ପୋଲିଓର ଦୁଇ ବୁନ୍ଦା ନେବା ପରେ ମୃତ୍ୟୁବରଣ କଲା ୯ ମାସର ଶିଶୁ
ବାନ୍ଦା(ଉତ୍ତରପ୍ରଦେଶ) : ଉତ୍ତରପ୍ରଦେଶର ବାନ୍ଦା ଜିଲ୍ଲାରେ ଏକ ଆଶ୍ଚର୍ଯ୍ୟ କଲା ଭଳି ଘଟଣା ଘଟିଛି । ପୋଲିଓ ଖାଇବା ପରେ ଜଣେ ୯ମାସର ଶିଶୁ ମୃତ୍ୟୁବରଣ କରିବା ଖବର ଏବେ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି । ଏହି ଘଟଣା ସାମ୍ନାକୁ ଆସିବା ପରେ ମାମଲାର ତଦନ୍ତ ପାଇଁ ଏକ କମିଟି ଗଠନ କରାଯାଉଥିବା କହିଛନ୍ତି ଡିଏମ୍ ଏଚ୍.ଲାଲ୍ । ଦୋଷୀ ସାମ୍ନାକୁ ଆସିବା ପରେ ତା’ ପ୍ରତି କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି ଡିଏମ୍ ଏଚ୍.ଲାଲ୍ । ଏହା ସହ ପୋଲିଓ ବୁନ୍ଦା ଦିଆଯାଇଥିବା ସିସିଟିଭି ଯାଞ୍ଚ ପାଇଁ ପଠାଯିବ ବୋଲି କହିଛନ୍ତି ସିଏମ୍ଓ ଡ଼ାକ୍ତର ସନ୍ତୋଷ କୁମାର ।
Sambad is now on WhatsApp
Join and get latest news updates delivered to you via WhatsApp
ତାଙ୍କ କହିବା ଅନୁଯାୟୀ, ମୃତ୍ୟୁର ପ୍ରକୃତ କାରଣ ଜାଣିବା ପାଇଁ ଦୁଇଟି ଡ଼ାକ୍ତରୀ ଟିମ୍ ଶିଶୁର ଶବ ବ୍ୟବଚ୍ଛେଦ କରିବେ । ପୋଲିଓ ଔଷଧ ଛୋଟ ଶିଶୁମାନଙ୍କ ପାଇଁ ସମ୍ପୂର୍ଣ୍ଣ ସୁରକ୍ଷିତ । କିନ୍ତୁ ୯ମାସର ଶିଶୁର ମୃତ୍ୟୁ କେମିତି ଏବଂ କ’ଣ ପାଇଁ ହେଲା, ତାହା ଜାଣିବା ପାଇଁ ଯାଞ୍ଚ ଆରମ୍ଭ ହୋଇ ଯାଇଛି ।
ସୂଚନା ମୁତାବକ, ବାନ୍ଦାର ଶମ୍ଭୁ ନଗରରେ ରହୁଥିବା ସୂର୍ଯ୍ୟ କୁମାର ଶୁକ୍ଲାଙ୍କ ୯ମାସର ଝିଅ ଇଶିତାଙ୍କୁ ଗତକାଲି ଏଏନ୍ଏମ୍ଙ୍କ ଟିମ୍ ଘରକୁ ଯାଇ ପୋଲିଓ ବୁନ୍ଦା ଦେଇଥିଲେ । ଏହା ପରେ ଇଶିତାଙ୍କ ସ୍ୱାସ୍ଥ୍ୟବସ୍ଥା ବିଗିଡ଼ିବା ପରେ ତାଙ୍କୁ ଡ଼ାକ୍ତରଖାନା ନେବା ବେଳକୁ ତାଙ୍କ ମୃତ୍ୟୁ ହୋଇ ଯାଇଥିଲା ।