ଶ୍ରୀନଗର : ଆଜି ଜାମ୍ମୁ ଓ କାଶ୍ମୀର ସ୍ଥିତି ନିୟନ୍ତ୍ରଣରେଖା ନିକଟରେ ଆତଙ୍କବାଦୀମାନେ ସେନାର ଏକ ପାଟ୍ରୋଲିଂ ଗାଡ଼ି ଉପରକୁ ଗୁଳିମାଡ କରିବା ଦ୍ୱାରା ଦୁଇଜଣ ଜବାନ ଆହତ ହୋଇଛନ୍ତି । ସେନା ପକ୍ଷରୁ ତୁରନ୍ତ ଏହାର ଦୃଢ ଜବାବ ଦିଆଯାଇଥିଲା ଓ ମିଳିଥିବା ସର୍ବଶେଷ ଖବର ପର୍ଯ୍ୟନ୍ତ ଏ ଅଂଚଳରେ ଅପରେସନ ଅବ୍ୟାହତ ରହିଛି ।
Sambad is now on WhatsApp
Join and get latest news updates delivered to you via WhatsApp
ପବିତ୍ର ରମଜାନ ମାସରେ ସରକାରଙ୍କ ପକ୍ଷରୁ ଅସ୍ତ୍ରବିରତି ଚାଲିଥିବା ବେଳେ ସ୍ଥିତିର ସମୀକ୍ଷା କରିବା ପାଇଁ ଗୃହମନ୍ତ୍ରୀ ରାଜନାଥ ସିଂ ଆଜି ସକାଳେ ଶ୍ରୀନଗରରେ ପହଞ୍ଚିଛନ୍ତି । ଗୃହମନ୍ତ୍ରୀଙ୍କ କାଶ୍ମୀରଗ୍ରସ୍ତ ଦିନ ଆତଙ୍କବାଦୀମାନେ ଜାଣିଶୁଣି ଏହି ଆକ୍ରମଣ କରାଯାଇଥିବା ଅନୁମାନ କରାଯାଉଛି । ରାଜନାଥ ରାଜ୍ୟସରକାର, ସେନା ଓ ଅର୍ଦ୍ଧସାମରିକ ବାହିନୀର ଅଧିକାରୀମାନଙ୍କ ସହ ଏକ ବୈଠକରେ ସ୍ଥିତିର ସମୀକ୍ଷା କରିବାର ସମ୍ଭାବନା ରହିଛି । ଏହା ସହିତ ସେ ପ୍ରକୃତ ଭାରତ-ପାକ ସୀମା ନିକଟକୁ ମଧ୍ୟ ଯାଇ ସ୍ଥିତିର ଆକଳନ କରିବେ । ଗତକାଲି ପ୍ରତିରକ୍ଷାମନ୍ତ୍ରୀ ନିର୍ମଳା ସୀତାରମଣ କହିଥିଲେ ଯେ ସରକାର ରମଜାନ ଅସ୍ତ୍ରବିରତିକୁ ସମ୍ମାନ ଦିଅନ୍ତି । କିନ୍ତୁ ସୀମା ଆରପଟୁ କୌଣସି ଦୁଃସାହସିକ ପଦକ୍ଷେପର ଦୃଢ ଜବାବ ଦିଆଯିବ । କାରଣ ଆତଙ୍କବାଦ ଓ କଥାବାର୍ତ୍ତା ଏକା ସାଙ୍ଗରେ ହୋଇପାରିବ ନାହିଁ ।