ଗାନ୍ଧିନଗର ଲୋକସଭା ଆସନରୁ ପ୍ରାର୍ଥୀପତ୍ର ଦାଖଲ କଲେ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହା
ଅହମ୍ମଦାବାଦ : ଶନିବାର ନାମାଙ୍କନ ପତ୍ର ଦାଖଲ କରିଛନ୍ତି ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହା । ୨୦୧୯ ନିର୍ବାଚନ ପାଇଁ ଗାନ୍ଧିନଗର ଲୋକସଭା ଆସନରୁ ପ୍ରାର୍ଥୀପତ୍ର ଭରିଛନ୍ତି ବିଜେପି ଚାଣକ୍ୟ । ଅହମ୍ମଦାବାଦରେ ଏକ ଜନସଭାକୁ ସମ୍ବୋଧିତ କରି ଶାହା ବିରାଟ ଶୋଭାଯାତ୍ରାରେ ବାହାରି ନାମାଙ୍କନ ଦାଖଲ କରିଥିଲେ। ନିଜ ସମର୍ଥକ, କେନ୍ଦ୍ରମନ୍ତ୍ରୀ, ଦଳୀୟ ନେତୃବୃନ୍ଦଙ୍କ ସହ ଦୀର୍ଘ ୪ କିଲୋମିଟର ରୋଡ ସୋ’ କରିଥିଲେ । ଏହି ଅବସରରେ କେନ୍ଦ୍ରମନ୍ତ୍ରୀ ରାଜନାଥ ସିଂହ, ନୀତିକ ଗଡକାରୀ, ରାମବିଳାଶ ପାଶୱାନ ଓ ଶିବସେନା ମୁଖ୍ୟ ଉଦ୍ଧବ ଠାକରେ ପ୍ରମୁଖ ଉପସ୍ଥିତ ରହିଥିଲେ ।
Sambad is now on WhatsApp
Join and get latest news updates delivered to you via WhatsApp
ଅହମ୍ମଦାବାଦରେ ଶାହାଙ୍କ ଜନସଭାରେ ଯୋଗ ଦେଇ ରାଜନାଥ ସିଂହ କହିଥିଲେ ଯେଉଁ କାମ ସାଢେ ୫ବର୍ଷରେ ମୁଁ କରିପାରିଲି ନାହିଁ ତାହା ଅମିତ ଶାହା ସାଢେ ୪ ବର୍ଷରେ କରିଦେଖାଇଲେ । ଅମିତ ଶାହା ଗାନ୍ଧିନଗରରୁ ନାମାଙ୍କନ ଭରିଥିବାରୁ ତାଙ୍କୁ ଶୁଭେଚ୍ଛା ଓ ଶୁଭକାମନା ଜଣାଇଛନ୍ତି ରାଜନାଥ । ଏଥିସହ କଂଗ୍ରେସକୁ ଟାର୍ଗେଟ କରି ସେ କହିଛନ୍ତି ମୋଦିଙ୍କୁ ରାହୁଲ ଗାନ୍ଧି ଚୌକିଦାର ଚୋର ହେ କହୁଛନ୍ତି । ତେଣୁ ମୁଁ ଜନତାଙ୍କୁ ଅନୁରୋଧ କରୁଛି, ସେମାନେ ବିରୋଧୀଙ୍କୁ ଜବାବ ଦିଅନ୍ତୁ ଯେ ଚୌକିଦାର ଚୋର ନେହିଁ , ପିଏମ ବନନା ସିଓର ହେ ।
ଅହମ୍ମଦାବାଦରେ ଅମିତ ଶାହାଙ୍କ ଜନସଭାରେ ସାମିଲ ହୋଇ ଶିବସେନା ମୁଖ୍ୟ ଉଦ୍ଧବ ଠାକରେ କହିଛନ୍ତି ବିଜେପି ଓ ଶିବସେନା ମଧ୍ୟରେ ସମସ୍ତ ପ୍ରକାର ମନୋମାଳିନ୍ୟ ଦୂର ହୋଇଛି । ତେବେ ବିଜେପି ଓ ଶିବସେନା ମଧ୍ୟରେ ମତାନ୍ତରକୁ ନେଇ କିଛି ଲୋକ ଖୁସି ଥିଲେ । କିନ୍ତୁ ମୁଁ ଆଜି ସେହିମାନଙ୍କୁ କହୁଛି ଯେ ସେ ସବୁ ମତାନ୍ତର ଦୂର ହୋଇଯାଇଛି । ଏବେ ଶାହାଙ୍କ ସହ ମୋ ବିଚାର ଏକ । ବିଜେପି ସହ ମୋ ବିଚାର ଏକ । ଆମେ ନେତା ମଧ୍ୟ ଏକ ।