ଜାଣନ୍ତୁ କେତେ ବିପଜ୍ଜନକ ବିନା ହେଲମେଟରେ ବାଇକ୍ ଚାଳନା : ୨୦୧୮ରେ ରାସ୍ତାରେ ଯାଇଛି ୪୩,୬୦୦ ଜୀବନ
ନୂଆଦିଲ୍ଲୀ: ବିନା ହେଲମେଟରେ ଗାଡ଼ି ଚାଳନା ଯୋଗୁଁ ପ୍ରତିବର୍ଷ ହଜାର ହଜାର ଜୀବନ ଯାଉଛି । ପରିବହନ ବିଭାଗର ସୂଚନା ଅନୁସାରେ ଗତବର୍ଷ ଦୁର୍ଘଟଣାରେ ପ୍ରାୟ ୪୩,୬୦୦ ହେଲମେଟ ପିନ୍ଧି ନ ଥିବା ବାଇକ୍ ଚାଳକଙ୍କ ମୃତ୍ୟୁ ଘଟିଛି । ପୂର୍ବବର୍ଷ ତୁଳନାରେ ଏହା ପ୍ରାୟ ୨୧ ପ୍ରତିଶତ ଅଧିକ । ୨୦୧୭ରେ ହେଲମେଟ ନ ପିନ୍ଧି ୩୫,୯୭୫ ଚାଳକଙ୍କ ମୃତ୍ୟୁ ଘଟିଥିଲା । ଏହି ସମୟରେ ବାଇକ୍ ପଛରେ ବିନା ହେଲମେଟରେ ବସିଥିବା ୧୫ ହଜାର ୩୬୦ ଜଣଙ୍କର ମୃତ୍ୟୁ ଘଟିଛି ।
Sambad is now on WhatsApp
Join and get latest news updates delivered to you via WhatsApp
ହେଲମେଟ ପିନ୍ଧିବାର ଗୁରୁତ୍ୱକୁ ଉପଲବ୍ଧି କରାଇବା ଲାଗି ଏହି ତଥ୍ୟ ପ୍ରକାଶ କରାଯାଇଛି । ଗୁଜରାଟ ଓ ଝାଡ଼ଖଣ୍ଡ ବାଇକ୍ ପଛରେ ବସିଥିବା ବ୍ୟକ୍ତିଙ୍କ ଉପରୁ ହେଲମେଟ୍ କଟକଣା ହଟାଇଛନ୍ତି । କିନ୍ତୁ ଗତ ବର୍ଷ ଗୁଜରାଟରେ ୯୫୮ ଜଣ ବିନା ହେଲମେଟ ପିନ୍ଧା ବ୍ୟକ୍ତିଙ୍କ ଦୁର୍ଘଟଣାରେ ମୃତ୍ୟୁ ଘଟିଥିଲା । ସେମାନଙ୍କ ମଧ୍ୟରୁ ବାଇକ୍ ପଛରେ ୫୬୦ ଜଣ ବସିଥିଲେ । ସେହିପରି ଝାଡ଼ଖଣ୍ଡରେ ୭୯୦ ଜଣ ବାଇକ୍ ଚାଳକ ଓ ୪୫୦ଜଣ ପଛପଟେ ବସିଥିବା ବ୍ୟକ୍ତି ହେଲମେଟ୍ ପିନ୍ଧି ନଥିବା କାରଣରୁ ଦୁର୍ଘଟଣାରେ ମୃତ୍ୟୁବରଣ କରିଛନ୍ତି ।
ନୂଆ ମଟରଯାନ ଆଇନ ଆସିବା ପରେ ଗତ ସପ୍ତାହରେ ଏହି ଦୁଇ ରାଜ୍ୟ ବାଇକରେ ବସିଥିବା ବ୍ୟକ୍ତିଙ୍କ ପାଇଁ ହେଲମେଟ ପିନ୍ଧାକୁ କୋହଳ କରିଛନ୍ତି । ଉତ୍ତର ପ୍ରଦେଶରେ ଗତବର୍ଷ ସର୍ବାଧିକ ୬,୦୨୦ ଏବଂ ମହାରଷ୍ଟ୍ରରେ ୫,୨୩୨ ବାଇକ ଚାଳକଙ୍କ ହେଲମେଟ୍ ନ ପିନ୍ଧିବା କାରଣରୁ ଦୁର୍ଘଟଣାରେ ମୃତ୍ୟୁ ହୋଇଛି।