ସିକ୍ୟୁରିଟି ଚେକ୍ ବେଳେ ମା’ କୋଳରୁ ଖସି ପଡ଼ିଲା ୧୦ମାସର ଶିଶୁ, ତଳେ ପଡ଼ିବା ପୂର୍ବରୁ ଧରି ପକାଇଲେ ଏୟାର ହୋଷ୍ଟେସ
ଟଙ୍କା ରୋଜଗାର ପାଇଁ ବିଭିନ୍ନ ମାଧ୍ୟମ ରହିଛି । କିଛି ମାଧ୍ୟମ କାହା ପାଇଁ ସହଜ, ତ’ ଆଉ କିଛି କଷ୍ଟକର । ସେଭଳି ଏକ କଷ୍ଟକର କାମ ହେଉଛି ଏୟାର ହୋଷ୍ଟେସର ଦାୟିତ୍ୱ ନିର୍ବାହ କରିବା । ବିମାନରେ ଯାତ୍ରା କରୁଥିବା ଯାତ୍ରୀମାନଙ୍କ ପାଇଁ ଏମାନଙ୍କ ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ଯାତ୍ରୀମାନେ ବିମାନରେ ଚଢ଼ିବା ଠାରୁ ଆରମ୍ଭ କରି ଓହ୍ଲାଇବା ପର୍ଯ୍ୟନ୍ତ, ଏମାନେ ବିମାନ ଭିତରେ ଗୁରୁତ୍ୱପୁର୍ଣ୍ଣ ଭୂମିକା ଗ୍ରହଣ କରିଥାନ୍ତି । ବିଗତ ଅତୀତରେ ବିଭିନ୍ନ ବିମାନ କମ୍ପାନିରେ ଉପଲବ୍ଧ ଥିବା ଏୟାର ହୋଷ୍ଟେସ ସୁବିଧାକୁ ନେଇ ଅନେକ ଅଭିଯୋଗ ହୋଇ ସାରିଥିବା ବେଳେ ଏବେ ଏକ ନୂଆ ଚିତ୍ର ସାମ୍ନାକୁ ଆସିଛି । ଏଥର ବିମାନ କର୍ମଚାରୀଙ୍କ ଅବହେଳା ପାଇଁ ନୁହେଁ; ବରଂ ଦାୟିତ୍ୱବାନ ଗୁଣ ପାଇଁ ବିମାନ କମ୍ପାନି ଚର୍ଚ୍ଚାର ପରିସରକୁ ଆସିଛି । ଜେଟ୍ ଏୟାରେଓ୍ଵଜ୍ର ଏୟାର ହୋଷ୍ଟେସ ନିଜ କଥା ନ ଭାବି ଜଣେ ଶିଶୁର ଜୀବନ ବଞ୍ଚାଇଥିବା ଜଣା ପଡ଼ିଛି । ଏହି ଘଟଣାଟି ମୁମ୍ବାଇ ଏୟାରପୋର୍ଟରେ ଘଟିଥିବା ଜଣା ପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ମୁମ୍ବାଇରୁ ଅହମଦାବାଦ୍ ଯିବା ପାଇଁ ସୁକ୍ୟୁରିଟି ଚେକିଂ ପାଇଁ ଜଣେ ମହିଳା ଆସି ଲାଇନ୍ରେ ଛିଡ଼ା ହୋଇଥିଲେ । ଏହି ସମୟରେ ହଠାତ୍ ତାଙ୍କ କୋଳରେ ଥିବା ୧୦ମାସର ଶିଶୁଟି ତଳକୁ ଖସି ପଡ଼ିଥିଲା । ମହିଳା ଜଣଙ୍କ କ’ଣ କରିବେ କିଛି ଜାଣି ପାରି ନଥିବା ବେଳେ ଏହି ସମୟରେ ସେଠାରେ ପାଖରେ ଜଣେ ଏୟାର ହୋଷ୍ଟେସ ଆସି ଶିଶୁଟିକୁ ଧରି ପକାଇଥିଲେ । ଶିଶୁଟିକୁ ଏକ ନିଶ୍ଚିତ ବିପଦ ମୁଖରୁ ବଞ୍ଚାଇବା ସମୟରେ ସେ ତଳେ ପଡ଼ି ଯିବାରୁ ତାଙ୍କୁ ଆଘାତ ଲାଗିଥିବା ଜଣା ପଡ଼ିଛି । ଏୟାର ହୋଷ୍ଟେସଙ୍କ ଏଭଳି କାମ ସଂପର୍କରେ ଖବର ପ୍ରଚାର ଓ ପ୍ରସାରିତ ହେବା ପରେ ସମସ୍ତେ ତାଙ୍କର ଏହି କାମକୁ ପ୍ରଶଂସା କରିଛନ୍ତି ।