ଆସାମ ପୁଲିସର ଅମାନବୀୟ କାଣ୍ଡ : ୩ ଭଉଣୀଙ୍କୁ ଫାଣ୍ଡିରେ ଉଲଗ୍ନ କରି ନିର୍ଯାତନା, ପୁଲିସ ମାଡ଼ରେ ମହିଳାଙ୍କ ଗର୍ଭନଷ୍ଟ, ୨ପୁଲିସ ନିଲମ୍ବିତ, ମାମଲାର ତଦନ୍ତ ନିର୍ଦ୍ଦେଶ ଦେଲେ ମୁଖ୍ୟମନ୍ତ୍ରୀ
ଗୌହାଟି : ଆସାମ ପୁଲିସର ଏକ ଅମାନବୀୟ କାଣ୍ଡ ଏବେ ଲୋକଲୋଚନକୁ ଆସିଛି। ଆସାମର ଦରଙ୍ଗ ଜିଲ୍ଲା ଅଧୀନସ୍ଥ ଏକ ପୁଲିସ ଫାଣ୍ଡିରେ ୩ ଜଣ ମହିଳା (ତିନି ଭଉଣୀ)ଙ୍କୁ ପୁଲିସ ଉଲଗ୍ନ କରି ନିର୍ଯାତନା ଦେଇଛି। ଏକ ଅପହରଣ ମାମଲାରେ ପୁଲିସ ୩ ଭଉଣୀଙ୍କୁ ଗତ ୮ ତାରିଖରେ ଜେରା ପାଇଁ ବୁର୍ହା ପୁଲିସ ଫାଣ୍ଡିକୁ ନେଇଥିଲା। କିନ୍ତୁ ସେଠାରେ ଜେରା ସମୟରେ ପୁଲିସ ସେମାନଙ୍କୁ ଉଲଗ୍ନ କରି ଅମାନୁଷିକ ନିର୍ଯାତନା ଦେଇଥିଲା। ଏହି ୩ ଭଉଣୀଙ୍କ ମଧ୍ୟରୁ ଜଣେ ଗର୍ଭବତୀ ଥିବାବେଳେ ପୁଲିସ ମାଡ଼ରେ ତାଙ୍କ ଗର୍ଭ ନଷ୍ଟ ହୋଇଯାଇଛି। ୩ ଭଉଣୀ ଗତ ୧୦ ତାରିଖରେ ଏହି ଘଟଣା ନେଇ ଦରଙ୍ଗ ଜିଲ୍ଲା ଏସ୍ପିଙ୍କ ନିକଟରେ ଅଭିଯୋଗ କରିଥିଲେ। କିନ୍ତୁ ପୁଲିସ କୌଣସି କାର୍ଯ୍ୟାନୁଷ୍ଠାନ ଗ୍ରହଣ ନ କରିବାରୁ ଶେଷରେ ସେମାନେ ଗଣମାଧ୍ୟମରେ ସବୁକଥା ପ୍ରକାଶ କଲେ। ଏବେ ଏହି ଘଟଣା ସ୍ଥାନୀୟ ଅଞ୍ଚଳରେ ଆଲୋଡ଼ନ ସୃଷ୍ଟି କରିଛି । ଫାଣ୍ଡି ଏସ୍ଆଇ ମହେନ୍ଦ୍ର ଶର୍ମା ଏବଂ କନେଷ୍ଟବଳ ବିନିତା ରାଓ ନିଲମ୍ବିତ ହୋଇଛନ୍ତି। ଆସାମ ଡିଜିପି କୁଳଧର ସାଇକିଆ ଉକ୍ତ ଘଟଣାରେ ଦରଙ୍ଗ୍ ଏସ୍ପିଙ୍କୁ ତଦନ୍ତ ନିର୍ଦ୍ଦେଶ ଦେଇଛନ୍ତି।
Sambad is now on WhatsApp
Join and get latest news updates delivered to you via WhatsApp
ସୂଚନାନୁଯାୟୀ, ଏହି ୩ ଭଉଣୀଙ୍କ ଭାଇ ନିକଟରେ ଜଣେ ମହିଳାଙ୍କ ସହ ଘର ଛାଡ଼ି କୁଆଡ଼େ ପଳାଇଛନ୍ତି। ଏନେଇ ସମ୍ପୃକ୍ତ ମହିଳାଙ୍କ ପରିବାର ସଦସ୍ୟ ତାଙ୍କ ବିରୋଧରେ ଅପହରଣ ମାମଲା ରୁଜୁ କରିଥିଲେ। ତେବେ ପୁଲିସ ଏହି ମାମଲାରେ ୩ ଭଉଣୀଙ୍କୁ ଜେରା ପାଇଁ ଫାଣ୍ଡିକୁ ନେଇଥିଲା। ବଳପୂର୍ବକ ସେମାନଙ୍କ ପାଖରୁ ଜାଣିବାକୁ ଚେଷ୍ଟା କରିଥିଲା ଯେ ତାଙ୍କ ଭାଇ କେଉଁଠାରେ ଅଛନ୍ତି। କିନ୍ତୁ ୩ ଭଉଣୀ ଏ ବିଷୟରେ କିଛି ଜାଣିନାହାନ୍ତି ବୋଲି କହିବାପରେ ପୁଲିସ ସେମାନଙ୍କୁ ଉଲଗ୍ନ କରି ନିର୍ଯାତନା ଦେଇଥିଲା। ମୁଖ୍ୟମନ୍ତ୍ରୀ ସର୍ବାନନ୍ଦ ସୋନୱାଲ୍ ଏହି ମାମଲାର ତଦନ୍ତ ନିର୍ଦ୍ଦେଶ ଦେବା ସହ ଦୋଷୀଙ୍କୁ ଛଡ଼ାଯିବ ନାହିଁ ବୋଲି କହିଛନ୍ତି।