ହିରାନୀଙ୍କ ପରେ ‘ହ୍ଵାଏ ଚିଟ୍ ଇଣ୍ଡିଆ’ର ନିର୍ଦ୍ଦେଶକ ସୌମିକ୍ ସେନ୍ଙ୍କ ବିରୋଧରେ ୩ ମହିଳା ଆଣିଲେ ଅସଦାଚରଣର ଅଭିଯୋଗ, ବିରୋଧୀ ହେଲେ ଫିଲ୍ମର ଅଭିନେତ୍ରୀ
ମୁମ୍ବାଇ : ଲିଭି ଆସୁଥିବା #ମି ଠୁର ନିଆଁ ଏବେ ପୁଣି ଜଳିବା ଆରମ୍ଭ କରିଛି । କିଛି ଦିନ ତଳେ ଲୋକପ୍ରିୟ ନିର୍ଦ୍ଦେଶକ ରାଜକୁମାର ହିରାନୀଙ୍କ ଉପରେ ତାଙ୍କ ସହଯୋଗୀ ଅସଦାଚରଣର ଅଭିଯୋଗ ଆଣିବା ପରେ #ମି ଠୁ ଅଭିଯାନ ପୁଣି ଥରେ ମୁଣ୍ଡ ଟେକିଛି । ରାଜକୁମାରଙ୍କ ଉପରେ ଲାଗିଥିବା ଅଭିଯୋଗକୁ କେହି ବିଶ୍ୱାସ କରି ପାରୁ ନଥିବା ବେଳେ ଏବେ ଆଉ ଜଣେ ନିର୍ଦ୍ଦେଶକ-ପ୍ରଯୋଜକଙ୍କ ସୌମିକ୍ ସେନ୍ଙ୍କ ବିରୋଧରେ ୩ଜଣ ମହିଳା ଅସଦାଚରଣର ଅଭିଯୋଗ ଆଣିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ସୌମିକ୍ ରିଲିଜ୍ ହେବାକୁ ଥିବା ‘ହ୍ଵାଏ ଚିଟ୍ ଇଣ୍ଡିଆ’ର ନିର୍ଦ୍ଦେଶକ ଏବଂ ପ୍ରଯୋଜନା ଦାୟିତ୍ୱରେ ଥିବା ବେଳେ ଫିଲ୍ମରେ ମୁଖ୍ୟ ଭୂମିକାରେ ଅଛନ୍ତି ଇମ୍ରାନ ହାସ୍ମୀ ଏବଂ ଅଭିନେତ୍ରୀ ଶ୍ରେୟା ଧନବନ୍ତରୀ । ଫିଲ୍ମ ରିଲିଜ୍ ପୂର୍ବରୁ ଏଭଳି ଅଭିଯୋଗ ଆସିବା ସମସ୍ତଙ୍କୁ ଆଶ୍ଚର୍ଯ୍ୟ କରିଛି । ୩ ଜଣ ମହିଳା ଅଭିଯୋଗ କରିବା ପରେ ଫିଲ୍ମର ଅଭିନେତ୍ରୀ ଶ୍ରେୟା ସେମାନଙ୍କୁ ସମର୍ଥନ ଜଣାଇଥିବା ଦେଖାଯାଇଛି ।
ସୂଚନା ମୁତାବକ, ଗତ ବର୍ଷ ୩ ଜଣ ମହିଳାଙ୍କ ସହ ସୌମିକ୍ ଅସଦାଚରଣ କରିଥିଲେ ବୋଲି ସେମାନେ #ମି ଠୁ ଅଭିଯାନ ଦ୍ୱାରା ଜଣାଇଥିଲେ । ଏହି ଅଭିଯୋଗ ଆସିବା ପରେ ଅଭିନେତ୍ରୀ ଶ୍ରେୟାଙ୍କୁ ତାଙ୍କର ପ୍ରତିକ୍ରିୟା ରଖିବା ପାଇଁ କୁହାଯାଇଥିଲା । ନିଜ ପ୍ରତିକ୍ରିୟାରେ, ଖବରଟି ମୋତେ ଆଶ୍ଚର୍ଯ୍ୟ କରିଛି । ଯେତେବେଳେ ଆପଣ ଜଣଙ୍କ ସହ ଭଲ ଭାବରେ କାମ କରୁଥିବେ ଏବଂ ଶେଷରେ ଏ ସବୁ ଜିନିଷ ଶୁଣିବାକୁ ମିଳିବ । ତାହା ନିହାତି ଭାବରେ ସମସ୍ତଙ୍କୁ ଆଶ୍ଚର୍ଯ୍ୟ କରିବ । କିନ୍ତୁ ମୁଁ ସମସ୍ତ ପୀଡ଼ିତା ଏବଂ #ମି ଠୁ ଅଭିଯାନକୁ ସମର୍ଥନ ଜଣାଉଛି । ଯାହା ସତ ତାହା ସାମ୍ନାକୁ ଆସିବା ଦରକାର ବୋଲି କହିଥିଲେ ଶ୍ରେୟା ।