ବାଙ୍ଗାଲୁରୁ : କର୍ଣ୍ଣାଟକ ରାଜନୀତି ପାଇଁ ଗତ କିଛି ମାସ ବେଶ ନାଟକୀୟ ରହିଆସିଛି । ଏକ ଅତି ପ୍ରତିଦ୍ୱନ୍ଦିତା ପୂର୍ଣ୍ଣ ନିର୍ବାଚନ, ତାପରେ ସରକାର ଗଠନକୁ ନେଇ ବିଭିନ୍ନ କସରତ, ବଳ କଷାକଷି, ବିଧାୟକଙ୍କୁ ହୋଟେଲରେ ତାଲା ପକାଇ ରଖିବା ଆଦି ନାଟକ କୌଣସି ବଲିଉଡ ଫିଲ୍ମଠାରୁ କମ ନାଟକୀୟ ନଥିଲା । ତେବେ ବହୁ ଛକା ପଞ୍ଝା, ନାକଟବାଜି ପରେ ଏବେ କର୍ଣ୍ଣାଟକରେ କଂଗ୍ରେସ-ଜେଡିଏସ ମିିଳିତ ସରକାର ଏବେ ଶାସନ ଆରମ୍ଭ କରିଛି । କିନ୍ତୁ ଆପଣ ଯଦି ଭାବୁଛନ୍ତି ସବୁକିଛି ଠିକଠାକ ହୋଇଗଲା, ତବେ ଆପଣ ଭୁଲ କରୁଛନ୍ତି । କାରଣ କର୍ଣ୍ଣାଟକରେ ରାଜନୈତିକ ନାଟକ ଶେଷ ହୋଇନାହିଁ । ଏବେବି ସେଠାରେ ରାଜନୈତିକ ଅସନ୍ତୋଷ କୁହୁଳୁଛି ।
Sambad is now on WhatsApp
Join and get latest news updates delivered to you via WhatsApp
ମୁଖ୍ୟମନ୍ତ୍ରୀ କୁମାରସ୍ୱାମୀଙ୍କ ଦଳ ଜେଡିଏସରେ ସେଭଳି କିଛି ସମସ୍ୟା ନଥିଲେ ମଧ୍ୟ କଂଗ୍ରେସରେ ଏକ ନୂଆ ସମସ୍ୟା ଆରମ୍ଭ ହୋଇଛି । ରାଜ୍ୟ କଂଗ୍ରେସରେ ଏବେ ଦୁଇ ଗୋଷ୍ଠୀଙ୍କ ମଧ୍ୟରେ ବଳ କଷାକଷି ଚାଲିଛି । ଏହି ଦୁଇ ଗୋଷ୍ଠୀ ହେଉଛନ୍ତି ପୂର୍ବତନ ମୁଖ୍ୟମନ୍ତ୍ରୀ ସିଦ୍ଧରାମାୟା ଓ ତାଙ୍କ ଅନୁଗତ ଏବଂ ଅନ୍ୟ ଗୋଷ୍ଠୀଟି ହେଉଛି ନବ ନିଯୁକ୍ତ ଉପ-ମୁଖ୍ୟମନ୍ତ୍ରୀ ଜି.ପରମେଶ୍ୱର ଓ ତାଙ୍କ ଅନୁଗତ । ଏହି ଦୁଇ ଗୋଷ୍ଠୀ ମଧ୍ୟରେ ଗତ ୨୦୧୩ରୁ ବିବାଦ ଚାଲିଛି । ସିଦ୍ଧରାମାୟା ଅଭିଯୋଗ କରିଛନ୍ତି ପରମେଶ୍ୱରଙ୍କ ଯୋଗୁଁ ହିଁ ତାଙ୍କର ଅନୁଗତ ଅନେକ ବିଧାୟକ ମନ୍ତ୍ରୀ ହୋଇପାରିନାହାନ୍ତି । ଆହୁରି ଅନେକ ବିଧାୟକଙ୍କୁ ଅଣଦେଖା କରାଯାଉଛି । ଅନ୍ୟପକ୍ଷରେ ପରମେଶ୍ୱର ଅଭିଯୋଗ କରିଛନ୍ତି ଯେ ପ୍ରଥମ ଗୋଷ୍ଠୀଟି ଜାଣିଶୁଣି ତାଙ୍କୁ ସହଯୋଗ କରୁନାହାନ୍ତି ଓ ଶାସନରେ ପ୍ରତିବନ୍ଧକ ସୃଷ୍ଟି କରୁଛନ୍ତି । ଏପରି ଛକାପଞ୍ଝା ମଧ୍ୟରେ ମିଳିତ ସରକାର କେତେ ଦିନ ଚାଲୁଛି ତାହା ଦେଖିବା କଥା ।