କରୋନା ଭୟରେ ଫ୍ରାନ୍ସ ହସ୍ପିଟାଲରୁ ଚୋରି ହେଲା ୨,୦୦୦ ସର୍ଜିକାଲ ମାସ୍କ
ନୂଆଦିଲ୍ଲୀ: କରୋନା ଭୟରେ ଏବେ ସାରା ବିଶ୍ବ ଥରହର। ଦିନକୁ ଦିନ ଏହା ଗୋଟିଏ ପରେ ଗୋଟିଏ ଦେଶକୁ ବ୍ୟାପୁଥିବା ବେଳେ ଡ଼ରରେ ଲୋକେ ଘରୁ ବାହାରିବା ବନ୍ଦ କରିସାରିଲେଣି। ଏଭଳି ପରିସ୍ଥିତିରେ ଫ୍ରାନ୍ସର ଏକ ହସ୍ପିଟାଲରେ ୨,୦୦୦ଟି ସର୍ଜିକାଲ ମାସ୍କ ଚୋରି ହୋଇଥିବା ଜଣାପଡ଼ିଛି। କରୋନା ସଂକ୍ରମଣରୁ ନିଜକୁ ରକ୍ଷା କରିବା ପାଇଁ ଏବେ ସର୍ଜିକାଲ ମାସ୍କର ଭୂମିକା ଗୁରୁତ୍ବପୂର୍ଣ୍ଣ ଥିବାରୁ ଲୋକେ ଏହାକୁ ଚୋରି କରିବା ଆରମ୍ଭ କରିଛନ୍ତି। ୨୦୦୦ ସର୍ଜିକାଲ ମାସ୍କ ଚୋରି ହେବା ବିଷୟରେ ମଙ୍ଗଳବାର ସୂଚନା ଦେଇଛନ୍ତି ଫ୍ରାନ୍ସର ସ୍ବାସ୍ଥ୍ୟ ଅଧିକାରୀ।
Sambad is now on WhatsApp
Join and get latest news updates delivered to you via WhatsApp
ଫ୍ରାନ୍ସରେ ଥିବା ମାର୍ସେଲ ହସ୍ପିଟାଲରେ ଏଭଳି ଘଟଣା ଘଟିଥିବା ବେଳେ ହସ୍ପିଟାଲ କର୍ତ୍ତୃପକ୍ଷ କହିଛନ୍ତି, ଚୋରି ହୋଇଥିବା ମାସ୍କ ସବୁ ରୋଗୀ ଏବଂ କର୍ମଚାରୀମାନଙ୍କ ପାଇଁ ଉପଲବ୍ଧ ଥିଲା। ଯେଉଁମାନଙ୍କ ଅସ୍ତ୍ରୋପଚାର ହେଉଛି, ସେମାନଙ୍କୁ ଏହି ମାସ୍କ ଦିଆଯିବାର ଥିଲା। କିନ୍ତୁ କରୋନା ଆତଙ୍କ ପାଇଁ ଏବେ ଏହା ଚୋରି ହୋଇଯାଇଛି। ଏହି ଚୋରି ପଛରେ କାହାର ହାତ ରହିଛି, ସେ ବିଷୟରେ ଜାଣିବା ପାଇଁ ତଦନ୍ତ ଆରମ୍ଭ କରିଦିଆଯାଇଛି। ହସ୍ପିଟାଲରେ ଏବେ ସାଧାରଣ କାର୍ଯ୍ୟ ଜାରି ରଖିବା ପାଇଁ ପର୍ଯ୍ୟାପ୍ତ ପରିମାଣର ମାସ୍କ ଅଛି। କିନ୍ତୁ କୌଣସି ଜରୁରୀକାଳିନ ପରିସ୍ଥିତି ପାଇଁ ଆମେ ଉଭୟ ମାସ୍କ ଏବଂ ହ୍ୟାଣ୍ଡ ଜେଲକୁ ଗଚ୍ଛିତ ରଖିବା ପାଇଁ ଅଧିକ ମାସ୍କ ଅର୍ଡର କରିଥିଲୁ, ଯାହା ଏବେ ଚୋରି ହୋଇଯାଇଛି।
ସୂଚନା ମୁତାବକ, କରୋନାର ଶିକାର ହୋଇ ଫ୍ରାନ୍ସରେ ୪ଜଣଙ୍କ ମୃତ୍ୟୁ ହେବା ପରେ ଏହାକୁ ନେଇ ଲୋକଙ୍କ ମନରେ ଭୟ ଆରମ୍ଭ ହୋଇଛି। ନିଜକୁ ବଞ୍ଚାଇବା ପାଇଁ ବା ଅଧିକ ଦାମରେ ଲୋକଙ୍କୁ ବିକ୍ରି କରିବା ପାଇଁ କେହି ଜଣେ ଏଭଳି ଚୋରି କରିଥିବା ସନ୍ଦେହ କରାଯାଉଛି।