନ ଥିବା ବେଳେ ନାନା ପ୍ରଯୋଜକଙ୍କୁ କହି ନିଜକୁ ଗୀତରେ ସାମିଲ କରାଇଥିଲେ । ପରେ ସେ ତନୁଶ୍ରୀକୁ ସମସ୍ତଙ୍କ ନଜର ଆଢ଼ୁଆଳରେ ଛୁଇଁବା ପାଇଁ କୋରିଓଗ୍ରାଫରଙ୍କୁ କହି ଡ଼୍ୟାନ୍ସ ଷ୍ଟେପ୍ ବଦଳାଇଥିଲେ । ଏ ବିଷୟରେ ତନୁଶ୍ରୀ ଜାଣିବା ପରେ ସେ ସୁଟିଂ ସେଟ୍ରୁ ଚାଲି ଆସିଥିଲେ ଟ୍ଵିଟ୍ କରିଛନ୍ତି ଜେନିସ । ତେବେ ୧୦ବର୍ଷ ପୂର୍ବରୁ ଏ କଥା ଜାଣି ଜେନିସ କ’ଣ ପାଇଁ ଏ କଥାକୁ ଲୁଚାଇ ରଖିଥିଲେ ବୋଲି ଏବେ ସମସ୍ତଙ୍କ ମନରେ ପ୍ରଶ୍ନ ।