ବିଳମ୍ବରେ ବିମାନ ପହଞ୍ଚିବାରୁ ଯାତ୍ରୀଙ୍କୁ ୮.୮ଲକ୍ଷ ଟଙ୍କା ଜରିମାନା ଦେବ ଏୟାର ଇଣ୍ଡିଆ
ନୂଆଦିଲ୍ଲୀ : ନିଜର ଏକ ତ୍ରୁଟି ପାଇଁ ଏବେ ୮.୮ଲକ୍ଷ ଟଙ୍କାର ଜରିମାନା ଦେବାକୁ ଯାଉଛି ଏୟାର ଇଣ୍ଡିଆ । ଯାତ୍ରୀସେବାରେ ବାଧାସୃଷ୍ଟି ହୋଇଥିବାରୁ ଏୟାର ଇଣ୍ଡିଆ ତରଫରୁ ଏହି ରାଶି ଯାତ୍ରୀମାନଙ୍କୁ ଦିଆଯିବ ବୋଲି ଜଣାପଡ଼ିଛି । ମେ ୯ରେ ଦିଲ୍ଲୀରୁ ଚିକାଗୋ ଯାଉଥିବା ଏୟାର ଇଣ୍ଡିଆ ବିମାନ (ନଂ୧୨୭) ଚିକାଗୋରେ ପହଞ୍ଚିବା ପାଇଁ ଆବଶ୍ୟକତାଠାରୁ ଅଧିକ ସମୟ ଲଗାଇଥିଲା । ଯିବା ପାଇଁ ୧୬ଘଣ୍ଟା ସମୟ ଲାଗୁଥିବା ବେଳେ ବିମାନ କର୍ମଚାରୀଙ୍କ ଭୁଲ୍ ପାଇଁ ପ୍ରାୟ ୬ ଘଣ୍ଟା ବିଳମ୍ବରେ ପହଞ୍ଚିଥିଲା ବିମାନ । ଯାହାର ଫଳ ସ୍ୱରୁପ ଏୟାର ଇଣ୍ଡିଆକୁ ୮.୮ଲକ୍ଷ ଟଙ୍କା ଜରିମାନା ଦେବାକୁ ପଡ଼ିବ ବୋଲି ଜଣାପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ଆମେରିକାର ଗାଇଡ଼୍ଲାଇନ୍ ଅନୁସାରେ ନିର୍ଦ୍ଧାରିତ ସମୟ ଠାରୁ ଯାତ୍ରୀମାନେ ଯଦି ୪ଘଣ୍ଟା ଅଧିକ ବିମାନ ମଧ୍ୟରେ ବସି ରହୁଛନ୍ତି, ତେବେ ବିମାନ କମ୍ପାନୀ ପ୍ରତି ଯାତ୍ରୀମାନଙ୍କୁ ଜରିମାନା ଆକାରରେ ୨୭,୫୦୦ଟଙ୍କା ଦେବ । ଏୟାର ଇଣ୍ଡିଆ ବିମାନରେ ସେ ଦିନ ୩୨୩ଜଣ ଯାତ୍ରୀ ଥିବାରୁ ସର୍ବମୋଟ୍ ୮.୮ଲକ୍ଷ ଟଙ୍କା ଏୟାର ଇଣ୍ଡିଆକୁ ଦେବାକୁ ପଡ଼ିବ । ସୂଚନା ମୁତାବକ, ଦିଲ୍ଲୀ-ଚିକାଗୋ ବିମାନଟି ନିର୍ଦ୍ଧାରିତ ସମୟରେ ଚିକାଗୋରେ ପହଞ୍ଚିବାକୁ ଥିବା ବେଳେ ପାଗ ଖରାପ ହେତୁ ବିମାନଙ୍କୁ ମିଲୌକେ ବିମାନ ବନ୍ଦରରେ ଅବତରଣ କରାଯାଇଥିଲା । ମିଲୌକେ ବିମାନ ବନ୍ଦରରୁ ଚିକାଗୋ ୧୯ମିନିଟ୍ ସମୟର ବାଟ ହୋଇଥିବା ବେଳେ କ୍ରିଉ ମେମ୍ବରଙ୍କ ଅବହେଳା ହେତୁ ବିମାନଟି ଉଡ଼ାଣ ଭରିବାରେ ୬ ଘଣ୍ଟା ବିଳମ୍ବ କରିଥିଲା । ୬ଘଣ୍ଟା ପର୍ଯ୍ୟନ୍ତ ଯାତ୍ରୀମାନେ ବିମାନରେ ବସି ରହିଥିଲେ । ୩୨୩ ଯାତ୍ରୀମାନଙ୍କ ମଧ୍ୟରୁ ୪୧ଜଣ ହୁଇଲ୍ଚେୟାରରେ ଥିବା ବେଳେ ଦୁଇ ଜଣ ଶିଶୁ ଥିଲେ ବୋଲି ଜଣାପଡ଼ିଛି ।