କ୍ଷତିରେ ଚାଲୁଥିବା ବ୍ୟାଙ୍କ ଶାଖାଗୁଡ଼ିକ ବନ୍ଦ ହେବ !
ନୂଆଦିଲ୍ଲୀ: କ୍ଷତିରେ ଚାଲୁଥିବା ଶାଖାଗୁଡ଼ିକୁ ବନ୍ଦ କରିଦେବାକୁ ଅର୍ଥମନ୍ତ୍ରାଳୟ ରାଷ୍ଟ୍ରାୟତ ବ୍ୟାଙ୍କଗୁଡ଼ିକୁ ପରାମର୍ଶ ଦେଇଛି । ବ୍ୟାଙ୍କଗୁଡ଼ିକର ଆର୍ଥିକ ବୋଝ କମାଇବାକୁ ଏହି ପଦକ୍ଷେପ ନେବାକୁ ଏହି ନିର୍ଦ୍ଦେଶ ଦିଆଯାଇଛି ।
Sambad is now on WhatsApp
Join and get latest news updates delivered to you via WhatsApp
ସରକାରୀ ସୁତ୍ରରୁ ମିଳିଥିବା ସୂଚନାରୁ ଜଣାପଡ଼ିଛି ଯେ ବ୍ୟାଙ୍କମାନଙ୍କର ଅନାଦେୟ ଋଣ ପରିମାଣ ବଢିଚାଲିଥିବାରୁ ସେମାନଙ୍କର ଆର୍ଥିକ ସ୍ଥିତି ବିଗିଡ଼ିଯାଇଛି । ଏଥିପାଇଁ ବ୍ୟାଙ୍କଗୁଡ଼ିକର କ୍ଷତି ଓ ବ୍ୟୟଭାର ହ୍ରାସ କରି ସେଗୁଡ଼ିକୁ ଅଧିକ ପ୍ରତିଯୋଗିତାକ୍ଷମ କରିବାକୁ ସରକାର ଉଦ୍ୟମ କରୁଛନ୍ତି । ସେଥିଲାଗି କ୍ଷତିରେ ଚାଲୁଥିବା ଶାଖାଗୁଡିକୁ ବନ୍ଦ କରିବାକୁ ପରାମର୍ଶ ଦିଆଯାଇଛି । ଏଥିରେ ଉଭୟ ଘରୋଇ ଓ ବିଦେଶରେ ଥିବା ଶାଖା ଅନ୍ତର୍ଭୁକ୍ତ ।
ଇତି ମଧ୍ୟରେ ଷ୍ଟେଟ୍ ବ୍ୟାଙ୍କ ଓ ପଞ୍ଜାବ ନ୍ୟାସନାଲ ବ୍ୟାଙ୍କ ପରି କେତେକ ବ୍ୟାଙ୍କ ଏହି ଯୋଜନାରେ କାମ ଆରମ୍ଭ କରିଦେଲେଣି । ଇଣ୍ଡିଆନ ଓଭରସିଜ୍ ବ୍ୟାଙ୍କ ମଧ୍ୟ ନିଜର ଆଞ୍ଚଳିକ କାର୍ଯ୍ୟାଳୟ ସଂଖ୍ୟା ୫୯ରୁ ୪୯କୁ ହ୍ରାସ କରିଦେଇଛି । ଅନ୍ୟପକ୍ଷରେ ବିଦେଶରେ ଥିବା ବ୍ୟାଙ୍କ ଶାଖାଗୁଡ଼ିକୁ ମିଶ୍ରଣ କରିବା କିମ୍ବା ଆବଶ୍ୟକ ପଡ଼ିଲେ ବନ୍ଦ କରିଦେବାକୁ ଯୋଜନା ଚାଲିଛି । ଅନ୍ୟ ଦେଶଗୁଡିକରେ ଭାରତୀୟ ବ୍ୟାଙ୍କ ଗୁଡ଼ିକ ଅଲଗା ଅଲଗା ଶାଖା ଖୋଲିବା ଅପେକ୍ଷା ସେଗୁଡିକୁ ମିଶାଇ ଗୋଟିଏ ଶାଖା ଖୋଲିବାକୁ ପରାମର୍ଶ ଦିଆଯାଇଛି । ସେହିପରି ଯେଉଁ ବଜାରରେ ଭଲ ଲାଭ ମିଳୁଛି ସେଠାରେ ଶାଖା ଖୋଲିବାକୁ କୁହାଯାଇଛି । ଲାଭ ମିଳୁନଥିବା ଶାଖାଗୁଡିକୁ ବନ୍ଦ କରିବାକୁ କୁହାଯାଇଛି । ବିଶ୍ୱର ୩୬ଟି ଦେଶରେ ଷ୍ଟେଟ୍ ବ୍ୟାଙ୍କର ମୋଟ ୧୯୫ଟି ବିଦେଶୀ ଶାଖା ରହିଛି । ସେହିପରି ବ୍ୟାଙ୍କ ଅଫ ବରୋଦାର ୨୪ଟି ଦେଶରେ ୧୦୭ଟି ଶାଖା ରହିଛି ।