ଅହମଦାବାଦ: ଦିନରେ ଗଛରେ ଆପଣ ବାଦୁଡ଼ିଙ୍କୁ ଝୁଲୁଥିବାର ଦେଖିଥିବେ | କିନ୍ତୁ କେବେ ଜଣଙ୍କର ଘରେ ବାଦୁଡ଼ି ରହୁଥିବାର କଥା ଶୁଣିଛନ୍ତି କି ? ତେବେ ଆଜି ଆମେ ଏମିତି ଜଣେ ବୁଢ଼ୀ ମାଉସୀଙ୍କ କଥା କହିବୁ ଯାହାଙ୍କ ଘରେ ୧୦୦୦ରୁ ଉର୍ଦ୍ଧ୍ବ ବାଦୁଡ଼ି ରହୁଛନ୍ତି | ଏହି ସବୁ ବାଦୁଡ଼ି ବୁଢ଼ୀ ମାଉସୀଙ୍କୁ କେବେ ବି ଛାଡ଼ିଯାଆନ୍ତି ନାହିଁ | ମାଉସୀ ବି କେବେ ଏମାନଙ୍କୁ ତଡ଼ିବାକୁ ଚେଷ୍ଟା କରିନାହାଁନ୍ତି | ଗୁଜୁରାଟର ରାଜପୁରା ଗାଁ | ଏହି ଗାଁରେ ରୁହନ୍ତି ସାନ୍ତାବେନ | ଆର୍ଥିକ ଦୃଷ୍ଟିକୋଣରୁ ସେତିକି ସ୍ଵଛଳ ନଥିଲେ ବି ନିଜର ୩ ବଖରା ଘର ମଧ୍ୟରୁ ନିଜେ ଗୋଟିଏ ବଖରା ରହୁଥିବା ବେଳେ ଆଉ ଦୁଇ ବଖରାରେ ରୁହନ୍ତି ମାଉସୀଙ୍କ ସବୁ ସୁଖ ଦୁଃଖର ସାଥି ୧ ହଜାର ବାଦୁଡ଼ି |
Sambad is now on WhatsApp
Join and get latest news updates delivered to you via WhatsApp
ସାନ୍ତାବେନ ଏମାନଙ୍କର ନିଜ ଛୁଆ ଭଳି ଯତ୍ନ ନିଅନ୍ତି, ପ୍ରତିଦିନ ସକାଳେ ସେ ବାଦୁଡ଼ି ରହୁଥିବା ଦୁଇ ବଖରା ଘରକୁ ସଫା କରିବା ସହ ମଶା ଯେଭଳି ନ ହେବେ ସେଥିପାଇଁ ନିମ୍ବ ପତ୍ରର ଧୂଆଁ ଦେଇଥାନ୍ତି | ସାନ୍ତାବେନଙ୍କ କହିବା କଥା ଯେ ୧୯୯୪ ମସିହାରୁ ଏମାନେ ମୋ ସହ ରହୁଛନ୍ତି | ଏମାନଙ୍କ ଭିତରେ ବି ଜୀବନ ଅଛି ମୁଁ କାହିଁକି ଘଉଡ଼ାଇବି |
କିଛି ବର୍ଷ ପୂର୍ବେ କିଛି ଲୋକ ସାନ୍ତାବେନଙ୍କ ଏହି ପୁରୁଣା ଘରକୁ ବିକିବାର ପ୍ରସ୍ତାବ ଦେଇଥିଲେ | କିନ୍ତୁ ସାନ୍ତାବେନ ରୋକଠୋକ ଶୁଣାଇଦେଇଥିଲେ, ଘର ବିକ୍ରି ହୋଇପାରିବ ନାହିଁ | ଯେଉଁ ବାଦୁଡ଼ିମାନେ ଘରର ମାଟି ଖାଉଛନ୍ତି ସେମାନେ କୁଆଡେ ଯିବେ ବୋଲି କହିଥିଲେ | ସାନ୍ତାବେନଙ୍କ ଘରେ ରହୁଥିବା ଏହି ପ୍ରଜାତିର ନାମ ମାଉସ ଟେଲ ହୋଇଥିବାବେଳେ କାନ୍ଥରେ ଲାଗିକରି ରୁହନ୍ତି | ବାଦୁଡ଼ିମାନେ କୌଣସି କ୍ଷତି କରୁନଥିବାବେଳେ ବାଦୁଡ଼ିଙ୍କୁ ଦେଖିବାକୁ ବହୁତ ଲୋକ ଆସନ୍ତି, କିନ୍ତୁ ପ୍ରଥମେ ଡରିଯାନ୍ତି |