ମୋଦୀ ସରକାରଙ୍କ ଚାପ ଆଗରେ ମୁଣ୍ଡ ନୂଆଇଁଲେ ଆଣ୍ଟିଗୁଆ ସରକାର, ଭାରତ ଫେରିବେ ମେହୁଲ ଚୋକସି
ନୂଆଦିଲ୍ଲୀ: ପଞ୍ଜାବ ନ୍ୟାସନାଲ ବ୍ୟାଙ୍କ ଦୁର୍ନୀତିରେ ଅଭିଯୁକ୍ତ ମେହୁଲ ଚୋକସିଙ୍କ ପ୍ରତ୍ୟର୍ପଣ ନେଇ ଭାରତ ଚାପ ପ୍ରୟୋଗ କରିଥିଲା |ଆଣ୍ଟିଗୁଆ ସରକାର ଭାରତ ସରକାରଙ୍କ ଚାପ ଫଳରେ ମେହୁଲଙ୍କ ନାଗରିକତା ରଦ୍ଦ କରିବାକୁ ନିଷ୍ପତ୍ତି ନେଇଛନ୍ତି | ଆଣ୍ଟିଗୁଆ ପ୍ରଧାନମନ୍ତ୍ରୀ ଗେଷ୍ଟନ ବ୍ରାଉନ କହିଛନ୍ତି ଯେ ବ୍ୟବସାୟୀ ମେହୁଲ ଚୋକସିଙ୍କ ନାଗରିକତାକୁ ରଦ୍ଦ କରିଦିଆଯିବ ଓ ତାଙ୍କୁ ଭାରତକୁ ଫେରାଇଦିଆଯିବ | କୌଣସି ଅଭିଯୁକ୍ତଙ୍କୁ ଶରଣ ଦିଆଯିବ ନାହିଁ ବୋଲି ସେ ରୋକଠୋକ ଶୁଣାଇଦେଇଛନ୍ତି | ଏହାସହ ଚୋକସିଙ୍କ ପାଖରେ ସେଠାରେ ରହିବାକୁ କୌଣସି ଆଇନଗତ ବ୍ୟବସ୍ଥା ନାହିଁ ବୋଲି ମଧ୍ୟ କହିଛନ୍ତି | ଯାହାଫଳରେ ମେହୁଲ ଭାରତ ଆସିବା ନେଇ ରାସ୍ତା ସଫା ହୋଇଯାଇଛି |
Sambad is now on WhatsApp
Join and get latest news updates delivered to you via WhatsApp
ସୂଚନା ଥାଉ କି ପଞ୍ଜାବ ନ୍ୟାସନାଲ ବ୍ୟାଙ୍କର ପାଖାପାଖି ୧୪ ହଜାର କୋଟି ଟଙ୍କା ହଡପ ଘଟଣାରେ ବିଦେଶ ପଳାଇଛନ୍ତି ହୀରା ବ୍ୟବସାୟୀ ମେହୁଲ ଚୋକସି | ଏବେ ସେ ଆଣ୍ଟିଗୁଆରେ ରହୁଥିବାବେଳେ ତାଙ୍କୁ ଫେରାଇଆଣିବା ପାଇଁ ଭାରତ ଚାପ ପ୍ରୟୋଗ କରିଥିଲା | ସୋମବାର ଦିନ ବମ୍ବେ ହାଇକୋର୍ଟ ମେହୁଲଙ୍କ ସ୍ୱାସ୍ଥ୍ୟ ବାବଦରେ ରିପୋର୍ଟ ଦେବାକୁ ବିଶେଷଜ୍ଞଙ୍କ ଏକ ଟିମ ଗଠନ କରିଥିଲେ | ଏହି ଟିମ ଚୋକସି ବିମାନରେ ଆସିପାରିବେ ନା ନାହିଁ ତାହାର ରିପୋର୍ଟ ଦେବ |
ନିର୍ବାଚନ ସମୟରେ ମେହୁଲ ଚୋକସିଙ୍କୁ ନେଇ କଂଗ୍ରେସ ମୋଦୀ ସରକାରଙ୍କୁ ଘେରିଥିଲା | କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ମୋଦିଙ୍କୁ ଟାର୍ଗେଟ କରିଥିଲେ | ତେବେ ମେହୁଲଙ୍କୁ ବାରମ୍ବାର ସରକାର ଓ ଅଦାଲତ ପକ୍ଷରୁ ସମନ ପଠାଯାଇଥିଲା | କିନ୍ତୁ ସବୁ ଥର ସେ ଆସିବାକୁ ମନା କରିଦେଉଥିଲେ |